ರೈಲಿನಲ್ಲಿ ಗುರುತಿನ ಚೀಟಿಯಾಗಿ ಕ್ರೆಡಿಟ್ ಕಾರ್ಡ್

ನವದೆಹಲಿ, ಆ.17: ಭಾರತೀಯ ರೈಲ್ವೇ ಇಲಾಖೆಯು ಇ ಟಿಕೆಟ್ ಮೂಲಕ ಟಿಕೆಟ್ ಕಾಯ್ದಿರಿಸುವ ಪ್ರಯಾಣಿಕರಿಗೆ ಇ ಟಿಕೆಟ್ ಜೊತೆಗೆ ಭಾವಚಿತ್ರವಿರುವ ಕ್ರೆಡಿಟ್ ಕಾರ್ಡ್ ಅನ್ನು ಗುರುತಿನ ಚೀಟಿಯಾಗಿ ಬಳಸಲು ಅವಕಾಶ ನೀಡಿದೆ.

ಇ ಟಿಕೆಟ್ ಮೂಲಕ ಸೀಟು ಕಾಯ್ದಿರಿಸುವ ಪ್ರಯಾಣಿಕರು ಈಗಾಗಲೇ ಚಾಲ್ತಿಯಲ್ಲಿರುವ ಏಳು ಗುರುತಿನ ಚೀಟಿಗಳ ಆಧಾರಗಳ ಜೊತೆಗೆ ಕ್ರೆಡಿಟ್ ಕಾರ್ಡ್ ಅನ್ನು ಸಹ ಬಳಸಬಹುದಾಗಿದೆ.

ವೋಟರ್ಸ್ ಐಡಿ, ಪಾಸ್ ಪೋರ್ಟ್, ಪ್ಯಾನ್ ಕಾರ್ಡ್, ಡ್ರೈವಿಂಗ್ ಲೈಸನ್ಸ್, ಕೇಂದ್ರ/ಸರ್ಕಾರಿ ನೌಕರರ ಗುರುತಿನ ಚೀಟಿ, ವಿದ್ಯಾರ್ಥಿಗಳು ಮಾನ್ಯತೆ ಪಡೆದ ಶಾಲಾ/ಕಾಲೇಜಿನ ಗುರುತಿನ ಚೀಟಿ, ರಾಷ್ಟ್ರೀಕೃತ ಬ್ಯಾಂಕಿನ ಪಾಸ್ ಬುಕ್(ಭಾವಚಿತ್ರ ಸಹಿತ)ಗಳಿಗೆ ಮಾತ್ರ ರೈಲ್ವೇ ಅಧಿಕಾರಿಗಳು ಒಪ್ಪಿಗೆ ಸೂಚಿಸುತ್ತಿದ್ದರು.

ಈ ಸೌಲಭ್ಯ ಎಲ್ಲಾ ವಲಯಗಳಿಗೂ ಅನ್ವಯವಾಗಲಿದೆ. ಟಿಕೆಟ್ ಚೆಕ್ ಮಾಡುವ ಅಧಿಕಾರಿಗಳು ಪ್ರಯಾಣಿಕರಿಗೆ ಈ ಸೌಲಭ್ಯದ ಬಗ್ಗೆ ಮಾಹಿತಿ ನೀಡುವಂತೆ ರೈಲ್ವೇ ಇಲಾಖೆ ಸೂಚಿಸಿದೆ.