ಪಾಕಿಸ್ತಾನದಲ್ಲಿ ಅವಳಿ ಸ್ಫೋಟ : 4 ಸಾವು
ಲಾಹೋರ್, ಜೂ. 12 : ಪಾಕಿಸ್ತಾನದಲ್ಲಿ ತಾಲಿಬಾನ್ ಉಗ್ರರ ಅಟ್ಟಹಾಸ ಮುಂದುವರೆದಿದ್ದು, ಇಂದು ಮತ್ತೆ ಎರಡು ಕಡೆ ಬಾಂಬ್ ಸ್ಫೋಟಗೊಳಿಸಲಾಗಿದೆ. ಹಿರಿಯ ಮೌಲ್ವಿ ಸೇರಿದಂತೆ ನಾಲ್ಕು ಮಂದಿ ಮೃತಪಟ್ಟಿದ್ದಾರೆ. 20ಕ್ಕೂ ಹೆಚ್ಚು ಮಂದಿ ಗಾಯಗೊಂಡಿರುವ ಘಟನೆ ಶುಕ್ರವಾರ ಮಧ್ಯಾಹ್ನ ಲಾಹೋರ್ ಮತ್ತು ನೌಶೆರಾ ಪ್ರದೇಶದಲ್ಲಿ ನಡೆದಿದೆ.
ಶುಕ್ರವಾರ ಆಗಿದ್ದರಿಂದ ಲಾಹೋರ್ ನ ಮಸೀದಿಯೊಂದಿರಲ್ಲಿ ಪ್ರಾರ್ಥನೆ ಮುಗಿಸಿ ತೆರಳುತ್ತಿದ್ದ ಸಮಯದಲ್ಲಿ ಮಸೀದಿಯ ಆವರಣದಲ್ಲಿ ಹಿರಿಯ ಮೌಲ್ವಿ ಮೌಲಾನಾ ಸರ್ಫರಾಜ್ ನಯೀಮ್ ಅವರ ಮೇಲೆ ಆಹ್ಮಾಹುತಿ ದಾಳಿ ನಡೆದಿದ್ದು, ಸ್ಥಳದಲ್ಲಿಯೇ ಅವರು ಮೃತಪಟ್ಟಿದ್ದಾರೆ. ನಯೀಮ್ ಅವರು ತಾಲಿಬಾನಿ ಉಗ್ರರು ನಡೆಸುತ್ತಿರುವ ಭಯೋತ್ಪಾದನೆಗೆ ತೀವ್ರ ಆಕ್ಷೇಪ ಎತ್ತಿದ್ದರು ಎನ್ನಲಾಗಿದೆ. ಇನ್ನೊಂದು ಸ್ಫೋಟ ನೌಶೆರಾ ಎಂಬಲ್ಲಿ ನಡೆದಿದ್ದು, ಮಸೀದಿ ಪಕ್ಕದ ಆತ್ಮಾಹುತಿ ಕಾರೊಂದು ಸ್ಫೋಟಗೊಂಡು ಮೂವರು ಸ್ಥಳದಲ್ಲಿ ಸಾವನ್ನಪ್ಪಿದ್ದು, ಹಲವು ಜನರು ಗಾಯಗೊಂಡಿದ್ದಾರೆ.
ಸ್ವಾತ್ ಪ್ರಾಂತ್ಯದಲ್ಲಿ ಪಾಕಿಸ್ತಾನ ಸರಕಾರ ನಡೆಸಿರುವ ಸೇನಾ ಕಾರ್ಯಾಚರಣೆ ಪ್ರತಿಯಾಗಿ ತಾಲಿಬಾನ್ ಉಗ್ರರು ಸರಕಾರದ ವಿರುದ್ಧ ಭಯೋತ್ಪಾದನೆ ನಡೆಸುತ್ತಿದ್ದಾರೆ. ಕಳೆದ ಮೂರು ವಾರಗಳ ಅವಧಿಯಲ್ಲಿ ಪಾಕಿಸ್ತಾದ ವಿವಿಧ ಪ್ರದೇಶದಲ್ಲಿ ಐದಾರು ಸ್ಫೋಟಗಳು ನಡೆದಿವೆ ಎಂದು ಸೇನಾ ಇಲಾಖೆಯ ಹಿರಿಯ ಅಧಿಕಾರಿಗಳು ತಿಳಿಸಿದ್ದಾರೆ. ಹೆಚ್ಚಿನ ಮಾಹಿತಿಗೆ ನಿರೀಕ್ಷಿಸಲಾಗಿದೆ.
(ಏಜನ್ಸೀಸ್)