ಪ್ರಿಯಕೃಷ್ಣನ ಒಟ್ಟು ಆಸ್ತಿ 770 ಕೋ ರು!

ಬೆಂಗಳೂರು, ಜು. 30 : ವಿಜಯನಗರ ವಿಧಾನಸಭೆ ಕ್ಷೇತ್ರದ ಶಾಸಕ ಕೃಷ್ಣಪ್ಪ ಅವರ ಮಗ ಹಾಗೂ ಪ್ರಸ್ತುತ ಉಪಚುನಾವಣೆಯ ಗೋವಿಂದರಾಜ ನಗರ ಕ್ಷೇತ್ರದ ಕಾಂಗ್ರೆಸ್ ಅಭ್ಯರ್ಥಿಯಾಗಿರುವ 25 ರ ಹರೆಯದ ಪ್ರಿಯಾಕೃಷ್ಣ ಅವರು 770 ಕೋಟಿ ರುಪಾಯಿ ಮೊತ್ತದ ಸ್ಥಿರ ಮತ್ತು ಚರ ಆಸ್ತಿಯನ್ನು ಹೊಂದಿದ್ದಾರೆ.

ಅಂತಿಮ ದಿನವಾದ ಬುಧವಾರ ನಾಮಪತ್ರ ಸಲ್ಲಿಸಿದ ಪ್ರಿಯಾಕೃಷ್ಣ ಅವರು, ತಮ್ಮ ಆಸ್ತಿ ವಿವರದ ಪ್ರಮಾಣಪತ್ರದಲ್ಲಿ ಈ ಅಚ್ಚರಿಯ ಮಾಹಿತಿಯನ್ನು ಬಹಿರಂಗಪಡಿಸಿದ್ದಾರೆ. 2,60, 49, 537 ರುಪಾಯಿ ನಗದು ಹೊಂದಿರುವ ಪ್ರಿಯಕೃಷ್ಣ ಸುಮಾರು 20 ವಿವಿಧ ಬ್ಯಾಂಕ್ ಗಳಲ್ಲಿ ಇಟ್ಟಿರುವ ಠೇವಣಿಯ ಮೊತ್ತವೇ ಸುಮಾರು 50 ಕೋಟಿ ರುಪಾಯಿ. ಪ್ರಿಯಕೃಷ್ಣ ಬಳಿ ಕೃಷಿ ಭೂಮಿಯಾಗಲೀ, ಅವರ ಹೆಸರಿನಲ್ಲಿ ಮನೆಯಾಗಲೀ ಇಲ್ಲ. ಆದರೆ, ನಗರದ ಆರ್ ಪಿ ಸಿ ಲೇಔಟ್, ಕೆಂಗೇರಿ, ಮಾಗಡಿ ಕಾರ್ಡ್ ರಸ್ತೆ ವಿಸ್ತರಣೆ, ಹಾರೋಹಳ್ಳಿ, ನಾಗದೇವನಹಳ್ಳಿ ಸೇರಿದಂತೆ 9 ಕಡೆ ನಿವೇಶನಗಳನ್ನು ಹೊಂದಿದ್ದಾರೆ. ಇದರ ಮೊತ್ತ 27 ಕೋಟಿ ರುಪಾಯಿ.

17 ಕೋಟಿ ರುಪಾಯಿ ಮೊತ್ತದ ವಿವಿಧ ಕಂಪನಿಗಳ ಷೇರು, ಬಾಂಡ್ ಗಳಿವೆ. ಸುಮಾರು 88 ಕೋಟಿ ರುಪಾಯಿಗಳನ್ನು ವಿವಿಧ ವ್ಯವಹಾರಗಳಲ್ಲಿ ತೊಡಗಿಸಿರುವ ಮೊತ್ತ 680 ಕೋಟಿ ರುಪಾಯಿ. 74 ಲಕ್ಷ ರುಪಾಯಿ ಕಾರು ಸೇರಿದಂತೆ 5 ಕಾರುಗಳ ಒಡೆಯ ಈ ಪ್ರಿಯಕೃಷ್ಣ. 12.61 ಲಕ್ಷ ರುಪಾಯಿ ಚಿನ್ನಾಭರಣಗಳನ್ನೂ ಹೊಂದಿದ್ದಾರೆ. ಪ್ರಿಯಕೃಷ್ಣ ಅವರು ಬೆಂಗಳೂರು ದೂರಶಿಕ್ಷಣ ಮೂಲಕ ರಾಜ್ಯಶಾಸ್ತ್ರದಲ್ಲಿ ಎಂಎ ಪದವಿ. ಬೆಂಗಳೂರು ವಿವಿಯಿಂದ ಎಲ್ ಎಲ್ ಬಿ ಪಡೆದಿದ್ದಾರೆ. ಅವರಿನ್ನೂ ಅವಿವಾಹಿತರು ಎಂದು ಮೂಲಗಳು ತಿಳಿಸಿವೆ.

(ದಟ್ಸ್ ಕನ್ನಡ ವಾರ್ತೆ)