5 ವರ್ಷಗಳಲ್ಲಿ ಉದ್ಯೋಗಾವಕಾಶ ದ್ವಿಗುಣ

ನವದೆಹಲಿ, ಆ.16: ಮುಂದಿನ 5 ವರ್ಷಗಳಲ್ಲಿ ದೇಶದ ಉದ್ಯೋಗ ಮಾರುಕಟ್ಟೆ ದ್ವಿಗುಣಗೊಳ್ಳಲಿದೆ ಎಂದು ಹಿರಿಯ ಅಧಿಕಾರಿಯೊಬ್ಬರು ಹೇಳಿದ್ದಾರೆ. ದೇಶದ ಆರ್ಥಿಕ ಬೆಳವಣಿಗೆ ತೀವ್ರಗತಿಯಲ್ಲಿ ಏರಿಕೆ ದಾಖಲಿಸುತ್ತಿರುವ ಹಿನ್ನೆಲೆಯಲ್ಲಿ ಉತ್ಪಾದನಾ, ಬ್ಯಾಂಕಿಂಗ್ ಹಾಗೂ ಸೇವಾ ಉದ್ಯಮ ಹೆಚ್ಚಿನ ಪ್ರಮಾಣದಲ್ಲಿ ನೇಮಕಾತಿ ಮಾಡಿಕೊಳ್ಳಲಿದೆ ಎಂದು ಹೇಳಲಾಗಿದೆ.

ಉದ್ಯೋಗ ನೇಮಕಾತಿ ವಾರ್ಷಿಕ ಶೇ.20 ರ ದರದಲ್ಲಿ ಬೆಳವಣಿಗೆ ದಾಖಲಿಸಲಿದ್ದು, ಈಗಿನ 1000 ಕೋಟಿ ರೂಪಾಯಿಗಳಿಂದ ಮುಂದಿನ 5 ವರ್ಷಗಳಿಗೆ 2000 ಕೋಟಿ ರೂಪಾಯಿಗಳ ಬೆಳವಣಿಗೆ ದಾಖಲಿಸಲಿದೆ ಎಂದು ಈಸೋರ್ಸ್ ಇಂಡಿಯಾದ ವ್ಯವಸ್ಥಾಪಕ ನಿರ್ದೇಶಕ ನಿತಿನ್ ದೇವೇಶ್ವರ್ ಹೇಳುತ್ತಾರೆ.

ಈ ಸೋರ್ಸ್ ಕಂಪೆನಿ ದೇಶದ ಪ್ರಮುಖ ಆನ್ ಲೈನ್ ನೌಕರಿ ಸೇವೆ ಒದಗಿಸುತ್ತಿರುವ ಈ ಎಸ್ಎಮ್ಐ ನ ಅಂಗ ಕಂಪೆನಿ ಆಗಿದೆ. ಉತ್ಪಾದನಾ ರಂಗ ವಾರ್ಷಿಕ ಶೇ.8 ರಿಂದ 10 ರಷ್ಟು ಬೆಳವಣಿಗೆ ದಾಖಲಿಸುತ್ತಿದ್ದು 0.5 ಮಿಲಿಯ ಉದ್ಯೋಗಾವಕಾಶಗಳನ್ನು ಒದಗಿಸಲಿದೆ ಎನ್ನಲಾಗಿದೆ. ಸಣ್ಣ ನಗರಗಳಿಗೆ ವರ್ಗಾವಣೆಗೊಂಡಿರುವ ಕೈಗಾರಿಕಾ ಚಟುವಟಿಕೆಗಳಿಂದ ಈ ಬೆಳವಣಿಗೆ ಆಗಲಿದೆ ಎನ್ನಲಾಗಿದೆ.

ಗುಜರಾತ್ ನ ಸಣ್ಣ ನಗರಗಳಾದ ವಾಪಿ, ಅಂಜರ್, ಚತ್ತೀಸ್ ಘಡದ ರಾಯ್ ಪುರ, ಬಿಲಾಸ್ ಪುರ, ಮತ್ತು ಕೊರ್ಬ, ಉತ್ತರ ಖಾಂಡ್ ನ ಹರಿದ್ವಾರ್ ಮತ್ತು ರುದ್ರಾಪುರ ಹೆಚ್ಚಿನ ಸಂಖ್ಯೆಯಲ್ಲಿ ಉದ್ಯೋಗಾವಕಾಶಗಳನ್ನು ಒದಗಿಸಿವೆ ಎಂದು ದೇವೇಶ್ವರ್ ಹೇಳಿದರು.

ಸಾರ್ವಜನಿಕ ರಂಗದ ಬ್ಯಾಂಕುಗಳೂ ಗ್ರಾಮೀಣ ಪ್ರದೇಶದೆಡೆಗೆ ಹೆಚ್ಚಿನ ಚಿತ್ತ ಹರಿಸಿರುವುದರಿಂದ ಉದ್ಯೋಗಾವಕಾಶಗಳು ಹೆಚ್ಚಲಿವೆ ಎಂದು ಅವರು ಹೇಳಿದರು. ದೇಶದ ಮೊದಲ ಖಾಸಗಿ ಉದ್ಯೋಗ ವಿನಿಮಯ ಕೇಂದ್ರವನ್ನು ಪ್ರಾರಂಭಿಸಿದ ಈ ಸೋರ್ಸ್, 35 ಕೋಟಿ ರೂಪಾಯಿಗಳ ವೆಚ್ಚದಲ್ಲಿ ವಿವಿಧೆಡೆಗಳಲ್ಲಿ ಉದ್ಯೋಗ ವಿನಿಮಯ ಕೇಂದ್ರಗಳನ್ನು ತೆರೆಯಲಿದೆ ಎಂದು ದೇವೇಶ್ವರ್ ಹೇಳಿದರು.

ದೇಶದಲ್ಲಿ ಪ್ರತೀ ವರ್ಷ 40 ಮಿಲಿಯನ್ ಉದ್ಯೋಗಾವಕಾಶಗಳು ಲಭಿಸುತ್ತಿದ್ದು ಮುಂದಿನ 10 ವರ್ಷಗಳಲ್ಲಿ ಈ ಸಂಖ್ಯೆ 160 ಮಿಲಿಯನ್ ಗಳಿಗೇರಲಿದೆ ಎಂದು ಅವರು ಹೇಳಿದರು.