Gold Rate Today: ಜ್ಯುವೆಲ್ಲರಿ ಶಾಪ್‌ಗೆ ಹೋಗೋ ಮುನ್ನ ಈ ಸುದ್ದಿ ಓದಿ; ಚಿನ್ನದ ಬೆಲೆಯಲ್ಲಿ ಟ್ವಿಸ್ಟ್ ಮೇಲೆ ಟ್ವಿಸ್ಟ್

Published: Saturday, July 4, 2026, 11:29 [IST]

ಚಿನ್ನಾಭರಣ ಪ್ರಿಯರಿಗೆ ಇಂದು ಕೊಂಚ ನಿರಾಳತೆಯ ಸುದ್ದಿ ಸಿಕ್ಕಿದೆ. ನಿನ್ನೆ ಶುಕ್ರವಾರದ ಮಾರುಕಟ್ಟೆಯಲ್ಲಿ ಹಳದಿ ಲೋಹದ ಬೆಲೆಯಲ್ಲಿ ಭಾರಿ ಜಿಗಿತ ಕಂಡುಬಂದಿದ್ದ ಬೆನ್ನಲ್ಲೇ, ಇಂದು ಶನಿವಾರದ ವಹಿವಾಟಿನಲ್ಲಿ ಬೆಲೆಗಳು ಕೊಂಚ ಇಳಿಕೆ ಹಾದಿಗೆ ಮರಳಿವೆ. ಬೆಂಗಳೂರಿನ ಇಂದಿನ ಮಾರುಕಟ್ಟೆಯಲ್ಲಿ 24 ಕ್ಯಾರೆಟ್‌ನ ಒಂದು ಗ್ರಾಂ ಶುದ್ಧ ಚಿನ್ನದ ಬೆಲೆ 27 ರೂಪಾಯಿ ಇಳಿಕೆಯಾಗಿದ್ದು, 14,673 ರೂಪಾಯಿ ತಲುಪಿದೆ. ಇನ್ನು 22 ಕ್ಯಾರೆಟ್ ಆಭರಣ ಚಿನ್ನದ ದರ ಪ್ರತಿ ಗ್ರಾಂಗೆ 25 ರೂಪಾಯಿ ಇಳಿಕೆ ಕಂಡು 13,450 ರೂಪಾಯಿಗಳಲ್ಲಿ ವಹಿವಾಟು ನಡೆಸುತ್ತಿದೆ. ಇದರೊಂದಿಗೆ 18 ಕ್ಯಾರೆಟ್ ಚಿನ್ನದ ಬೆಲೆಯೂ ಕೂಡ ಗ್ರಾಂಗೆ 20 ರೂಪಾಯಿ ಇಳಿಕೆಯಾಗಿದ್ದು, 11,005 ರೂಪಾಯಿಗಳಿಗೆ ಬಂದು ತಲುಪಿದೆ.

ನಿನ್ನೆಗಿಂತ ದರ ಎಷ್ಟು ಕಡಿಮೆಯಾಗಿದೆ?

ಸಾಮಾನ್ಯವಾಗಿ ಹಬ್ಬ ಹಾಗೂ ಮದುವೆ ಸೀಸನ್‌ಗಳಲ್ಲಿ ಚಿನ್ನ ಖರೀದಿಸುವವರಿಗೆ ಪವನ್ ಅಥವಾ ಹತ್ತು ಗ್ರಾಂ ಲೆಕ್ಕಾಚಾರ ಮುಖ್ಯವಾಗುತ್ತದೆ. ಇಂದಿನ ದರದ ಅನ್ವಯ ಬೆಂಗಳೂರಿನಲ್ಲಿ ಒಂದು ಪವನ್ ಅಂದರೆ 8 ಗ್ರಾಂ ಆಭರಣ ಚಿನ್ನದ (22 ಕ್ಯಾರೆಟ್) ಬೆಲೆ 200 ರೂಪಾಯಿ ಇಳಿಕೆಯಾಗಿದ್ದು, ಒಟ್ಟು ದರ 1,07,600 ರೂಪಾಯಿಗಳಾಗಿದೆ. ಅದೇ ರೀತಿ 10 ಗ್ರಾಂ ಆಭರಣ ಚಿನ್ನದ ಬೆಲೆ 1,34,500 ರೂಪಾಯಿಗಳಾಗಿದ್ದು, ನಿನ್ನೆಗಿಂತ 250 ರೂಪಾಯಿ ಇಳಿಕೆ ಕಂಡಿದೆ. ಇನ್ನು ಹೂಡಿಕೆದಾರರು ಹೆಚ್ಚಾಗಿ ಇಷ್ಟಪಡುವ 24 ಕ್ಯಾರೆಟ್ ಚಿನ್ನದ 10 ಗ್ರಾಂ ದರ 270 ರೂಪಾಯಿ ಕಮ್ಮಿಯಾಗಿದ್ದು, ಇಂದು ಮಾರುಕಟ್ಟೆಯಲ್ಲಿ 1,46,730 ರೂಪಾಯಿಗಳಿಗೆ ಗ್ರಾಹಕರಿಗೆ ಲಭ್ಯವಾಗುತ್ತಿದೆ. ದೊಡ್ಡ ಮಟ್ಟದಲ್ಲಿ ಅಂದರೆ 100 ಗ್ರಾಂ ಖರೀದಿಸುವವರಿಗೆ ನಿನ್ನೆಗಿಂತ ಬರೋಬ್ಬರಿ 2,500 ರೂಪಾಯಿಗಳವರೆಗೆ ಉಳಿತಾಯವಾಗಲಿದೆ.

ಹಾವು ಏಣಿ ಆಟವಾಡಿದ ದರ

ಕಳೆದ ಹತ್ತು ದಿನಗಳಲ್ಲಿ ಚಿನ್ನದ ದರದಲ್ಲಿ ತೀವ್ರವಾದ ಏರಿಳಿತಗಳು ದಾಖಲಾಗಿವೆ. ವಿಶೇಷವಾಗಿ ಜುಲೈ ತಿಂಗಳ ಆರಂಭದ ದಿನಗಳಲ್ಲಿ ಚಿನ್ನದ ಗ್ರಾಫ್ ದಿಢೀರನೆ ಮೇಲೇರ ತೊಡಗಿತ್ತು. ಜುಲೈ 2 ಮತ್ತು ಜುಲೈ 3ರಂದು ಸತತ ಎರಡು ದಿನಗಳ ಕಾಲ ಪ್ರತಿ ಗ್ರಾಂ ಚಿನ್ನದ ಮೇಲೆ ಅಂದಾಜು 300 ರೂಪಾಯಿಗಳಷ್ಟು ಭಾರಿ ಏರಿಕೆ ಕಂಡುಬಂದಿತ್ತು. ಜೂನ್ ಕೊನೆಯ ವಾರದಲ್ಲಿ 13,000 ರೂಪಾಯಿಗಳ ಆಸುಪಾಸಿನಲ್ಲಿದ್ದ 22 ಕ್ಯಾರೆಟ್ ಚಿನ್ನದ ಬೆಲೆ, ಜುಲೈ 3ರ ವೇಳೆಗೆ 13,475 ರೂಪಾಯಿಗಳ ದಾಖಲೆಯ ಮಟ್ಟ ಮುಟ್ಟಿತ್ತು. ಆದರೆ ಇಂದು ದಾಖಲಾಗಿರುವ ಸಣ್ಣ ಇಳಿಕೆಯು ಸತತ ಏರಿಕೆಯಿಂದ ಕಂಗಾಲಾಗಿದ್ದ ಮಧ್ಯಮ ವರ್ಗದ ಗ್ರಾಹಕರಿಗೆ ಕೊಂಚ ನಿರಾಳ ಮೂಡಿಸಿದೆ.

ಬೆಳ್ಳಿ-ಪ್ಲಾಟಿನಂ ದರ ಹೇಗಿದೆ?

ರಾಜಧಾನಿ ಬೆಂಗಳೂರಿನಲ್ಲಿ ಕೇವಲ ಚಿನ್ನ ಮಾತ್ರವಲ್ಲದೆ, ಬೆಳ್ಳಿ ಮತ್ತು ಪ್ಲಾಟಿನಂ ದರಗಳೂ ಗ್ರಾಹಕರ ಗಮನ ಸೆಳೆಯುತ್ತಿವೆ. ನೀವೇನಾದರೂ ಇಂದು ಮಾರುಕಟ್ಟೆಯಲ್ಲಿ ಬೆಳ್ಳಿ ಆಭರಣಗಳನ್ನು ಅಥವಾ ಅತ್ಯಂತ ದುಬಾರಿ ಪ್ಲಾಟಿನಂ ಲೋಹವನ್ನು ಖರೀದಿಸಲು ಯೋಜಿಸುತ್ತಿದ್ದರೆ, ಇಂದಿನ ಮಾರುಕಟ್ಟೆ ದರಗಳ ವಿವರ ಹೀಗಿದೆ. ಇಂದು ಬೆಂಗಳೂರಿನಲ್ಲಿ ಬೆಳ್ಳಿ ದರವು ಸ್ಥಿರತೆ ಕಾಯ್ದುಕೊಂಡಿದ್ದು, ಪ್ರತಿ ಗ್ರಾಂಗೆ 250 ರೂಪಾಯಿಗಳಂತೆ ಮಾರಾಟವಾಗುತ್ತಿದೆ. ಇಂದಿನ ದರದ ಅನ್ವಯ ಬೆಂಗಳೂರಿನಲ್ಲಿ ಒಂದು ಕಿಲೋಗ್ರಾಂ (1 KG) ಬೆಳ್ಳಿಯ ಬೆಲೆ ಬರೋಬ್ಬರಿ 2,50,000 ರೂಪಾಯಿಗಳಾಗಿದೆ.

ಇತ್ತೀಚಿನ ದಿನಗಳಲ್ಲಿ ಯುವ ಪೀಳಿಗೆಯನ್ನು ಹೆಚ್ಚಾಗಿ ಆಕರ್ಷಿಸುತ್ತಿರುವ ಪ್ಲಾಟಿನಂ (Platinum) ಬೆಲೆಯೂ ಕೂಡ ಹೊಸ ದಾಖಲೆ ಬರೆಯುತ್ತಿದೆ. ಬೆಂಗಳೂರಿನ ಇಂದಿನ ಮಾರುಕಟ್ಟೆಯಲ್ಲಿ ಪ್ರತಿ ಒಂದು ಗ್ರಾಂ ಪ್ಲಾಟಿನಂ ದರ 5,013 ರೂಪಾಯಿಗಳಾಗಿದೆ. ಇನ್ನು ಆಭರಣ ಪ್ರಿಯರು ಹೆಚ್ಚಾಗಿ ಇಷ್ಟಪಡುವ 10 ಗ್ರಾಂ ಪ್ಲಾಟಿನಂ ಖರೀದಿಸಬೇಕಾದರೆ ಇಂದು ಗ್ರಾಹಕರು 50,130 ರೂಪಾಯಿಗಳನ್ನು ಪಾವತಿಸಬೇಕು. ಚಿನ್ನಕ್ಕೆ ಪರ್ಯಾಯವಾಗಿ ಐಷಾರಾಮಿ ಲುಕ್ ಕೊಡುವ ಪ್ಲಾಟಿನಂ ಆಭರಣಗಳಿಗೆ ಐಟಿ ಹಬ್ ಬೆಂಗಳೂರಿನಲ್ಲಿ ಇತ್ತೀಚೆಗೆ ಬೇಡಿಕೆ ಹೆಚ್ಚಾಗಿದೆ.

ಆದರೆ, ಚಿನ್ನದ ನಿಯಮದಂತೆಯೇ ಬೆಳ್ಳಿ ಮತ್ತು ಪ್ಲಾಟಿನಂ ಖರೀದಿಸುವಾಗಲೂ ಗ್ರಾಹಕರು ಕೆಲವು ತೆರಿಗೆಗಳ ಬಗ್ಗೆ ಜಾಗರೂಕರಾಗಿರಬೇಕು. ಇಲ್ಲಿ ಉಲ್ಲೇಖಿಸಿರುವ ದರಗಳು ಮಾರುಕಟ್ಟೆಯ ಮೂಲ ಬೆಲೆಗಳಾಗಿದ್ದು, ಇವುಗಳ ಮೇಲೆ ಹೆಚ್ಚುವರಿಯಾಗಿ ಶೇಕಡಾ 3 ರಷ್ಟು ಜಿಎಸ್‌ಟಿ (GST) ಮತ್ತು ಶೋರೂಮ್‌ಗಳ ಮೇಕಿಂಗ್ ಚಾರ್ಜಸ್ (ತಯಾರಿಕಾ ವೆಚ್ಚ) ಅನ್ವಯವಾಗುತ್ತವೆ. ಆದ್ದರಿಂದ ಯಾವುದೇ ಆಭರಣ ಮಳಿಗೆಗೆ ಭೇಟಿ ನೀಡುವ ಮುನ್ನ ಇಂದಿನ ಅಂತಿಮ ದರವನ್ನು ಪಕ್ಕಾ ಮಾಡಿಕೊಳ್ಳುವುದು ಉತ್ತಮ.

Published On July 4, 2026