ಮಹಿಳೆಯ ಮೇಲೆ ಗಂಡನ ಸಂಬಂಧಿಕರಿಂದ ಅತ್ಯಾಚಾರ

ಬಟಲ (ಪಂಜಾಬ್), ಜೂ.26: ದಂಪತಿಗಳಿಗೆ ಮತ್ತು ಪಾನೀಯ ನೀಡಿ ಪ್ರಜ್ಞೆ ತಪ್ಪಿಸಿ 24 ವರ್ಷದ ಮಹಿಳೆಯ ಮೇಲೆ ಗಂಡನ ನಾಲ್ಕು ಮಂದಿ ಸಂಬಂಧಿಕರು ಸಾಮೂಹಿಕ ಅತ್ಯಾಚಾರ ಮಾಡಿದ ಘಟನೆ ಲೂಧಿಯಾನದಲ್ಲಿ ನಡೆದಿದೆ. ಅಮೃತಸರದಲ್ಲಿ ಜೂ.20ರಂದು ಮದುವೆ ಕಾರ್ಯಕ್ರಮಕ್ಕೆ ತಮ್ಮ ಗಂಡನ ಜೊತೆ ತೆರಳಿದ್ದಾಗ ಈ ಘಟನೆ ನಡೆದಿದೆ ಎಂದು ಅತ್ಯಾಚಾರಕ್ಕೆ ಒಳಗಾದ ಮಹಿಳೆ ದೂರಿನಲ್ಲಿ ತಿಳಿಸಿದ್ದಾರೆ.

ಮದುವೆ ಮುಗಿದ ಬಳಿಕ ತಮ್ಮ ಗಂಡನ ಇಬ್ಬರು ಸೋದರ ಸಂಬಂಧಿಗಳು ಅಮೃತಸರದ ಬಸ್ ನಿಲ್ದಾಣಕ್ಕೆ ಬಿಡುವುದಾಗಿ ಹೇಳಿದರು. ಕಾರಿನಲ್ಲಿ ಕರೆದೊಯ್ದ ಅವರು ದಾಬಾವೊಂದರ ಬಳಿ ನಿಲ್ಲಿಸಿ ಪಾನೀಯ ತೆಗೆದುಕೊಳ್ಳುವಂತೆ ಬಲವಂತ ಮಾಡಿದರು. ಅದೇ ಸಮಯದಲ್ಲಿ ದಾಬಾ ಬಳಿಗೆ ಮತ್ತಿಬ್ಬರು ಬಂದರು.

ಮತ್ತು ಪಾನೀಯ ಕುಡಿದ ದಂಪತಿಗಳು ಪ್ರಜ್ಞೆ ತಪ್ಪಿದ್ದಾರೆ. ಬಳಿಕ ಈ ನಾಲ್ಕು ಮಂದಿ ಸೇರಿ ದಂಪತಿಗಳನ್ನು ಥಾಥರಿ ಗೇಟ್ ಪ್ರದೇಶದ ಮನೆಯೊಂದಕ್ಕೆ ಸಾಗಿಸಿ ಸಾಮೂಹಿಕ ಅತ್ಯಾಚಾರವೆಸಗಿದ್ದಾರೆ ಎಂದು ಆಕೆ ದೂರಿನಲ್ಲಿ ತಿಳಿಸಿದ್ದಾರೆ. ಬೆಳಗ್ಗೆ ಎದ್ದು ನೋಡಿದಾಗ ಆಕೆಯ ಗಂಡ ಮತ್ತೊಂದು ಕೊಠಡಿಯಲ್ಲಿ ಪ್ರಜ್ಞೆ ತಪ್ಪಿ ಬಿದ್ದಿದ್ದರು.

ಬಳಿಕ ಈ ದಂಪತಿಗಳು ಲೂಧಿಯಾನ ಪೊಲೀಸ್ ಠಾಣೆಗೆ ತೆರಳಿ ದೂರು ನೀಡಿದ್ದಾರೆ. ಆದರೆ ಈ ಘಟನೆ ಬಟಲ ಪೊಲೀಸ್ ಠಾಣಾ ವ್ಯಾಪ್ತಿಯಲ್ಲಿ ನಡೆದಿರುವ ಕಾರಣ ಲೂಧಿಯಾನ ಪೊಲೀಸರು ದೂರನ್ನು ದಾಖಲಿಸಿಕೊಳ್ಳಲು ನಿರಾಕರಿಸಿದ್ದಾರೆ.