ಸುನಾಮಿ: ಸಂತ್ರಸ್ತರ ಪತ್ತೆಗೆ ಗೂಗಲ್ ಬಳಸಿ

ಟೋಕಿಯೊ,ಮಾ. 11: ಸರ್ಚ್ ಇಂಜಿನ್ ದೈತ್ಯ ಗೂಗಲ್ ಜಪಾನಿನ ಸುನಾಮಿ ಸಂತ್ರಸ್ಥರ ನೆರವಿಗೆ ತನ್ನದೇ ಆದ ವಿಶಿಷ್ಟ ರೀತಿಯ ಸೇವೆ ಆರಂಭಿಸಿದೆ. ಜಪಾನಿನಲ್ಲಿ ಇಂದು (ಮಾರ್ಚ್ 11) ಸಂಭವಿಸಿದ ಭೀಕರ ಭೂಕಂಪ ಮತ್ತು ಸುನಾಮಿಯಿಂದ ಬಂಧು ಮಿತ್ರರನ್ನು ಕಳೆದುಕೊಂಡವರ ಪತ್ತೆಗಾಗಿ ವಿಶೇಷ ಸೇವೆ ನೀಡತೊಡಗಿದೆ. ಇದರೊಂದಿಗೆ ಗೂಗಲ್, ನಿಜಾರ್ಥದಲ್ಲಿ ಸರ್ಚ್ ಇಂಜಿನ್ ಎನಿಸಿಕೊಂಡಿದೆ.

ಬಂಧು ಮಿತ್ರರನ್ನು ಕಳೆದುಕೊಂಡವರು ಅವರ ಬಗ್ಗೆ ಸೂಕ್ತ ಮಾಹಿತಿಯನ್ನು Google Person Finder Service ಮೂಲಕ ಒದಗಿಸಬಹುದು. ಈ ಮಾಹಿತಿಯನ್ನು ನೋಡಿ ಸಂತ್ರಸ್ತರ ಬಗ್ಗೆ ಮಾಹಿತಿಯಿರುವವರೂ ಹೆಚ್ಚಿನ ಮಾಹಿತಿಯನ್ನು ಗೂಗಲ್ ಗೆ ಒದಗಿಸಬಹುದು. ಈ ಸೇವೆ ಇಂಗ್ಲಿಷ್ ಮತ್ತು ಜಪಾನ್ ಭಾಷೆಗಳಲ್ಲಿ ಲಭ್ಯವಿದೆ.

ಗೂಗಲ್ ಇದಕ್ಕೆ Person Finder: 2011 Japan Earthquake ಎಂದು ಹೆಸರು ನೀಡಿದೆ. ಇದನ್ನು ಎರಡು ರೀತಿ ಬಳಸಿಕೊಳ್ಳಬಹುದು. ಒಂದು, ಬಂಧು ಮಿತ್ರರನ್ನು ಹುಡುಕುವುದಕ್ಕಾಗಿ. ಮತ್ತೊಂದು, ಸಂತ್ರಸ್ತ ಬಂಧು ಮಿತ್ರರ ಬಗ್ಗೆ ಮಾಹಿತಿ ಒದಗಿಸುವುದು. ಆದರೆ ಇಂತಹ ಮಾಹಿತಿಯ ಸತ್ಯಾಸತ್ಯತೆಯನ್ನು ತಾನು ಖಚಿತಪಡಿಸುವ ಹೊಣೆಹೊರುವುದಿಲ್ಲ ಎಂದು ಅದು ಸ್ಪಷ್ಟಪಡಿಸಿದೆ. ಇತರೆ ವೆಬ್ ಸೈಟ್ ಗಳೂ ಈ ಸೇವೆಯನ್ನು ತನ್ನದರಲ್ಲಿ ಪ್ರಸ್ತುತ ಪಡಿಸಬಹುದು. ಇದಕ್ಕೆ ಅಗತ್ಯವಿರುವ ಕೋಡ್ ಅನ್ನು ಒದಗಿಸಲು ಗೂಗಲ್ ಸಿದ್ಧವಿದೆ.

English summary

The search engine giant Google has started a special webpage to help the people in Japan finding their lost friends and loved ones in recent earth quake and tsunami. The new Person Finder service allows users to post the information about their lost friends or relatives. Also, those who have some information about any person in the posts can inform through this service.