ಗೌ.ಡಾ. ಆಗಲೊಲ್ಲೆ ಎಂದ ಸಚಿನ್ ತೆಂಡೂಲ್ಕರ್

ಬೆಂಗಳೂರು, ಮಾ.5: ದೇಶದ ಅಗ್ರಮಾನ್ಯ ಕ್ರಿಕೆಟ್ ಆಟಗಾರ ಸಚಿನ್ ತೆಂಡೂಲ್ಕರ್ ಅವರು ರಾಜೀವ್ ಗಾಂಧಿ ಆರೋಗ್ಯ ವಿಶ್ವವಿದ್ಯಾಲಯ ನೀಡಬಯಸಿದ್ದ ಗೌರವ ಡಾಕ್ಟರೇಟ್ ಅನ್ನು ನಯವಾಗಿ ಬೇಡವೆಂದಿದ್ದಾರೆ.

'ನಾನಿನ್ನೂ ವೃತ್ತಿಪರ ಕ್ರಿಕೆಟ್ ನಲ್ಲಿ ಸಕ್ರಿಯನಾಗಿದ್ದೇನೆ. ಆದ್ದರಿಂದ ಈ ಗೌರವ ಸದ್ಯಕ್ಕೆ ಬೇಡ. ಇದೇ ರೀತಿ ದೇಶ, ವಿದೇಶಗಳ ವಿಶ್ವವಿದ್ಯಾಲಯಗಳು ಗೌರವ ಡಾಕ್ಟರೇಟ್ ನೀಡಲು ಮುಂದಾದಾಗ ನಾನು ನಯವಾಗಿ ತಿರಸ್ಕರಿಸಿರುವೆ' ಎಂದು ತೆಂಡೂಲ್ಕರ್ ಸಮಜಾಯಿಶಿ ಕೊಟ್ಟಿದ್ದಾರೆ. RGUHS ವೈಸ್ ಚಾನ್ಸಲರ್, ರಿಜಿಸ್ಟ್ರಾರ್, ಸಿಂಡಿಕೇಟ್ ನ ಇಬ್ಬರು ಸದಸ್ಯರಿಗೆ ತೆಂಡೂಲ್ಕರ್ ಈ ಬಗ್ಗೆ ಮಾಹಿತಿ ನೀಡಿದ್ದಾರೆ.

ಗೌ.ಡಾ. ಮತ್ತು ಅದರ ಸುತ್ತ ಸುತ್ತಿಕೊಂಡ ವಿವಾದಗಳು

ವಿವಿ ಈಗ ಸಚಿನ್ ರಿಂದ ಅಧಿಕೃತ ಪತ್ರಕ್ಕಾಗಿ ಕಾಯುತ್ತಿದ್ದು, ಅದನ್ನು ವಿವಿಯ ಚಾನ್ಸಲರ್, ರಾಜ್ಯಪಾಲ ಎಚ್.ಆರ್. ಭಾರದ್ವಾಜ್ ಗಮನಕ್ಕೆ ತರಲಿದೆ. ವಿವಿ ಈ ಬಾರಿ ಒಬ್ಬರನ್ನು ಮಾತ್ರ ಗೌರವ ಡಾಕ್ಟರೇಟ್ ಗೆ ಆಯ್ಕೆ ಮಾಡಿರುವುದರಿಂದ ಡಾಕ್ಟರೇಟ್ ಪ್ರದಾನ ಸಮಾರಂಭವನ್ನು ರದ್ದುಗೊಳಿಸುವ ಸಾಧ್ಯತೆಯೂ ಇದೆ.

ಕುತೂಹಲಕರ ವಿಷಯವೆಂದರೆ ಮೈಸೂರು ವಿಶ್ವವಿದ್ಯಾಲಯವೂ ಇದೇ ರೀತಿ ಕ್ರಿಕೆಟ್ ಮಾಂತ್ರಿಕ ಸಚಿನ್ ತೆಂಡೂಲ್ಕರ್ ಅವರಿಗೆ ಗೌ.ಡಾ. ನೀಡುವ ತೀರ್ಮಾನ ತೆಗೆದುಕೊಂಡಿದೆ. ಆದರೆ ಈ ಸಂಬಂಧ ವಿವಿ ತನ್ನ ನಿರ್ಣಯ ತಿಳಿಸಿ, ಸಚಿನ್ ಗೆ ಇನ್ನೂ ಅಧಿಕೃತ ಪತ್ರ ಬರೆದಿಲ್ಲ. ವಿವಿ ಈ ಬಾರಿ ಒಟ್ಟು ನಾಲ್ವರಿಗೆ ಡಾಕ್ಟರೇಟ್ ಗೌರವ ನೀಡಲು ನಿರ್ಧಸಿದೆ.

English summary

Sachin Tendulkar has declined to accept the honorary doctorate to be conferred on him by the Rajiv Gandhi University of Health Sciences (RGUHS). He said that he had declined similar honour from other universities abroad and respected the decision of the university to confer the title on him.