ಜಪಾನಿನಲ್ಲಿ ಮತ್ತೆ ಭೂಕಂಪ, ಸುನಾಮಿ ಕಟ್ಟೆಚ್ಚರ

ಟೋಕಿಯೊ, ಮಾ. 28: ಇತ್ತೀಚೆಗಷ್ಟೇ ಭೀಕರ ಸುನಾಮಿಯಿಂದ ತತ್ತರಿಸಿರುವ ಜಪಾನಿನಲ್ಲಿ ಸೋಮವಾರ ಬೆಳಗ್ಗೆ ಮತ್ತೆ ಭಾರಿ ಭೂಕಂಪವಾಗಿದ್ದು, ಸುನಾಮಿ ಕಟ್ಟೆಚ್ಚರ ಘೋಷಿಸಲಾಗಿದೆ. ತಕ್ಷಣಕ್ಕೆ ಯಾವುದೇ ಸಾವುನೋವು ವರದಿಯಾಗಿಲ್ಲ. 'ಭೂಕಂಪದ ಪ್ರಮಾಣ 6.5ರಷ್ಟಿತ್ತು. ಇದರಿಂದ 2 ಅಡಿ ಎತ್ತರದ ಅಲೆಗಳು ಈಶಾನ್ಯ ಭಾಗದಲ್ಲಿರುವ ಮಿಯಾಗಿ ಪರ್ಫೆಕ್ಚರ್ ತೀರಕ್ಕೆ ಬಡಿಯುವ ಸಾಧ್ಯತೆ ಇದೆ. ಸುನಾಮಿ ಬಗ್ಗೆ ಜಾಗ್ರತೆ ಇರಲಿ' ಎಂದು ಜಪಾನಿನ ಹವಾಮಾನ ಇಲಾಖೆ ಘೋಷಿಸಿದೆ.

ಸುನಾಮಿ ಕಟ್ಟೆಚ್ಚರ ಸ್ಥಳಿಯ ಮಟ್ಟದಲ್ಲಿದೆ. ಆದ್ದರಿಂದ ನೆರೆಯ ಕರಾವಳಿಗಳನ್ನು ಎಚ್ಚರಿಸಿಲ್ಲ. ಜಪಾನಿನ ಕಾಲಮಾನದ ಪ್ರಕಾರ ಸೋಮವಾರ ಬೆಳಗ್ಗೆ 7.23ರಲ್ಲಿ (ಮಾರ್ಚ್ 28) 6.5 ತೀವ್ರತೆಯ ಭೂಕಂಪ ಸಂಭವಿಸಿದೆ. ಹೊನ್ಷು ಪೂರ್ವ ಕರಾವಳಿಯಲ್ಲಿ 6 ಕಿ.ಮೀ. ಆಳದಲ್ಲಿ ಭೂಕಂಪ ಕೇಂದ್ರೀಕೃತವಾಗಿತ್ತು ಎಂದು ಅಮೆರಿಕ ಹವಾಮಾನ ಇಲಾಖೆ ಖಚಿತಪಡಿಸಿದೆ.

ಮಾರ್ಚ್ 11ರಂದು 9.1 ತೀವ್ರತೆಯ ಭೂಕಂಪ ತದನಂತರ ಬಲಾಢ್ಯ ಸುನಾಮಿ ಜಪಾನಿಗೆ ಬಡಿದಿತ್ತು. ಇದರಿಂದ ಅಂದಾಜು 20 ಸಾವಿರ ಮಂದಿ ಸಾವಿಗೀಡಾಗಿದ್ದಾರೆ. ಸುನಾಮಿಯಿಂದ ಬೆಂಕಿ ಕಾಣಿಸಿಕೊಂಡು ಫುಕೋಶಿಮಾ ಅಣು ಸ್ಥಾವರ ಸಂಪೂರ್ಣವಾಗಿ ಜ್ವಾಲೆಗಳಲ್ಲಿ ನಂದಿಹೋಗಿದ್ದು ಇನ್ನೂ ಕಣ್ಣಿಗೆ ಕಟ್ಟಿದಂತಿದೆ. ಈ ಮಧ್ಯೆ, ಸುನಾಮಿ ಬಾಂಬ್ ಪ್ರಯೋಗಿಸಿ ಜಗತ್ತಿನ ದೊಡ್ಡಣ್ಣ ಅಮೆರಿಕವೇ ಜಪಾನಿನಲ್ಲಿ ಭೂಕಂಪ, ಸುನಾಮಿ ಸಂಭವಿಸುವಂತೆ ದುಸ್ಸಾಹ ನಡೆಸಿತು ಎಂಬ ಚರ್ಚೆ ನಡೆದಿದೆ.

English summary

The United States Geological Survey reported that another earthquake with a magnitude of 6.5 hit eastern Japan on Monday, Mar 28 early morning. Following the earthquake, Japan issued a tsunami alert. There were no reports on casualties or damage.