ಡೇವಿಸ್ ಕಪ್, ವಿಶ್ವ ಗುಂಪಿನಲ್ಲಿ ಭಾರತ

ಜೋಹಾನ್ಸ್ ಬರ್ಗ್, ಸೆ 21 : ಹನ್ನೊಂದು ವರ್ಷಗಳ ಸುಧೀರ್ಘ ಅವಧಿಯ ನಂತರ ಭಾರತ, ವಿಶ್ವ ಡೇವಿಸ್ ಕಪ್ ಗುಂಪಿಗೆ ಅರ್ಹತೆಯನ್ನು ಪಡೆದುಕೊಂಡಿದೆ. ಕೊನೆಯ ಎರಡೂ ರಿವರ್ಸ್ ಪಂದ್ಯಗಳನ್ನು ಸೋಮದೇವ್ ಮತ್ತು ಯೂಕಿ ಭಾಂಬ್ರಿ ಗೆಲ್ಲುವ ಮೂಲಕ ಭಾರತ ದಕ್ಷಿಣ ಆಫ್ರಿಕಾದ ವಿರುದ್ಧ 4-1ರ ಅಂತರದಲ್ಲಿ ಜಯಗಳಿಸಿತು.

ಭಾನುವಾರ (ಸೆ 20 ) ನಡೆದ ಮೊದಲ ರಿವರ್ಸ್ ಸಿಂಗಲ್ಸ್ ಪಂದ್ಯದಲ್ಲಿ ಸೋಮದೇವ್, ದಕ್ಷಿಣ ಆಫ್ರಿಕಾದ ಕಿಕ್ ಡೇ ವೋಸ್ಟ್‌ರನ್ನು 3-6, 6-7, 7-6, 6-2, 6-4 ಸೆಟ್ ನಲ್ಲಿ ಮಣಿಸಿದರು. ಇನ್ನೊಂದು ಸಿಂಗಲ್ಸ್ ಪಂದ್ಯದಲ್ಲಿ ಯೂಕಿ ಭಾಂಬ್ರಿ, ದಕ್ಷಿಣಆಫ್ರಿಕಾದ ಇಜಾಕ್ ವ್ಯಾನ್‌ಡರ್ ಮೆರ್ವೆರನ್ನು 3-6, 6-3, 6-4 ಸೆಟ್ ನಲ್ಲಿ ಸೋಲಿಸಿ ವಿಜಯದ ಅಂತರವನ್ನು 4-1ಕ್ಕೆ ಏರಿಸಿದರು.

ಈ ಮೊದಲು ಸಿಂಗಲ್ಸ್ ನ ಎರಡೂ ಪಂದ್ಯಗಳಲ್ಲಿ ಭಾರತ ಜಯ ಸಾಧಿಸಿತ್ತು. ಆದರೆ ಡಬಲ್ಸ್ ನಲ್ಲಿ ಭೂಪತಿ ಗಾಯಗೊಂಡು ಹಿಂದೆ ಸರಿದಿದ್ದರಿಂದ ರಿವರ್ಸ್ ಸಿಂಗಲ್ಸ್‌ನಲ್ಲಿ ಭಾರತ ಗೆಲ್ಲಲೇ ಬೇಕಾದ ಅನಿವಾರ್ಯತೆ ಎದುರಿಸಿತ್ತು. ಭಾರತ 1998ರಲ್ಲಿ ಎಲೈಟ್ ವಿಶ್ವ ಗುಂಪಿನ ಡೇವಿಸ್ ಕಪ್ ಟೆನಿಸ್ ಟೂರ್ನಿಯ ಹದಿನಾರರ ಹಂತದಲ್ಲಿ ಆಡಿತ್ತು. ಆಗ ಇಟಲಿಯ ಎದುರು 1-4ರಲ್ಲಿ ಸೋಲು ಕಂಡಿತ್ತು. ಈ ಮೊದಲು ಮೂರು ಬಾರಿ ವಿಶ್ವಗುಂಪಿನ ಫೈನಲ್ ತಲುಪಿದ್ದ ಭಾರತ ಮೂರರಲ್ಲೂ ರನ್ನರ್ ಅಪ್ ಆಗಿತ್ತು.

(ದಟ್ಸ್ ಕನ್ನಡ ಕ್ರೀಡಾವಾರ್ತೆ)