ಧಾಬೋಲ್-ಬಿಡದಿ ಅನಿಲ ಕೊಳವೆ ಮಾರ್ಗ

ನವದೆಹಲಿ, ಜೂ. 7: ಗ್ಯಾಸ್ ಅಥಾರಿಟಿ ಆಫ್ ಇಂಡಿಯಾ (GAIL) 800ಕಿಮೀ ಉದ್ದದ ಧಾಬೋಲ್-ಬಿಡದಿ ಅನಿಲ ಕೊಳವೆ ಮಾರ್ಗದ ಕಾಮಗಾರಿಯನ್ನು ಇದೇ ಜುಲೈನಲ್ಲಿ ಆರಂಭಿಸುತ್ತಿದೆ. ಈ ಕೊಳವೆ ಮಾರ್ಗ ನಿರ್ಮಾಣಕ್ಕೆ ರಾಜ್ಯ ಸರ್ಕಾರದೊಂದಿಗೆ ಗೇಲ್ ಒಪ್ಪಂದ ಮಾಡಿಕೊಂಡಿದ್ದು ಇದಕ್ಕಾಗಿ 2,000 ಕೋಟಿ ರುಪಾಯಿಗಳನ್ನು ಹೂಡಿಕೆ ಮಾಡಲಿದೆ ಎಂದು ಕಂಪನಿಯ ಹಿರಿಯ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.

ಸುದ್ದಿಗಾರರೊಂದಿಗೆ ಮಾತನಾಡಿದ ಕಂಪನಿಯ ಹಿರಿಯ ಅಧಿಕಾರಿ ಪ್ರಭಾತ್ ಸಿಂಗ್ ಅವರು ನಿರ್ಮಾಣಕ್ಕಾಗಿ ಕಂಪನಿ ಬೆಂಗಳೂರಿನಲ್ಲಿ ಕಚೇರಿಯನ್ನು ತೆರೆದಿದ್ದು 60 ನೌಕರರನ್ನು ನೇಮಕ ಮಾಡಿಕೊಂಡಿದೆ. ಧಾಬೋಲ್-ಬಿಡದಿ ಕೊಳವೆ ಮಾರ್ಗ ಹಾದು ಹೋಗುವ ಹತ್ತು ಕಡೆಗಳಲ್ಲಿ ಕೆಲಸ ಆರಂಭವಾಗಲಿದ್ದು 2012ರವೇಳೆಗೆ ಸಿದ್ಧವಾಗಲಿದೆ. ಈ ಕೆಲಸದ ಟೆಂಡರ್ ಪ್ರಕ್ರಿಯೆ ಮುಗಿಯುವ ಹಂತದಲ್ಲಿದ್ದು ಯೋಜನೆಯ ಒಟ್ಟು ವೆಚ್ಚ 5,000 ಕೋಟಿ ರುಪಾಯಿಗಳಾಗಲಿವೆ ಎಂದೂ ಅವರು ಹೇಳಿದ್ದಾರೆ.

ದೃವೀಕೃತ ನೈಸರ್ಗಿಕ ಅನಿಲವನ್ನು ವಿದೇಶಗಳಿಂದ ಆಮದು ಮಾಡಿಕೊಂಡು ಉನ್ನತ ಒತ್ತಡದ ಕೊಳವೆ ಮಾರ್ಗದ ಮೂಲಕ ವಿವಿಧ ಪ್ರದೇಶಗಳಿಗೆ ಸಾಗಾಟ ಮಾಡಲಾಗುವುದು. ಈ ಯೋಜನೆಗೆ ಕರ್ನಾಟಕ ರಾಜ್ಯ ಕೈಗಾರಿಕಾ ಹೂಡಿಕೆ ಮತ್ತು ಅಭಿವೃದ್ದಿ ನಿಗಮ ನೋಡಲ್ ಏಜೆನ್ಸಿಯಾಗಲಿದ್ದು ಈ ಕೊಳವೆ ಮಾರ್ಗದಿಂದ ವಿವಿಧ ನಗರಗಳ ಅನಿಲ ಪೂರೈಕೆ ಯೋಜನೆಗಳಿಗೆ ಅನಿಲ ಒದಗಿಸಲಾಗುತ್ತದೆ.

ಈ ಕೊಳವೆ ಮಾರ್ಗದಿಂದ ಕೃಷ್ಣ ಗೋದಾವರಿ ನಿಕ್ಷೇಪದ ಅನಿಲವನ್ನೂ ಕೊಳವೆ ಮಾರ್ಗಕ್ಕೆ ಸಂಪರ್ಕ ಕಲ್ಪಿಸಬಹುದಾಗಿದೆ. ಗೇಲ್ ಕಂಪನಿಯು ದೇಶದಲ್ಲಿ ಒಟ್ಟು 7,000 ಕಿಲೋ ಮೀಟರ್ ಉದ್ದದ ಅನಿಲ ಕೊಳವೆ ಮಾರ್ಗವನ್ನು ನಿರ್ವಹಣೆ ಮಾಡುತಿದ್ದು ಇನ್ನೂ 6 ಬಿಲಿಯನ್ ಡಾಲರ್ ಹೂಡಿಕೆ ಮೂಲಕ 5,000 ಕಿಲೋಮೀಟರ್ ಹೆಚ್ಚುವರಿ ಕೊಳವೆ ಮಾರ್ಗವನ್ನು ಅಳವಡಿಸಲು ಯೋಜನೆ ಹಾಕಿಕೊಂಡಿದೆ. ಇದರಲ್ಲಿ ಅರ್ಧ ಅಂದರೆ 2500 ಕಿಲೋಮೀಟರ್ ಕೊಳವೆ ಮಾರ್ಗವನ್ನು ಕರ್ನಾಟಕದಲ್ಲೆ ನಿರ್ಮಿಸಲಾಗುತ್ತದೆ.