ಪಾಕ್ ನಲ್ಲಿ ಗೂಗಲ್, ಯಾಹೂ, ಯೂ ಟ್ಯೂಬ್ ನಿಷೇಧ

ಇಸ್ಲಾಮಾಬಾದ್, ಜೂ.24: ಧರ್ಮ ನಿಂದನೆ ಮಾಡಲಾಗಿದೆ ಎಂದು ಆರೋಪಿಸಿ ಗೂಗಲ್, ಹಾಟ್ ಮೇಲ್ ಸೇರಿದಂತೆ ಒಟ್ಟು ಒಂಭತ್ತು ವೈಬ್ ಸೈಟ್ ಗಳನ್ನು ಪಾಕಿಸ್ತಾನದಲ್ಲಿ ನಿಷೇಧಿಸಲಾಗಿದೆ. ಆದರೆ ಈ ಬಗ್ಗೆ ತಮಗೆ ಯಾವುದೇ ಮಾಹಿತಿ ಲಭ್ಯವಾಗಿಲ್ಲ ಎಂದು ವೈಬ್ ಸೈಟ್ ಗಳು ತಿಳಿಸಿವೆ.

ಪಾಕಿಸ್ತಾನದ ದೂರಸಂಪರ್ಕ ಪ್ರಾಧಿಕಾರಕ್ಕೆ ಲಾಹೋರ್ ಹೈಕೋರ್ಟ್ ನ ಬಹವಲ್ ಪುರ ನ್ಯಾಯಪೀಠ ಈ ವೆಬ್ ಸೈಟ್ ಗಳನ್ನು ನಿಷೇಧಿಸುವಂತೆ ಆದೇಶಿಸಿದೆ ಎಂದು ಪಾಕಿಸ್ತಾನದ ಮಾಧ್ಯಮಗಳು ವರದಿ ಮಾಡಿವೆ. ಗೂಗಲ್, ಯಾಹೂ, ಎಂಎಸ್ ಎನ್, ಹಾಟ್ ಮೇಲ್, ಯೂ ಟ್ಯೂಬ್, ಬಿಂಗ್ ಹಾಗೂ ಅಮೆಜಾನ್ ಸೇರಿದಂತೆ ಒಟ್ಟು ಒಂಭತ್ತು ವೆಬ್ ಸೈಟ್ ಗಳನ್ನು ನಿಷೇಧಿಸಲಾಗಿದೆ.

ಈ ವೆಬ್ ಸೈಟ್ ಗಳು ಧರ್ಮ ನಿಂದನೆ ಹಾಗೂ ಅಲ್ಲಾ ಬಗ್ಗೆ ಅಪಚಾರವೆಸಗಿವೆ ಎಂದು ಆರೋಪಿಸಿ ಮಹಮ್ಮದ್ ಸಿದ್ದಿಕ್ ಎಂಬುವವರು ನ್ಯಾಯಾಲಕ್ಕ್ಕೆ ಅರ್ಜಿ ಸಲ್ಲಿಸಿದ್ದರು. ವಿಚಾರಣೆ ನಡೆಸಿದ ನ್ಯಾಯಮೂರ್ತಿ ಮಜರ್ ಇಕ್ಬಾಲ್ ಸಿಧು ಅವರಿದ್ದ ನ್ಯಾಯಪೀಠ ಈ ಆದೇಶವನ್ನು ಹೊರಡಿಸಿದೆ.

ಖುರಾನ್ ಬಗ್ಗೆಯೂ ಇಲ್ಲಸಲ್ಲದ ಮಾಹಿತಿಗಳು ಈ ವೆಬ್ ಸೈಟ್ ಗಳಲ್ಲಿವೆ ಎಂದು ಸಿದ್ಧಿಕ್ ದೂರಿನಲ್ಲಿ ಆರೋಪಿಸಿದ್ದರು. ಪಾಕಿಸ್ತಾನದ ದೂರಸಂಪರ್ಕ ಪ್ರಾಧಿಕಾರದ ಅಧ್ಯಕ್ಷರು ಜೂ.28ರಂದು ಸಂಬಂಧಪಟ್ಟ ದಾಖಲೆಗಳೊಂದಿಗೆ ನ್ಯಾಯಾಲಯಕ್ಕೆ ಹಾಜರಾಗಬೇಕು ಎಂದು ನ್ಯಾಯಮೂರ್ತಿ ಇಕ್ಬಾರ್ ಆದೇಶಿಸಿದ್ದಾರೆ.