ಭಾರತ ಪಾಕ್ ಜೋಡಿಗೆ ಡಬಲ್ಸ್ ಖುಷಿ

ಜೊಹಾನ್ಸ್‌ಬರ್ಗ್‌, ಫೆ. 8:ಭಾರತದ ರೋಹನ್ ಬೋಪಣ್ಣ ಹಾಗೂ ಪಾಕಿಸ್ತಾನದ ಐಸಾಮುಲ್-ಹಕ್- ಖುರೇಷಿ ಜೋಡಿ ಜೊಹಾನ್ಸ್‌ಬರ್ಗ್‌ನಲ್ಲಿ ಮುಕ್ತಾಯಗೊಂಡ ದಕ್ಷಿಣ ಆಫ್ರಿಕಾ ಎಟಿಪಿ ಟೆನಿಸ್ ಟೂರ್ನಿಯ ಪುರುಷರ ಡಬಲ್ಸ್ ಪ್ರಶಸ್ತಿ ಮುಡಿಗೇರಿಸಿಕೊಂಡಿದೆ.

ಬೋಪಣ್ಣ- ಖುರೇಷಿಗೆ ಇದು ಮೊದಲ ಡಬಲ್ಸ್ ಪ್ರಶಸ್ತಿಯಾಗಿದೆ. ಭಾನುವಾರ ನಡೆದ ಫೈನಲ್ ಪಂದ್ಯದಲ್ಲಿ ಬೋಪಣ್ಣ- ಖುರೇಷಿ 2-6,6-3, 10-5 ಸೆಟ್‌ಗಳಿಂದ ಸ್ಲೊವೆಕಿಯಾದ ಕೆರೊಲ್ ಬೆಕ್ ಮತ್ತು ಇಸ್ರೇಲ್‌ನ ಹೆರೊಲ್ಡ್ ಲೆವೈ ಜೋಡಿಯನ್ನು ಮಣಿಸಿ ಪ್ರಶಸ್ತಿ ಬಾಚಿಕೊಂಡಿತು. 2007 (ಮುಂಬಯಿ) ಹಾಗೂ 2008ರಲ್ಲಿ (ನ್ಯೂಪೋರ್ಟ್) ಫೈನಲ್ ತಲುಪಿದ ಈ ಜೋಡಿ ಪ್ರಶಸ್ತಿ ಗೆಲ್ಲುವಲ್ಲಿ ವಿಫಲವಾಗಿತ್ತು.

ಬೋಪಣ್ಣ ಪಾಲಿಗೆ ಇದು ಎರಡನೇ ಎಟಿಪಿ ಪ್ರಶಸ್ತಿಯಾಗಿದೆ. 2008ರಲ್ಲಿ ಅಮೆರಿಕದ ಎರಿಕ್ ಬುಟರೆಕ್ ಅವರೊಂದಿಗೆ ಪ್ರಶಸ್ತಿ ಎಲ್‌ಎ ಓಪನ್ ಪ್ರಶಸ್ತಿ ಗೆದ್ದುಕೊಂಡಿದ್ದರು. ಮೊದಲ ಸೆಟ್‌ನಲ್ಲಿ ಹಿನ್ನಡೆ ಅನುಭವಿಸಿದರೂ ಎದೆಗುಂದದ ಬೋಪಣ್ಣ-ಖುರೇಷಿ ಎರಡನೇ ಸೆಟ್ ವಶಪಡಿಸಿಕೊಳ್ಳುವ ಮೂಲಕ ತಿರುಗೇಟು ನೀಡಿದರು. ಆದ್ದರಿಂದ ನಿರ್ಣಾಯಕ ಮೂರನೇ ಸೆಟ್ ರೋಚಕತೆ ಪಡೆಯಿತು. ಕೊನೆಗೂ 10-5ರಿಂದ ಗೆದ್ದ ಭಾರತ- ಪಾಕ್ ಜೋಡಿ ವಿಜಯೋತ್ಸವ ಆಚರಿಸಿತು.