ದೇಶದ ಮಾನ ಹರಾಜು ಹಾಕಿದ ರಾಜನಿಗೆ 2ನೇ ಸ್ಥಾನ

By Prasad

Published: Thursday, May 19, 2011, 16:42 [IST]

ನವದೆಹಲಿ, ಮೇ 19 : ಡಿಎಂಕೆ ನಾಯಕ, ಕೇಂದ್ರದ ಬೊಕ್ಕಸದಿಂದ 1.87 ಲಕ್ಷ ಕೋಟಿ ರು.ನಷ್ಟು ಹಣವನ್ನು ಮುಂಡಾಮೋಚಿದ ಮಾಜಿ ದೂರಸಂಪರ್ಕ ಸಚಿವ ಎ ರಾಜಾ ಟೈಮ್ಸ್ ನಿಯತಕಾಲಿಕ ನಡೆಸಿದ ಸರ್ವೇಯಲ್ಲಿ ಮೊದಲನೇ ಸ್ಥಾನವನ್ನು ಕೂದಲೆಳೆಯಲ್ಲಿ ತಪ್ಪಿಸಿಕೊಂಡಿದ್ದಾರೆ. ವಿಶ್ವದಲ್ಲೇ ಅತ್ಯಂತ ಭ್ರಷ್ಟವಾಗಿ ಅಧಿಕಾರ ದುರುಪಯೋಗ ಪಡೆಸಿಕೊಂಡವರ ಪಟ್ಟಿಯಲ್ಲಿ ರಾಜಾ ಎರಡನೇ ಸ್ಥಾನ ಪಡೆದು ಕುಖ್ಯಾತಿಗೆ ಒಳಗಾಗಿದ್ದಾರೆ!

ಲಿಬಿಯಾ ದೇಶದ ಸರ್ವಾಧಿಕಾರಿ ಗಡಾಫಿ, ಉತ್ತರ ಕೊರಿಯಾದ ಸ್ವೇಚ್ಛಾಡಳಿತಗಾರ ಕಿಂ ಜಾಂಗ್ ಇಲ್ ಮತ್ತು ಇಟಲಿಯ ಸಿಲ್ವಿಯೋ ಬೇರ್ಸುಲೋನಿ ಮುಂತಾದ ಮಹಾನ್ ಭ್ರಷ್ಟರನ್ನು ಹಿಂದಿಕ್ಕಿ ಎ ರಾಜಾ ಈ ಅಪಖ್ಯಾತಿಯ ಸಾಧನೆಗೈದು ಭಾರತದ ದೂರಸಂಪರ್ಕ ಇಲಾಖೆಯ ಮಾನ ಮರ್ಯಾದೆಯನ್ನು ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಹರಾಜಿಗೆ ಹಾಕಿದ್ದಾರೆ.

ವಿಶ್ವದ ಬಿಲಿಯನೇರ್ ಪಟ್ಟಿಯಲ್ಲಿ ನಮ್ಮ ದೇಶದ ಹಲವಾರು ಶ್ರೀಮಂತರ ಹೆಸರನ್ನು ಬಿಡುಗಡೆ ಮಾಡುತ್ತಿದ್ದ ಟೈಮ್ಸ್ ನ ಈ ಸರ್ವೆಯಲ್ಲಿ ಭಾರತೀಯನೊಬ್ಬನ ಹೆಸರು ಇರುವುದು ತಲೆ ತಗ್ಗಿಸುವಂತದ್ದು. ಇಸ್ರೇಲ್ ಅಧ್ಯಕ್ಷ ಮೋಸ್ ಕ್ಯಾತ್ಸಾವ್, ಅಮೆರಿಕಾದ ಮಾಜಿ ಆಂತರಿಕ ಆಡಳಿತ ಕಾರ್ಯದರ್ಶಿ ಅಲ್ಬರ್ಟ್ ಫಾಲ್ ಮುಂತಾದವರೂ ಈ ಪಟ್ಟಿಯಲ್ಲಿ ಸ್ಥಾನ ಪಡೆದಿದ್ದಾರೆ. ಅಂದ ಹಾಗೆ ಈ ಪಟ್ಟಿಯಲ್ಲಿ ಪ್ರಥಮ ಸ್ಥಾನ ಅಮೆರಿಕಾದ ಮಾಜಿ ಅಧ್ಯಕ್ಷ ರಿಚರ್ಡ್ ನಿಕ್ಸನ್ ಪಾಲಾಗಿದೆ ಎಂದು ಟೈಮ್ಸ್ ತನ್ನ ಸರ್ವೇಯಲ್ಲಿ ತಿಳಿಸಿದೆ. (ಕೃಪೆ: ಇಂಡಿಯ ಟುಡೇ)

Published On May 19, 2011