ಇಂಟರ್ ನೆಟ್ ಗೆ ಸಿಗುವುದೇ ನೊಬೆಲ್ ಶಾಂತಿ ಪ್ರಶಸ್ತಿ?

ಬೆಂಗಳೂರು, ಫೆ. 4: ಇಡೀ ವಿಶ್ವವನ್ನು ತನ್ನ ಜಾಲದ ಮೂಲಕ ಆವರಿಸಿರುವ ಇಂಟರ್ ನೆಟ್ ಅನ್ನು 2010 ರ ನೊಬೆಲ್ ಶಾಂತಿ ಪ್ರಶಸ್ತಿಗೆ ಹೆಸರಿಸಲಾಗಿದೆ. ಪ್ರಶಸ್ತಿಗೆ ಅಂತರ್ಜಾಲದ ಹೆಸರನ್ನು ಇಟಲಿಯ ಪ್ರಸಿದ್ಧ ವೈರ್ಡ್ ಮ್ಯಾಗಜೀನ್ ಸೂಚಿಸಿದೆ. ಇಂಟರ್ ನೆಟ್ ಅನ್ನು ಶಾಂತಿದೂತ ಎಂದು ಬಿಂಬಿಸಲಾಗಿದೆ.

ನವೆಂಬರ್ 29, 2009 ರ ಆವೃತ್ತಿಯ ವೈರ್ಡ್ ಮ್ಯಾಗಜೀನ್ ನಲ್ಲಿ 'Wired Backs Internet for Nobel Peace Prize' ಎಂಬ ಶೀರ್ಷಿಕೆಯಡಿಯಲ್ಲಿ ಇಂಟರ್ ನೆಟ್ ನ ಪೂರ್ವಾಪರ, ಸುದ್ದಿ, ಮನರಂಜನೆ, ಆಟೋಟ, ವೈದ್ಯಕೀಯ ಹೀಗೆ ವಿವಿಧ ರಂಗದ ಅನೇಕಾನಕ ಮಾಹಿತಿ ನೀಡಿ ಯುವ ಜನಾಂಗದ ಅಭ್ಯುದಯಕ್ಕೆ ಕಾರಣವಾಗಿದೆ. ಆಲ್ಲದೆ ಹಿರಿಯ ನಾಗರೀಕರಿಗೂ ಇಂದು ಒಂದರ್ಥದಲ್ಲಿ ಗೆಳೆಯನಾಗಿ ರೂಪಾಂತರವಾಗಿದೆ ಎಂದು ಪತ್ರಿಕೆ ಹೇಳಿದೆ. ಈ ವರದಿಯನ್ನು ಸಮರ್ಥಿಸಿ 2003ರ ನೊಬೆಲ್ ಪ್ರಶಸ್ತಿ ವಿಜೇತ ಶಿರಿನ್ ಇಬಾಡಿ ಮತ್ತು ಇಟಲಿಯ ಖ್ಯಾತ ಸ್ತನ ಕ್ಯಾನ್ಸರ್ ತಜ್ಞ ಉಂಬರ್ಟೋ ವೆರೋನೆಸಿ ಕೂಡ ಧ್ವನಿಗೂಡಿಸಿದ್ದಾರೆ.

ಇಂಟರ್ ನೆಟ್ ನ ದುಷ್ಪರಿಣಾಮಗಳಿದ್ದರೂ ಯುದ್ಧಭೂಮಿ, ನೈಸರ್ಗಿಕ ವಿಪತ್ತು ನಿರ್ವಹಣೆಯಲ್ಲಿ ಅಂತರ್ಜಾಲ ಬಹುಮುಖ್ಯ ಪಾತ್ರ ವಹಿಸುತ್ತದೆ.ವಿಶ್ವದ ಏಕೈಕ ಶಾಂತಿಯುತ ಮಾಧ್ಯಮ ಇದಾಗಿದೆ ಎಂದು ಪತ್ರಿಕೆ ಹೇಳಿದೆ. 2009ರಲ್ಲಿ ಅಮೆರಿಕದ ಹಾಲಿ ಅಧ್ಯಕ್ಷ ಬರಾಕ್ ಒಬಾಮಾ ಅವರಿಗೆ ಪ್ರತಿಷ್ಠಿತ ನೊಬೆಲ್ ಶಾಂತಿ ಪುರಸ್ಕಾರ ಲಭಿಸಿತ್ತು. ಹಾಗೂ ಆಯ್ಕೆ ಕುರಿತು ಸಾಕಷ್ಟು ಚರ್ಚೆಗೀಡಾಗಿತ್ತು. ಈ ಬಾರಿಯ ವಿಜೇತರ ಹೆಸರನ್ನು ಅಕ್ಟೋಬರ್ ತಿಂಗಳಲ್ಲಿ ಘೋಷಣೆ ಮಾಡಲಾಗುತ್ತದೆ.