ಟಾಟಾ : 2012ಕ್ಕೆ ಮತ್ತೊಂದು ಸಣ್ಣ ಕಾರು

ನವದೆಹಲಿ, ಏ. 25 : ದೇಶದ ಅತೀ ದೊಡ್ಡ ವಾಹನ ತಯಾರಿಕಾ ಕಂಪನಿ ಟಾಟಾ ಮೋಟಾರ್ಸ್ 2012 ಕ್ಕೆ 800 ಸಿಸಿ ಸಾಮರ್ಥ್ಯದ ಸಣ್ಣ ಕಾರನ್ನು ಮಾರುಕಟ್ಟೆಗೆ ಬಿಡುಗಡೆ ಮಾಡಲಿದೆ ಎಂದು ಮೂಲಗಳು ತಿಳಿಸಿವೆ.

ಈ ಕಾರು ನ್ಯಾನೊ ಮತ್ತು ಇಂಡಿಕಾ ಕಾರುಗಳ ನಡುವಿನ ಅಂತರವನ್ನು ತುಂಬಲಿದೆ ಎಂದು ಹೇಳಲಾಗಿದ್ದು , ಕಂಪನಿ ಮುಂದಿನ 18 ರಿಂದ 24 ತಿಂಗಳುಗಳಲ್ಲಿ ಇದನ್ನು ಬಿಡುಗಡೆ ಮಾಡಲು ಸಿದ್ದತೆ ನಡೆಸಿದ್ದು ಇದಕ್ಕೆ ಡಾಲ್ಫಿನ್ ಎಂದು ಹೆಸರಿಸಲಾಗಿದೆ. ಮೂಲಗಳ ಪ್ರಕಾರ ಈ ಕಾರು 800 ಅಥವಾ 1000 ಸಿಸಿ ಸಾಮರ್ಥ್ಯದ ಎಂಜಿನ್ ಹೊಂದಿದ್ದು, ಮಾರುತಿಯ ವ್ಯಾಗನ್ ಆರ್ ಮತ್ತು ಹ್ಯುಂಡೈ ಐ10 ಕಾರಿಗೆ ಸ್ಪರ್ದಿಯಾಗಲಿದೆ. ಈ ಕಾರಿನ ಬೆಲೆ ರೂ 3.5 ಲಕ್ಷ ರೂಪಾಯಿಗಳಾಗಲಿವೆ ಎನ್ನಲಾಗಿದ್ದು ಈ ಕುರಿತು ಪ್ರತಿಕ್ರಿಯಿಸಲು ಟಾಟಾ ದ ವಕ್ತಾರರು ನಿರಾಕರಿಸಿದ್ದಾರೆ.

ಟಾಟಾ ದ ಹೊಸ ಕಾರು ಏ2 ಶ್ರೇಣಿಯದಾಗಿದ್ದು, ಪ್ರಸ್ತುತ ದೇಶದ ಪ್ರಯಾಣಿಕರ ಕಾರುಗಳ ಮಾರಾಟದಲ್ಲಿ ಏ2 ಶ್ರೇಣಿ ಯ ಪಾಲು ಶೇ 70 ಇದ್ದು ದೇಶದ ವಿವಿಧ ವಾಹನ ತಯಾರಕರು ಸುಮಾರು 20 ಮಾದರಿಗಳನ್ನು ಬಿಡುಗಡೆ ಮಾಡಿದ್ದಾರೆ. ಇವುಗಳಲ್ಲಿ ಮಾರುತಿ ಸುಜುಕಿ ಅಗ್ರ ಸ್ಥಾನ ಹೊಂದಿದೆ. ಏ2 ಶ್ರೇಣಿಯಲ್ಲಿ ಮಾರುತಿ ತನ್ನ 800 ಹಾಗೂ ಆಲ್ಟೋ ಕಾರುಗಳನ್ನು ಮಾರುಕಟ್ಟೆಯಿಂದ ಹಿಂಪಡೆದಿದೆ.