ಸಾನಿಯಾ ಮಿರ್ಜಾ ಹುಟ್ಟಿರುವುದೇ ನನಗಾಗಿ

ಹೈದರಾಬಾದ್, ಜು. 8 : ಕೇರಳದ ಮೂಲದ ಬೆಂಗಳೂರಿನಲ್ಲಿ ಸಾಫ್ಟವೇರ್ ಇಂಜಿನಿಯರ್ ಆಗಿರುವ ಹರ್ಷದ್ ಎನ್ನುವ ವ್ಯಕ್ತಿಯೊಬ್ಬ ಟೆನ್ನಿಸ್ ಆಟಗಾರ್ತಿ ಸಾನಿಯಾ ಮಿರ್ಜಾ ಅವರನ್ನು ಮದುವೆ ಆಗು ಎಂದು ದುಂಬಾಲು ಬಿದ್ದಿರುವ ಘಟನೆ ಬೆಳಕಿಗೆ ಬಂದಿದೆ. ಕಳೆದ ಒಂದು ವಾರದಿಂದ ಸೋನಿಯಾ ಪೋಷಕರಿಗೆ ತೀವ್ರ ಕಿರುಕುಳ ನೀಡುತ್ತಿರುವ ಹರ್ಷದ್ ಅವರನ್ನು ಮಂಗಳವಾರ ರಾತ್ರಿ ಬಂಜಾರ್ ಹಿಲ್ಸ್ ನ ಪೊಲೀಸರು ಬಂಧಿಸಿ ವಿಚಾರಣೆ ನಡೆಸಿದ್ದಾರೆ.

ಟೆನ್ನಿಸ್ ಆಟಗಾರ್ತಿ ಸಾನಿಯಾಗೆ ಮದುವೆ ಸುದ್ದಿ ಮಾಧ್ಯಮಗಳಲ್ಲಿ ಪ್ರಕಟವಾಗುತ್ತಿದ್ದಂತೆಯೇ ಇತ್ತ ಬೆಂಗಳೂರಿನಲ್ಲಿ ನೆಲೆಸಿದ್ದ ಹರ್ಷದ್ ವಿಲವಿಲಾಂತ ಒದ್ದಾಡಲಿಕ್ಕೆ ಶುರುಮಾಡಿದ್ದಾನೆ. ಕಳೆದ ವಾರದಿಂದ ಸಾನಿಯಾ ತಂದೆಗೆ ಫೋನ್ ಮತ್ತು ಎಸ್ಎಂಎಸ್ ಮೂಲಕ ನಿಮ್ಮ ಮಗಳನ್ನು ಮದುವೆಯಾಗುವ ಪ್ರಸ್ತಾಪ ಮಾಡಿ ಅವರ ಗೋಳು ಹೋಯ್ದುಕೊಂಡಿದ್ದಾನೆ. ಸಾನಿಯಾ ಹುಟ್ಟಿರುವುದೇ ನನಗಾಗಿ. ಅವಳು ನನ್ನನ್ನು ಬಿಟ್ಟು ಯಾರನ್ನು ಮದುವೆಯಾಗಬಾರದು ಎಂದು ಗೋಗರೆದಿದ್ದಾನೆ. ಈತನ ವರ್ತನೆಗೆ ಸಾನಿಯಾ ಕುಟುಂಬ ತೀವ್ರ ನೊಂದುಕೊಂಡಿತ್ತು.

ಜುಲೈ 10 ರಂದು ಸಾನಿಯಾ ಹಾಗೂ ಆಕೆಯ ಬಾಲ್ಯ ಸ್ನೇಹಿತ ಸೋಹ್ರಬ್ ಎಂಬ ಎಂಬಿಎ ಪದವೀಧರನೊಂದಿಗೆ ನಿಶ್ಚಿತಾರ್ಥವಿದೆ. ಬುಧವಾರ ಬೆಳಗ್ಗೆ ಬೆಂಗಳೂರಿನಿಂದ ಹೈದರಾಬಾದ್ ಗೆ ವಿಮಾನವೇರಿದೆ ಈ ಟೆಕ್ಕಿ ಭೂಪ, ನೇರವಾಗಿ ಜುಬಿಲಿ ಹಿಲ್ಸ್ ನಲ್ಲಿರುವ ಸಾನಿಯಾ ಮನೆಗೆ ತೆರಳಿದ್ದಾನೆ. ಅಕೆಯ ಪೋಷಕರೆದುರಿಗೆ ವಿಷಯ ಪ್ರಸ್ತಾಪ ಮಾಡಿ ಆಕೆಯನ್ನೇ ಮದುವೆ ಮಾಡಿಕೊಳ್ಳುವುದಾಗಿ ಪಟ್ಟು ಹಿಡಿದಿದ್ದಾನೆ. ತಕ್ಷಣ ಪೊಲೀಸರಿಗೆ ಕರೆ ಮಾಡಲಾಗಿದ್ದು, ಹರ್ಷದ್ ನನ್ನು ಪೊಲೀಸರು ವಶಕ್ಕೆ ತೆಗೆದುಕೊಂಡು ವಿಚಾರಣೆ ಆರಂಭಿಸಿದ್ದಾರೆ.

(ಏಜನ್ಸೀಸ್)