ಲಂಡನ್ ನಲ್ಲಿ ವಟು ರಾಹುಲ್ ಗಾಂಧಿ ಹುಟ್ಟುಹಬ್ಬ

ನವದೆಹಲಿ, ಜೂ.19: ಕಾಂಗ್ರೆಸ್ ನ ಯುವ ನಾಯಕ ರಾಹುಲ್ ಗಾಂಧಿ ತಮ್ಮ 39ನೇ ಹುಟ್ಟುಹಬ್ಬವನ್ನು ಲಂಡನ್ ನಲ್ಲಿ ಆಚರಿಸಿಕೊಳ್ಳಲು ನಿರ್ಧರಿಸಿದ್ದಾರೆ. ತಮ್ಮ ಹುಟ್ಟುಹಬ್ಬದ ಸಂಭ್ರಮವನ್ನು ಸವಿಯಲು ರಾಹುಲ್ ಈಗಾಗಲೇ ಲಂಡನ್ ಗೆ ಪ್ರಯಾಣ ಬೆಳೆಸಿದ್ದಾರೆ.

ಕೇಂಬ್ರಿಡ್ಜ್ ದಿನಗಳಲ್ಲಿನ ಗೆಳೆಯರು ಹಾಗೂ ಕುಟುಂಬದ ಹಳೆಯ ಗೆಳೆಯರಿಗೆ ಮಾತ್ರ ಹುಟ್ಟುಹಬ್ಬಕ್ಕೆ ಆಹ್ವಾನ ನೀಡಲಾಗಿದೆ. ಖಾಸಗಿ ಔತಣ ಕೂಟವನ್ನು ರಾಹುಲ್ ಲಂಡನ್ ನಲ್ಲಿ ಏರ್ಪಡಿಸಿದ್ದಾರೆ. ಮೂಲಗಳ ಪ್ರಕಾರ, ರಾಹುಲ್ ಗಾಂಧಿ ತಮ್ಮ ಹುಟ್ಟುಹಬ್ಬವನ್ನು ಸರಳವಾಗಿ ಆಚರಿಸಿಕೊಳ್ಳಲು ನಿರ್ಧರಿಸಿದ್ದಾರಂತೆ.

ರಾಹುಲ್ ರ ಅಧಿಕೃತ ನಿವಾಸವಾದ12 ತುಘಲಕ್ ಲೇನ್ ನಲ್ಲಿ ಹುಟ್ಟುಹಬ್ಬದ ಸಂಭ್ರಮವಿರಲಿಲ್ಲ. ದಲಿತ ಮತ್ತು ಕೊಳೆಗೇರಿಗಳಲ್ಲಿ ಸಿಹಿ ಹಂಚಿ ಹುಟ್ಟುಹಬ್ಬವನ್ನು ಆಚರಿಸಿಕೊಳ್ಳುವಂತೆ ಪಕ್ಷದವರು ಸಲಹೆ ಕೊಟ್ಟಿದ್ದರು. ಇವರ ಸಲಹೆಯನ್ನು 39ರ ಬ್ರಹ್ಮಚಾರಿ ರಾಹುಲ್ ಬದಿಗಿಟ್ಟು ಲಂಡನ್ ಗೆ ಹಾರಿದ್ದಾರೆ.

ರಾಹುಲ್ ರ ನೆಚ್ಚಿನ ತಾಣಗಳಲ್ಲಿ ಲಂಡನ್ ಸಹ ಒಂದು. ಕಳೆದ ವರ್ಷ ಸಹ ರಾಹುಲ್ ತಮ್ಮ ಹುಟ್ಟುಹಬ್ಬವನ್ನು ಲಂಡನ್ ನಲ್ಲಿ ಖಾಸಗಿಯಾಗಿ ಆಚರಿಕೊಂಡರು ಎನ್ನುತ್ತವೆ ಮೂಲಗಳು. ಹುಟ್ಟುಹಬ್ಬದ ಸಂಭ್ರಮಕ್ಕೆ ರಾಹುಲ್ ರ ತಾಯಿ ಸೋನಿಯಾ ಗಾಂಧಿ ಸಹ ಹೋಗುವ ನಿರೀಕ್ಷೆ ಇದೆ. ಆದರೆ ಸಹೋದರಿ ಪ್ರಿಯಾಂಕ ಮತ್ತು ಆಕೆಯ ಗಂಡ ರೋಬರ್ಟ್ ವದ್ರಾ ಹೋಗುವುದು ಅನುಮಾನ ಎನ್ನುತ್ತವೆ ಮೂಲಗಳು.

(ಏಜೆನ್ಸೀಸ್)