ಬಳ್ಳಾರಿ ಜಿಲ್ಲೆಯಲ್ಲಿ ಮಳೆಯಿಂದ ಭಾರಿ ಹಾನಿ

ಬಳ್ಳಾರಿ, ಸೆ. 17 : ಜಿಲ್ಲೆಯಲ್ಲಿ ಭಾನುವಾರ ಮತ್ತು ಸೋಮವಾರ ಸುರಿದ ಭಾರಿ ಮಳೆ ಸೇರಿದಂತೆ ಈವರೆಗೆ ಮುಂಗಾರಿನಲ್ಲಿ ಒಟ್ಟು 3873 ಮನೆಗಳಿಗೆ ಭಾಗಶ: ಮತ್ತು ಪೂರ್ಣ ಹಾನಿಯಾಗಿದ್ದು, ಇದರಿಂದ 1.15 ಕೋಟಿ ನಷ್ಟವಾಗಿರುತ್ತದೆ ಎಂದು ಜಿಲ್ಲಾಡಳಿತ ತಿಳಿಸಿದೆ.

ತಾಲೂಕುವಾರು ಮನೆಗಳ ಹಾನಿ ಇಂತಿದ್ದು, ಬಳ್ಳಾರಿ-1504(53.3 ಲಕ್ಷ), ಸಂಡೂರು-107(2.19 ಲಕ್ಷ), ಹೊಸಪೇಟೆ-204(4.08 ಲಕ್ಷ), ಸಿರುಗುಪ್ಪ-690(19.71 ಲಕ್ಷ), ಹಡಗಲಿ-125(2.50 ಲಕ್ಷ), ಹಗರಿಬೊಮ್ಮನಹಳ್ಳಿ-618(20.86 ಲಕ್ಷ), ಕೂಡ್ಲಿಗಿ-625(12.50 ಲಕ್ಷ). ಅಲ್ಲದೆ ಈವರೆಗೆ 2079 ಹೆಕ್ಟೇರ್ ಪ್ರದೇಶದಲ್ಲಿ ಬೆಳೆಹಾನಿ, 558 ಜಾನುವಾರು ಮತ್ತು 6 ಜೀವಹಾನಿಯಾಗಿರುತ್ತದೆ ಮತ್ತು 1.56 ಕೋಟಿ ರೂ.ಗಳ ಮೂಲಭೂತ ಸೌಕರ್ಯ ಹಾನಿಯಾಗಿರುತ್ತದೆ.

ಈ ಎಲ್ಲಾ ಹಾನಿಗಳಿಂದ ಒಟ್ಟು 3.70 ಕೋಟಿ ರೂ. ನಷ್ಟ ಉಂಟಾಗಿರುತ್ತದೆ. ಕೂಡ್ಲಿಗಿಯಲ್ಲಿ 3, ಕೊಟ್ಟೂರು, ಬೇವೂರು, ಹಗರಿಬೊಮ್ಮನಹಳ್ಳಿ ತಾಲೂಕಿನ ಕುಡಿತಿನಿ, ಸಂಗಮೇಶ್ವರ ಮತ್ತು ಅಂಬಳಿ ಗ್ರಾಮಗಳಲ್ಲಿ ತಲಾ ಒಂದು ಗಂಜಿ ಕೇಂದ್ರವನ್ನು ಪ್ರಾರಂಭ ಮಾಡಲಾಗಿದೆ ಎಂದು ಜಿಲ್ಲಾಡಳಿತ ತಿಳಿಸಿದೆ.

(ದಟ್ಸ್ ಕನ್ನಡ ವಾರ್ತೆ)