ಕಾಂಗೋ ವಿಮಾನ ದುರಂತ, 46 ಮಂದಿ ದುರ್ಮರಣ

Published: Saturday, July 9, 2011, 16:55 [IST]

ಕಾಂಗೋ, ಜು. 9: ಪೂರ್ವ ಡೆಮಾಕ್ರಟಿಕ್ ರಿಪಬ್ಲಿಕ್ ನ 'ಕಾಂಗೋ'ದಲ್ಲಿ ಶುಕ್ರವಾರ (ಜು.8)118 ಪ್ರಯಾಣಿಕರಿದ್ದ ವಿಮಾನ ಅಪಘಾತಕ್ಕೀಡಾಗಿ 46 ಜನ ಧಾರುಣವಾಗಿ ಸಾವಿಗೀಡಾಗಿದ್ದಾರೆ. ಧಾರಾಕಾರವಾಗಿ ಮಳೆ ಸುರಿಯುತ್ತಿದ್ದ ವೇಳೆ 'ಹೇವಾ ಬೋರಾ' ಕಂಪೆನಿಗೆ ಸೇರಿದ ಈ ವಿಮಾನ ಕಾಂಗೋ ದೇಶದ ಉತ್ತರ ಭಾಗದಲ್ಲಿರುವ 'ಕಿಸಂಗನಿ' ಎಂಬಲ್ಲಿ ಭೂ ಸ್ಪರ್ಶ ಮಾಡವ ಪ್ರಯತ್ನದಲ್ಲಿದ್ದಾಗ ಈ ಅಪಘಾತ ಸಂಭವಿಸಿದೆ.

ಹೇವಾ ಬೋರಾ ಅಧ್ಯಕ್ಷ ಸ್ಟಾವ್ ರೋಸ್ ಪಪಾಯೊಅನ್ನೊ ಈ ಅಪಘಾತವನ್ನು ಧೃಡೀಕರಿಸಿದ್ದು " ಇಲ್ಲಿಯವರೆಗೆ 44 ಶವಗಳು ದೊರೆತಿವೆ. ಆಸ್ಪತ್ರೆಗೆ ಕೊಂಡೊಯ್ಯುವ ವೇಳೆ 2 ಜನ ಮೃತಪಟ್ಟಿದ್ದು 53 ಜನ ಸುರಕ್ಷಿತವಾಗಿದ್ದಾರೆ" ಎಂಬ ಮಾಹಿತಿ ನೀಡಿದ್ದಾರೆ. ಆದರೆ ಉಳಿದ 19 ಮಂದಿಯ ಬಗ್ಗೆ ಯಾವ ಮಾಹಿತಿಯೂ ದೊರೆತಿಲ್ಲ.

ಸಂಚಾರ ಮುಗಿಸಿ ವಿಮಾನ ನಿಲ್ದಾಣಕ್ಕೆ ವಾಪಸ್ಸಾಗುತ್ತಿದ್ದ ವೇಳೆ, ಧಾರಾಕಾರವಾಗಿ ಸುರಿಯುತ್ತಿದ್ದ ಮಳೆ ಹಾಗೂ ಭೀಕರ ಬಿರುಗಾಳಿಗೆ ವಿಮಾನ ತುತ್ತಾಗಿರುವುದನ್ನು ಕೂಡ ಉಲ್ಲೇಖಿಸಿರುವ ಅವರು ಕೆಟ್ಟ ಹವಾಮಾನದಿಂದಾಗಿ ರನ್ ವೇಗಿಂತ ಮೊದಲೇ ವಿಮಾನವನ್ನು ಲ್ಯಾಂಡ್ ಮಾಡಬೇಕಾದ ಪರಿಸ್ಥಿತಿಯಲ್ಲಿ ಈ ಅವಘಡ ಸಂಭವಿಸಿದೆ ಎಂದಿದ್ದಾರೆ. ರನ್ ವೇಯ ತುದಿಯಲ್ಲಿ ದಟ್ಟವಾದ ಕಪ್ಪು ಹೊಗೆ ಆವರಿಸಿದ್ದು ಸ್ಪಷ್ಟವಾಗಿ ಗೋಚರಿಸುತ್ತಿದೆ ಎಂಬ ಮಾಹಿತಿಯೂ ಲಭ್ಯವಾಗಿದೆ.

Published On July 9, 2011