ಜನಗಣತಿ ಆರಂಭ: ಮಾಹಿತಿ ನೀಡಿ ಸಹಕರಿಸಿ

ಬೆಂಗಳೂರು, ಫೆ.8- ವಿಶ್ವದಲ್ಲಿ ಅತಿ ದೊಡ್ಡ ಆಡಳಿತಾತ್ಮಕ ಪ್ರಕ್ರಿಯೆಯಾಗಿರುವ ಜನಗಣತಿ ಕಾರ್ಯ 'ಜನಗಣತಿ 2011' ನಾಳೆಯಿಂದ ಅಂದರೆ ಫೆಬ್ರವರಿ 9ರಿಂದ 28ರವರೆಗೆ ನಡೆಯಲಿದೆ. ಈ ಸಂದರ್ಭದಲ್ಲಿ ಸಾರ್ವಜನಿಕರು ಸೂಕ್ತ ಮಾಹಿತಿ ಕೊಟ್ಟು ಸಹಕರಿಸಬೇಕು ಎಂದು ರಾಜ್ಯ ಜನಗಣತಿ ನೋಡಲ್ ಅಧಿಕಾರಿಯೂ ಆದ ಕಂದಾಯ ಇಲಾಖೆ ಕಾರ್ಯದರ್ಶಿ ಕೆ.ಎಸ್. ಪ್ರಭಾಕರ್ ಕೋರಿದ್ದಾರೆ.

ಮೊದಲನೆಯ ಹಂತವಾಗಿ ಮನೆ ಗಣತಿ ಪ್ರಕ್ರಿಯೆ ಕಳೆದ ಏಪ್ರಿಲ್‌ನಲ್ಲಿ ನಡೆದಿದೆ. ಆ ಸಂದರ್ಭದಲ್ಲಿ ಕಟ್ಟಡ, ವಾಸದ ಮನೆ ಮತ್ತು ಕುಟುಂಬಗಳನ್ನು ಗುರುತಿಸಿ ಪಟ್ಟಿ ಮಾಡಲಾಗಿದೆ. ಪ್ರಸ್ತುತ, ಜನಗಣತಿ ಕೈಗೆತ್ತಿಕೊಳ್ಳಲಾಗುತ್ತಿದೆ. 20 ದಿನಗಳ ಕಾಲ ನಡೆಯುವ ಜನಗಣತಿಯಲ್ಲಿ ಪ್ರತಿಯೊಬ್ಬರೂ ಭಾಗವಹಿಸಬೇಕು. ಗಣತಿದಾರರು ಮನೆಗೆ ಬಂದಾಗ ಅವರು ಕೇಳುವ 29 ಪ್ರಶ್ನೆಗಳಿಗೆ ಉತ್ತರ ನೀಡಬೇಕು ಎಂದು ಪ್ರಭಾಕರ್ ಸೂಚಿಸಿದ್ದಾರೆ.

ಸ್ವಾತಂತ್ರ್ಯದ ಬಳಿಕ ದೇಶದಲ್ಲಿ ನಡೆಯುತ್ತಿರುವ 7ನೇ ಜನಗಣತಿ ಇದಾಗಿದೆ. 1872ರಿಂದ ನಡೆಯುತ್ತಿರುವ ಸರಣಿಯಲ್ಲಿ 15 ನೆಯದಾಗಿದೆ.

ಮಾಹಿತಿ ಸಂಗ್ರಹಿಸುವ ಕೆಲಸವನ್ನು ಈ ಬಾರಿಯೂ ಶಿಕ್ಷಕರೇ ಮಾಡಲಿದ್ದಾರೆ. ಬೆಳಗ್ಗೆ ಮತ್ತು ಸಂಜೆ ಮನೆಗಳಿಗೆ ಭೇಟಿ ನೀಡಿ, ಮಾಹಿತಿ ಸಂಗ್ರಹಿಸಲು ಸೂಚಿಸಲಾಗಿದೆ. ಜನಗಣತಿ ಕುರಿತು ಹೆಚ್ಚಿನ ಮಾಹಿತಿಗಾಗಿ ಶುಲ್ಕರಹಿತ ಸಹಾಯವಾಣಿ 1800 345 000 ಮೂಲಕ ಸಂಪರ್ಕಿಸಬಹುದು.ವೆಬ್‌ಸೈಟ್: www.censuskarnataka.gov.in

English summary

The second phase of the enumeration process for Census 2011 will begin on Feb 9. For population enumeration, 29 questions have been devised. Public are requested to answer all questions.