ಅವಧಿ ಮುಗಿದ ಮುಜರಾಯಿ ಚೆಕ್ ಆ ದೇವರಿಗೇ ಪ್ರೀತಿ

ಉಡುಪಿ, ಜುಲೈ 14: ಸರ್ಕಾರವು ಉಡುಪಿ ಜಿಲ್ಲೆಯ ಧಾರ್ಮಿಕ ದೇವಸ್ಥಾನಗಳಿಗೆ 2010-11ನೇ ಸಾಲಿನ ವರ್ಷದ ಅನುದಾನ ರೂ. 6000 ನೀಡುವಂತೆ 2010 ಅಕ್ಟೋಬರ್ ತಿಂಗಳಲ್ಲಿಯೇ ಹಣ ಬಿಡುಗಡೆ ಮಾಡಿದೆ.

ಈ ಅನುದಾನ ಪ್ರತಿ ದೇವಸ್ಥಾನಕ್ಕೂ ರೂಪಾಯಿ ಆರು ಸಾವಿರದಂತೆ ಚೆಕ್ ಮುಖಾಂತರ ವಿತರಣೆ ಆಗಬೇಕಾಗಿದೆ. ಹಾಗಾಗಿ 9-11-2010ರಲ್ಲಿಯೇ ದೇವಸ್ಥಾನಗಳಿಗೆ ವಿತರಣೆ ಮಾಡುವಂತೆ ಪ್ರತಿ ದೇವಸ್ಥಾನಕ್ಕೆ ರೂ. 6000 ಮೊತ್ತದ ಚೆಕ್ ಅನ್ನು ಉಡುಪಿ ಸ್ಟೇಟ್ ಬ್ಯಾಂಕ್‌ನಿಂದ ತಾಲ್ಲೂಕು ತಹಶೀಲ್ದಾರರು ಪಡೆದಿರುತ್ತಾರೆ. ಈ ಚೆಕ್‌ನ ಅವಧಿ ಆರು ತಿಂಗಳು ಮಾತ್ರ ಆಗಿರುತ್ತದೆ.

ಆದರೆ ಈ ಚೆಕ್ ದೇವಸ್ಥಾನಗಳ ಆಡಳಿತದಾರರಿಗೆ ವಿತರಣೆ ಮಾಡಲು ಆರು ತಿಂಗಳ ಅವಧಿ ದಾಟಿದ ನಂತರ ಗ್ರಾಮ ಲೆಕ್ಕಿಗರಿಗೆ ಕಳುಹಿಸಲಾಗಿದೆ. ಚೆಕ್ ನಿಯಮ ಪ್ರಕಾರ ಆರು ತಿಂಗಳ ಅವಧಿಗೆ ಮುನ್ನವೇ ನಗದೀಕರಿಸಿಕೊಳ್ಳಲು ಅವಕಾಶವಿರುತ್ತದೆ. ಈಗ ಜೂನ್ ತಿಂಗಳಲ್ಲಿ ಚೆಕ್‌ಗಳ ವಿತರಣೆ ಮಾಡಲಾಗಿದೆ. ಅವಧಿ ಮೀರಿದ ಈ ಚೆಕ್‌ಗಳನ್ನು ನಗದೀಕರಿಸಿಕೊಳ್ಳಲು ಆಗುವುದೇ ಇಲ್ಲ. ಇಂತಹ ಚೆಕ್‌ಗಳಿಂದ ಪ್ರಯೋಜನವೇನು?

English summary

The Karnataka government has issued a out-dated cheque to Udupi archaks. The cheques dated 9-11-2010 are valued at Rs. 6,000 each. Is there any body to remind the government about the 6 months validity period of any cheque.