ರಾಷ್ಟ್ಟ್ರಧ್ವಜ ತಲೆಕೆಳಗಾದರೂ ಇವರಿಗೆ ಲೆಕ್ಕಕ್ಕಿಲ್ಲ

ಇಸ್ಲಾಮಾಬಾದ್, ಜೂ.27: ಪಾಕ್ ಪ್ರವಾಸದಲ್ಲಿರುವ ಕೇಂದ್ರಗೃಹ ಸಚಿವರ ಪ್ರವಾಸ ಪಾಕಿಸ್ತಾನದೊಂದಿಗಿನ ಸಂಬಂಧಕ್ಕೆ ಹೊಸ ಆಯಾಮ ನೀಡಲಿದೆ ಎಂದು ವಿದೇಶಾಂಗ ಸಚಿವ ಎಸ್ಎಂ ಕೃಷ್ಣ ಇಂದು ಪ್ರತಿಕ್ರಿಯಿಸಿದ್ದಾರೆ. ಆದರೆ, ಚಿದಂಬರಂ ಸಮ್ಮುಖದಲ್ಲೇ ಭಾರತ ರಾಷ್ಟ್ರಧ್ವಜವನ್ನು ತಲೆಕೆಳಗಾಗಿ ಹಾರಿಸಿದ ಘಟನೆಗೆ ಹೆಚ್ಚಿನ ಮಹತ್ವವನ್ನು , ಪ್ರತಿಕ್ರಿಯೆಯನ್ನು ನಾಯಕರು ನೀಡುತ್ತಿಲ್ಲ.

ಚಿದಂಬರಂ ಅವರು ಪಾಕಿಸ್ತಾನದ ಆಂತರಿಕ ಸಚಿವ ರೆಹಮಾನ್ ಮಲಿಕ್ ಅವರನ್ನು ಭೇಟಿಯಾದ ವೇಳೆ ಈ ಅವಘಡ ಸಂಭವಿಸಿದೆ. ಉಭಯ ರಾಷ್ಟ್ರಗಳ ಧ್ವಜವನ್ನು ಹಾರಿಸಲಾಗಿತ್ತಾದರೂ ಇದರಲ್ಲಿ ಭಾರತದ ಧ್ವಜ ಮಾತ್ರ ಉಲ್ಟಾ ಹಾರುತ್ತಿತ್ತು.

ಇಷ್ಟೆಲ್ಲ ಅವಮಾನವಾಗಿದ್ದರೂ ಚಿದಂಬರಂ ಮಾತ್ರ ಏನೂ ಆಗಿಲ್ಲವೆಂಬಂತೆ ಪ್ರತಿಕ್ರಿಯೆ ನೀಡಿದ್ದಾರೆ. ಕಣ್ತಪ್ಪಿನಿಂದಾಗಿ ಧ್ವಜ ಮೇಲೆ ಕೆಳಗಾಗಿರುವುದು ನಿಜ. ಆದರೆ ಈ ಲೋಪ ಗಮನಕ್ಕೆ ಬಂದ ನಂತರ ಸರಿಪಡಿಸಲಾಯಿತು ಎಂದು ಚಿದು ಸ್ಪಷ್ಟನೆ ನೀಡಿದ್ದಾರೆ.

ಕಳೆದ ಮೂರು ದಶಕಗಳ ನಂತರ ಭಾರತದ ಗೃಹ ಸಚಿವರೊಬ್ಬರು ಪಾಕ್‌ಗೆ ಭೇಟಿ ನೀಡಿದ್ದ ವೇಳೆ ಈ ಅವಾಂತರ ಸೃಷ್ಟಿಯಾಗಿತ್ತು. ಇಸ್ಲಾಮಾಬಾದ್ ವಿಮಾನ ನಿಲ್ದಾಣದಿಂದಲೇ ಅವರನ್ನು ಸ್ವತ: ಮಲಿಕ್ ಅವರು ಸ್ವಾಗತಿಸಿ ನಂತರ ಮಾತುಕತೆ ನಡೆಸಿದ್ದರು.