"ನಾನು ಭಾರತವನ್ನು ಪ್ರೀತಿಸುತ್ತೇನೆ... ಆದರೆ ನನ್ನನ್ನು ಬೆಳೆಸಿದ್ದು UAE": ಭಾರತ ಮೂಲದ ಮಹಿಳಾ ಉದ್ಯಮಿ ರೂಪಾ ಝಾ ಪೋಸ್ಟ್ Viral

ಭಾರತೀಯ ಮೂಲದ ಮಹಿಳಾ ಉದ್ಯಮಿಯೊಬ್ಬರು ತಮ್ಮ ಜೀವನದ ಅತಿ ಪ್ರಮುಖ ಘಟ್ಟಗಳು ಹಾಗೂ ಸಾಧನೆಗಳಿಗೆ ಸಂಯುಕ್ತ ಅರಬ್ ಸಂಸ್ಥಾನ (UAE) ಕಾರಣ ಎಂದು ಬಣ್ಣಿಸಿ, ಆ ದೇಶಕ್ಕೆ ಅತ್ಯಂತ ಭಾವುಕ ನಮನ ಸಲ್ಲಿಸಿದ್ದಾರೆ. 'ಶೂನ್ಯ'ದಿಂದ ಆರಂಭವಾದ ತಮ್ಮ ಜೀವನವು ಇಂದು ಜಾಗತಿಕ ಮಟ್ಟದಲ್ಲಿ ಒಬ್ಬ ಯಶಸ್ವಿ ನಾಯಕಿಯಾಗಿ, ಉದ್ಯಮಿಯಾಗಿ ರೂಪುಗೊಳ್ಳಲು ದುಬೈ ನಗರ ನೀಡಿದ ಬೆಂಬಲ ಹಾಗೂ ಸುರಕ್ಷತೆಯೇ ಮುಖ್ಯ ಕಾರಣ ಎಂದು ಅವರು ಮುಕ್ತಕಂಠದಿಂದ ಶ್ಲಾಘಿಸಿದ್ದಾರೆ. ಮಹಿಳೆಯರಿಗೆ ದುಬೈ ನೀಡುವ ಸುರಕ್ಷತೆ ಮತ್ತು ಘನತೆ, ಯಾವುದೇ ಭಯವಿಲ್ಲದೆ ದೊಡ್ಡ ಕನಸುಗಳನ್ನು ಕಾಣಲು ಮತ್ತು ಬೃಹತ್ ತಂಡವನ್ನು ಕಟ್ಟಲು ತಮಗೆ ಭದ್ರ ಬುನಾದಿಯಾಯಿತು ಎಂದು ಅವರು ತಮ್ಮ ಇನ್‌ಸ್ಟಾಗ್ರಾಮ್ ಪೋಸ್ಟ್‌ನಲ್ಲಿ ಬರೆದುಕೊಂಡಿದ್ದಾರೆ.

"ನನ್ನ ಮೊದಲ ಡ್ರೈವಿಂಗ್ ಲೈಸೆನ್ಸ್ ಪಡೆಯುವುದರಿಂದ ಹಿಡಿದು, ನನ್ನದೇ ಆದ ಸ್ವಂತ ಮನೆ ಖರೀದಿಸುವವರೆಗೆ; ಒಬ್ಬ ಸಾಮಾನ್ಯ ಮಹಿಳೆಯಾಗಿದ್ದ ನಾನು ಉದ್ಯಮಿಯಾಗಿ ಬೆಳೆದು, ನನ್ನದೇ ಆದ ಒಂದು ದೊಡ್ಡ ತಂಡವನ್ನು ಕಟ್ಟುವವರೆಗೆ, ನನ್ನ ಜೀವನದ ಪ್ರತಿಯೊಂದು 'ಮೊದಲ' ಅನುಭವಗಳು ದುಬೈನಲ್ಲಿಯೇ ನಡೆದಿವೆ," ಎಂದು ಪ್ರತಿಷ್ಠಿತ 'ಬ್ಲಾಕ್ ಸ್ವಾನ್' (Black Swan) ಸಂಸ್ಥೆಯ ಸಂಸ್ಥಾಪಕಿ ರೂಪಾ ಝಾ (Rupa Jha) ಅವರು ತಮ್ಮ ಸಾಮಾಜಿಕ ಜಾಲತಾಣದಲ್ಲಿ ಹಂಚಿಕೊಂಡಿದ್ದಾರೆ.

ತಮ್ಮ ಪೋಸ್ಟ್‌ನಲ್ಲಿ ಮುಂದುವರಿದು ಬರೆದಿರುವ ಅವರು, "ನನ್ನ ಪ್ರೀತಿಯ ಸಂಗಾತಿಯೊಂದಿಗಿನ ವಿವಾಹ, ತಾಯ್ತನದ ಮಧುರ ಪಯಣ, ನನ್ನ ಸಹೋದರಿಯರು, ಸೋದರ ಸಂಬಂಧಿಗಳು ಮತ್ತು ನನ್ನ ತಾಯಿಯೊಂದಿಗೆ ತುಂಬು ಕುಟುಂಬದ ಮನೆಯನ್ನು ನಿರ್ಮಿಸಿದ್ದು... ಹೀಗೆ ನನ್ನ ಜೀವನದ ಪ್ರತಿಯೊಂದು ಸುಂದರ ಮೈಲಿಗಲ್ಲುಗಳು ಇಲ್ಲಿಯೇ, ಇದೇ ದುಬೈ ನೆಲದಲ್ಲಿಯೇ ಸಂಭವಿಸಿವೆ," ಎಂದು ಅವರು ಸ್ಮರಿಸಿದ್ದಾರೆ.

ದುಬೈನಲ್ಲಿ ಕಳೆದ ತಮ್ಮ ಸುದೀರ್ಘ ವರ್ಷಗಳನ್ನು ಹಿಂತಿರುಗಿ ನೋಡಿದ ಅವರು, ಈ ನಗರ ತಮಗೆ 'ಅಮೂಲ್ಯವಾದ' ಉಡುಗೊರೆಯನ್ನು ನೀಡಿದೆ ಎಂದಿದ್ದಾರೆ. ಅದೇ ಮಹಿಳೆಯರಿಗೆ ಸಿಗುವ ಸಂಪೂರ್ಣ ಸುರಕ್ಷತೆ ಮತ್ತು ಘನತೆ. "ಯಾವುದೇ ಭಯವಿಲ್ಲದೆ ನಾನು ಮುಕ್ತವಾಗಿ ಓಡಾಡಬಹುದಾದ, ಕನಸು ಕಾಣಬಹುದಾದ, ಭವಿಷ್ಯವನ್ನು ನಿರ್ಮಿಸಬಹುದಾದ ಮತ್ತು ಬೆಳೆಯಬಹುದಾದ ಅದ್ಭುತ ನಗರವಿದು. ಪ್ರತಿಯೊಂದು ಮಾಲ್‌ಗಳಲ್ಲಿಯೂ ಮಕ್ಕಳಿಗಾಗಿ ಪ್ರತ್ಯೇಕ ವ್ಯವಸ್ಥೆಗಳಿವೆ, ಕುಟುಂಬಗಳ ಬಗ್ಗೆ ಕಾಳಜಿ ವಹಿಸುವ ವಾತಾವರಣವಿದೆ. ಮಗುವನ್ನು ಬೆಳೆಸಲು ಇಲ್ಲಿನ ಜೀವನವು ಅತ್ಯಂತ ಸುಲಭ ಎನಿಸುತ್ತದೆ.

ವಲಸಿಗರನ್ನು ತೆರೆದ ತೋಳುಗಳಿಂದ ಸ್ವಾಗತಿಸಿದ ದೇಶವಿದು. ಇಷ್ಟು ವರ್ಷಗಳಲ್ಲಿ ಒಮ್ಮೆಯೂ ಯಾರೊಬ್ಬರೂ ನನಗೆ 'ಭಾರತಕ್ಕೆ ಹಿಂತಿರುಗಿ' ಎಂದು ಹೇಳಲಿಲ್ಲ. ಬದಲಾಗಿ, ದೊಡ್ಡದಾಗಿ ಕನಸು ಕಾಣಲು ಮತ್ತು ಮುಂಚೂಣಿಯಲ್ಲಿ ನಿಂತು ಆಡಲು ಅದು ನನಗೆ ಮುಕ್ತ ಅವಕಾಶ ನೀಡಿತು. ಪ್ರಪಂಚದ ಬೇರೆಲ್ಲೂ ನಾನು ಇಷ್ಟು ಬೇಗ ಇಷ್ಟೆಲ್ಲಾ ಸಾಧಿಸಲು ಸಾಧ್ಯವಾಗುತ್ತಿರಲಿಲ್ಲ ಎಂದು ನಾನು ಪ್ರಾಮಾಣಿಕವಾಗಿ ನಂಬುತ್ತೇನೆ," ಎಂದು ಅವರು ದುಬೈ ಬಗ್ಗೆ ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ.

ಭಾರತದ ಮೇಲಿನ ತಮ್ಮ ಪ್ರೀತಿಯನ್ನೂ ವ್ಯಕ್ತಪಡಿಸಿದ ಅವರು, "ನಾನು ಹುಟ್ಟಿದ ದೇಶವಾದ ಭಾರತವನ್ನು ನಾನು ಅಪಾರವಾಗಿ ಪ್ರೀತಿಸುತ್ತೇನೆ. ಆದರೆ ಯುಎಇ ನನ್ನನ್ನು ಬೆಳೆಸಿತು, ನನ್ನ ವ್ಯಕ್ತಿತ್ವವನ್ನು ರೂಪಿಸಿತು ಮತ್ತು ಶೂನ್ಯದಲ್ಲಿದ್ದ ನನ್ನನ್ನು ಇಂದು ನಾನು ಹೆಮ್ಮೆಪಡುವಂತಹ ವ್ಯಕ್ತಿಯಾಗಿ ಪರಿವರ್ತಿಸಿತು. ಈ ದೇಶಕ್ಕೆ ನಾನು ಸದಾ ಚಿರಋಣಿ," ಎಂದು ತಮ್ಮ ಪೋಸ್ಟ್ ಮುಕ್ತಾಯಗೊಳಿಸಿದ್ದಾರೆ. ಇದರ ಜೊತೆಗೆ, ದುಬೈನಲ್ಲಿ ಉದ್ಯೋಗ ಪಡೆದದ್ದು, ಕಂಪನಿ ಸ್ಥಾಪಿಸಿದ್ದು, ವಿವಾಹ, ತಾಯ್ತನ ಮತ್ತು ಪ್ರಶಸ್ತಿಗಳನ್ನು ಸ್ವೀಕರಿಸಿದ ತಮ್ಮ ಜೀವನದ ಪ್ರಮುಖ ತುಣುಕುಗಳನ್ನು ಒಳಗೊಂಡ ವಿಡಿಯೋವೊಂದನ್ನು ಸಹ ಅವರು ಹಂಚಿಕೊಂಡಿದ್ದಾರೆ.

ಸಾಮಾಜಿಕ ಜಾಲತಾಣಗಳಲ್ಲಿ ವ್ಯಾಪಕ ಪ್ರತಿಕ್ರಿಯೆ

ರೂಪಾ ಝಾ ಅವರ ಈ ಪೋಸ್ಟ್‌ಗೆ ನೆಟ್ಟಿಗರಿಂದ ಭಾರೀ ಮೆಚ್ಚುಗೆ ವ್ಯಕ್ತವಾಗಿದೆ. "ನಿಜಕ್ಕೂ ನೀವು ಸ್ಫೂರ್ತಿದಾಯಕ ಮಹಿಳೆ ಮತ್ತು ಅದ್ಭುತ ವ್ಯಕ್ತಿತ್ವ" ಎಂದು ಒಬ್ಬರು ಶ್ಲಾಘಿಸಿದರೆ, "ಬ್ಲಾಕ್ ಸ್ವಾನ್ ತಂಡಕ್ಕೆ ನೀವು ದೊಡ್ಡ ಸ್ಫೂರ್ತಿ. ನಿಮ್ಮ ನಾಯಕತ್ವವನ್ನು ನಾವು ಗೌರವಿಸುತ್ತೇವೆ. ನಿಮ್ಮ ಸಮರ್ಪಣಾಭಾವ ನಮ್ಮನ್ನು ಪ್ರತಿದಿನ ಪ್ರೇರೇಪಿಸುತ್ತದೆ," ಎಂದು ಮತ್ತೊಬ್ಬರು ಕಾಮೆಂಟ್ ಮಾಡಿದ್ದಾರೆ. "ನಿಮ್ಮ ಮನಸ್ಥಿತಿ ನಿಮ್ಮ ನೈಜತೆಯನ್ನು ರೂಪಿಸುತ್ತದೆ ಎಂಬುದಕ್ಕೆ ಇದೇ ಸಾಕ್ಷಿ, ಇದು ನಿಜಕ್ಕೂ ಗಮನಾರ್ಹವಾದ ಬೆಳವಣಿಗೆಯ ಕಥೆ" ಎಂದು ನೆಟ್ಟಿಗರು ಕೊಂಡಾಡಿದ್ದಾರೆ.

ಯಾರಿವರು ರೂಪಾ ಝಾ?

ರೂಪಾ ಝಾ ಅವರು 2017ರಲ್ಲಿ 'ಬ್ಲಾಕ್ ಸ್ವಾನ್ ಬ್ಯುಸಿನೆಸ್ ಸೆಟಪ್ ಸರ್ವಿಸಸ್' (Black Swan Business Setup Services) ಎಂಬ ಕಂಪನಿಯನ್ನು ಸ್ಥಾಪಿಸಿದರು. ಪ್ರಸ್ತುತ ಅವರು ಬ್ಲಾಕ್ ಸ್ವಾನ್‌ನ ಮ್ಯಾನೇಜಿಂಗ್ ಪಾರ್ಟ್‌ನರ್ ಆಗಿದ್ದು, ವಿದೇಶದಲ್ಲಿ ತಮ್ಮದೇ ಆದ ಕಂಪನಿಗಳನ್ನು ಪ್ರಾರಂಭಿಸಲು ಬಯಸುವ ಉದ್ಯಮಿಗಳಿಗೆ ಸುಲಭವಾದ ಪರಿಹಾರಗಳನ್ನು ಒದಗಿಸುವ ವೃತ್ತಿಪರರ ತಂಡವನ್ನು ಮುನ್ನಡೆಸುತ್ತಿದ್ದಾರೆ. ಯುಎಇಯ ಅತ್ಯಂತ ಪ್ರಭಾವಶಾಲಿ ಮಹಿಳೆಯರಲ್ಲಿ ಒಬ್ಬರಾಗಿ ಗುರುತಿಸಿಕೊಂಡಿರುವ ಅವರು, 'ಯುಎಇ ವುಮೆನ್ ಅಚೀವರ್ಸ್ ಅವಾರ್ಡ್ಸ್'ನಲ್ಲಿ 2024ರ ಅತ್ಯುತ್ತಮ ಉದ್ಯಮಿ ಪ್ರಶಸ್ತಿಗೆ ನಾಮನಿರ್ದೇಶನಗೊಂಡಿದ್ದರು.

English summary

Indian-origin entrepreneur Rupa Jha credits the UAE for her remarkable journey from zero to a successful business leader, highlighting Dubai's safety, dignity for women, and endless opportunities for expats.