ಮೊಬೈಲ್ ನಂಬರ್ ಪೊರ್ಟೆಬಿಲಿಟಿ ಬಂತು ಡುಂ... ಡುಂ.....

ಇನ್ನು ಮುಂದೆ ಮೊಬೈಲ್ ಸೇವೆಗಳ ಬಳಕೆ ಹಿಂದಿಗಿಂತಲೂ ಬಿಂದಾಸ್ ಆಗಲಿದೆ. ಬಹುನಿರೀಕ್ಷಿತ ಮೊಬೈಲ್ ನಂಬರ್ ಪೊರ್ಟೆಬಿಲಿಟಿ (ಎಂ ಎನ್ ಪಿ) ಕೊನೆಗೂ ನಮ್ಮಲ್ಲಿಗೆ ಬಂದಿದೆ. ಇನ್ನು ಮುಂದೆ ಕೇವಲ 19 ರೂಪಾಯಿ ಖರ್ಚು ಮಾಡಿದರೆ ಸಾಕು. ಯಾವ ಕಂಪನಿಯ ಸಿಮ್ ಖರೀದಿಸಿದರೂ ಹಳೆಯ ನಂಬರ್ ಉಳಿಸಿಕೊಳ್ಳಬಹುದು. ಇದು ನನ್ನ ಹೊಸ ನಂಬರ್ ಸೇವ್ ಮಾಡಿಟ್ಟುಕೊಳ್ಳಿ ಅಂತ ಯಾರಿಗೂ ಸಂದೇಶ ಕಳುಹಿಸುವ ತೊಂದರೆಯೂ ಇಲ್ಲ. ನಿಮಗೆ ಇಷ್ಟವಾದ ಮೊಬೈಲ್ ಸೇವಾ ಕಂಪನಿಗೆ ಹಾರಬಹುದು. ಟ್ರಾಯ್(TRAI) ನಿಯಮಾವಳಿಗೆ ತಕ್ಕಂತೆ ಮೂಲ ಸೌಕರ್ಯ ವ್ಯವಸ್ಥೆ ಕಲ್ಪಿಸಿರುವ ಐಡಿಯಾ ಸೆಲ್ಯೂಲರ್ ಸಂಸ್ಥೆ MNP ಅಳವಡಿಸುವಲ್ಲಿ ಸಫಲವಾಗಿದೆ.

ಹೆಚ್ಚಿನ ಮೊಬೈಲ್ ಸೇವಾದಾರ ಕಂಪನಿಗಳು ಜನವರಿ 20ರಿಂದ ಕರ್ನಾಟಕ ಸೇರಿದಂತೆ ದೇಶದ ನಾನಾ ರಾಜ್ಯಗಳಲ್ಲಿ ಈ ಸೇವೆಯನ್ನು ಆರಂಭಿಸಲಿವೆ. ಐಡಿಯಾ ಸೆಲ್ಯುಲಾರ್ ಇದರಲ್ಲಿ ಮುಂಚೂಣಿಯಲ್ಲಿದ್ದು ನಾಡಿದ್ದು ಅಂದರೆ 20ನೇ ತಾರೀಖಿನಿಂದ ದೇಶಾದ್ಯಂತ ಈ ಸೇವೆಯನ್ನು ಆರಂಭಿಸಲಿದೆ. ಇದಕ್ಕಾಗಿ ದೇಶದ ಸುಮಾರು 700 ಮಿಲಿಯನ್ ಮೊಬೈಲ್ ಬಳಕೆದಾರರಿಗೆ ಅನುಕೂಲವಾಗುವಂತೆ ಸಹಾಯವಾಣಿ ಟೂಲ್ ಫ್ರೀ ನಂಬರ್ 1800-270-0000 ಗೆ ಕರೆ ಮಾಡಬಹುದಾಗಿದೆ. ಐಡಿಯಾ, ವೊಡಾಫೋನ್ ನಂತಹ ಕಂಪನಿಗಳು ಈಗಾಗಲೇ ಎಂಎನ್ ಪಿ ಜಾಹೀರಾತು ಅಭಿಯಾನ ಆರಂಭಿಸಿವೆ.

ಏನಿದು ನಂಬರ್ ಪೊರ್ಟೆಬಿಲಿಟಿ?: ಸಿಂಪಲ್ ಆಗಿ ಹೇಳಬೇಕೆಂದರೆ ಹಳೆಯ ಮೊಬೈಲ್ ನಂಬರ್ ಉಳಿಸಿಕೊಂಡು ಹೊಸ ಮೊಬೈಲ್ ಕಂಪನಿಯ ಸೇವೆಯನ್ನು ಪಡೆಯುವುದು. ಅಂದರೆ ಈಗಿನ ಕಂಪನಿ ನೀಡುತ್ತಿರುವ ಸೇವೆ ನಿಮಗೆ ಇಷ್ಟವಾಗದೇ ಇದ್ದರೆ ಅದೇ ನಂಬರ್ ನ ಬೇರೊಂದು ಕಂಪನಿಯ ಸಿಮ್ ಖರೀದಿಸಬಹುದು.

ಈಗ ಮೊಬೈಲ್ ಸೇವಾದಾರ ಕಂಪನಿಗಳು ನೀಡುವ ಆಫರ್ ಗಳು ಒಂದಕ್ಕಿಂತ ಒಂದು ಅತ್ಯುತ್ತಮವಾಗಿವೆ. ಬೇರೊಂದು ಕಂಪನಿಯ ಆಫರ್ ನೋಡಿ ಛೇ ಆ ಸಿಮ್ ನನ್ನಲ್ಲಿರುತ್ತಿದ್ದರೆ? ಎಂಬ ಬಯಕೆ ನಿಮಗಿರಬಹುದು. ಅಥವಾ ಇಂತಹ ಆಫರ್ ಗಳಿಂದಾಗಿ ನೀವು ಹಲವು ಸಿಮ್ ಗಳ ಒಡೆಯರಾಗಿರಬಹುದು. ಇನ್ನು ಮುಂದೆ ಹಳೆಯ ನಂಬರ್ ಉಳಿಸಿಕೊಂಡೇ ನಿಮಗಿಷ್ಟವಾದ ಯಾವುದೇ ಕಂಪನಿಯ ಸಿಮ್ ಖರೀದಿಸಬಹುದು.

ಕೇವಲ 19 ರೂಪಾಯಿ ವೆಚ್ಚ: ಸಿಮ್ ಬದಲಾಯಿಸಿದರೂ ಹಳೆಯ ನಂಬರ್ ಉಳಿಸಿಕೊಳ್ಳಲು ಕೇವಲ 19 ರೂಪಾಯಿ ಖರ್ಚು ಮಾಡಿದರೆ ಸಾಕು. ಈ ಸೇವೆಯನ್ನು ಪಡೆಯಬಯಸುವವರು PORT ಅಂತ ಮೊಬೈಲ್ ನಲ್ಲಿ ಕೀ ಮಾಡಿ ಅದರ ಮುಂದೆ ಮೊಬೈಲ್ ಸಂಖ್ಯೆ ಹಾಕಿ 1900 ನಂಬರ್ ಗೆ ಸಂದೇಶ ಕಳಿಸಿದರೆ ಸಾಕು. ಅಲ್ಲಿಂದ ಯೂನಿಕ್ಯೂ ಪೊರ್ಟಿಂಗ್ ಕೊಡ್(ಯುಪಿಸಿ) ನಿಮ್ಮ ಮೊಬೈಲ್ ಗೆ ಬರುತ್ತದೆ. ಈ ಎಸ್ಎಂಎಸ್ ನ್ನು ನಿಮ್ಮ ಹಿಂದಿನ ಮೊಬೈಲ್ ಸೇವಾ ಕಂಪನಿಗೆ ಕಳುಹಿಸಬೇಕಾಗುತ್ತದೆ. ಅಥವಾ ನೀವು ಹಿಂದಿನ ಕಂಪನಿ ನೀಡುವ ಫಾರ್ಮ್ ತುಂಬಿಸಿ ಯುಪಿಸಿ ಕೋಡ್ ಪಡೆಯಬಹುದು. ಆದರೆ ಈ ಪ್ರಕ್ರಿಯೆಗೆ ಸುಮಾರು ಒಂದು ವಾರ ಬೇಕಾಗುತ್ತದೆ. ಅದಕ್ಕಿಂತ ಎಸ್ಎಂಎಸ್ ಕಳುಹಿಸುವುದು ಉತ್ತಮ.

ಪೊರ್ಟೆಬಿಲಿಟಿ ಆರಂಭವಾದ ನಂತರ ಹೀಗೆ ಮಾಡಿ
* PORT ಅಂತ ಟೈಪ್ ಮಾಡಿ ಅದರ ಮುಂದೆ ನಿಮ್ಮ ಮೊಬೈಲ್ ಸಂಖೈ ಬರೆದು 1900ಕ್ಕೆ ಕಳಿಸಿ. ನಿಮಗೆ ಅಲ್ಲಿಂದ ಯೂನಿಕ್ಯೂ ಪೊರ್ಟಿಂಗ್ ನಂಬರ್ ಎಸ್ ಎಂ ಎಸ್ ಮೂಲಕ ದೊರಕುತ್ತದೆ.
* ಅಲ್ಲಿ ದೊರಕಿದ ಯೂನಿಕ್ಯೂ ಪೊರ್ಟಿಂಗ್ ನಂಬರ್ ನ್ನು ನಿಮ್ಮ ಹಿಂದಿನ ಮೊಬೈಲ್ ಸೇವಾ ಕಂಪನಿಗೆ ಎಸ್ ಎಂ ಎಸ್ ಮಾಡಿ.
* ಹಳೆಯ ಕಂಪನಿ ನಿಮ್ಮ ದಾಖಲೆ ಪರಿಶೀಲಿಸಿ ಯಾವುದೇ ಬಾಕಿ ಇಲ್ಲವೆಂದು ಪರಿಶೀಲಿಸುತ್ತದೆ. ಎಲ್ಲ ಚುಕ್ತಾ ಮಾಡಿದ ಮೇಲೆ ಬೇರೆ ಸೇವಾದಾರಲ್ಲಿಗೆ ಹೋಗಲು ಅವಕಾಶ ನೀಡುತ್ತದೆ.
* ಹೊಸ ಮೊಬೈಲ್ ಸೇವಾದಾರ ಕಂಪನಿ ನಿಮಗೆ ಎಸ್ಎಂಎಸ್ ಕಳುಹಿಸಿ ಕೊಡುತ್ತದೆ. ನಂತರದ ನಾಲ್ಕು ದಿನಗಳೊಳಗೆ ಈ ಸೇವೆ ನಿಮಗೆ ದೊರಕಬಹುದು.
* ನಿಮ್ಮ ಹಳೆಯ ಸಿಮ್ ಡೆಡ್ ಆದ ಎರಡು ಗಂಟೆಯ ನಂತರ ಸುಮಾರು 19 ರೂಪಾಯಿ ಮತ್ತು ಸೂಕ್ತ ದಾಖಲೆ ನೀಡಿ ಹೊಸ ಕಂಪನಿಯಿಂದ ಸೇವೆ ಪಡೆದುಕೊಳ್ಳಬಹುದು.
(ಮುಂದಿನ ದಿನಗಳಲ್ಲಿ ಈ ಸೇವೆ ಪಡೆಯುವುದು ಇನ್ನಷ್ಟು ಸುಲಭವಾಗಬಹುದು)

ಸಣ್ಣ ಫ್ಲಾಷ್ ಬ್ಯಾಕ್: ಬ್ರೆಜಿಲ್, ಅಮೆರಿಕಾ, ಆಸ್ಟ್ರೇಲಿಯಾ, ಹಾಂಕಾಂಗ್ ಸೇರಿದಂತೆ ಹೆಚ್ಚಿನ ದೇಶಗಳಿಗೆ ಈ ಸೇವೆ ಆಗಮಿಸಿ ಹಲವು ವರ್ಷಗಳೇ ಕಳೆದಿವೆ. ಕಳೆದ ವರ್ಷವೇ ಈ ಸೇವೆ ಇಲ್ಲಿ ಆರಂಭವಾಗಬೇಕಿತ್ತು. ಆದರೆ ದೂರಸಂಪರ್ಕ ಪ್ರಾಧಿಕಾರ ತಿಳಿಸಿದ ಗಡುವಿನೊಳಗೆ ಸೇವೆಯನ್ನು ನೀಡುವಲ್ಲಿ ಮೊಬೈಲ್ ಸೇವಾದಾರ ಕಂಪನಿಗಳು ವಿಫಲವಾಗಿದ್ದವು. ಕೊನೆಗೂ ಎಲ್ಲರೂ ಕಾಯುತ್ತಿರುವ ದಿನ ಹತ್ತಿರದಲ್ಲಿದೆ.

English summary

Mobile Number Portability(MNP)MNP, which enables subscribers to change operator while retaining their mobile numbers, is to be rolled out across the country on January 20 says TRAI. Aditya Birla group firm Idea Cellular is first to introduce the service to customers.