ಮೋಹನ್ ರಾಜ್ ಅತ್ಯಂತ ಶ್ರೀಮಂತ ಅಭ್ಯರ್ಥಿ ?
ಚೆನ್ನೈ, ಮೇ. 13 : ಪ್ರಸ್ತುತ ಲೋಕಸಭೆ ಚುನಾವಣೆಯಲ್ಲಿ ಅಖಾಡಕ್ಕಿಳಿದಿರುವ ಅಭ್ಯರ್ಥಿಗಳ ಪೈಕಿ ದಕ್ಷಿಣ ಚೆನ್ನೈ ಕ್ಷೇತ್ರದಿಂದ ಜನತಾ ಪಕ್ಷದಿಂದ ಸ್ಪರ್ಧಿಸಿರುವ ಮೋಹನ್ ರಾಜ್ ಅತ್ಯಂತ ಶ್ರೀಮಂತ ವ್ಯಕ್ತಿಯಾಗಿದ್ದಾರೆ. ಮಾನ್ಯತೆ ಪಡೆಯದ ಜನತಾ ಪಕ್ಷದ ಹುರಿಯಾಳು ಆಗಿರುವ ಮೋಹನ್ ರಾಜ್ ಅವರ ಒಟ್ಟು ಆಸ್ತಿ 1977 ಕೋಟಿ ರುಪಾಯಿ ಎಂದು ಪ್ರಮಾಣಪತ್ರದಲ್ಲಿ ತಿಳಿಸಿದ್ದಾರೆ. ಆದರೆ, ಇವರು ಬಳಿ ಇರುವ ಒಟ್ಟು ಆಸ್ತಿ ಮೌಲ್ಯ ಕೇವಲ 52.16 ಲಕ್ಷ ರುಪಾಯಿ.
ಇದುವರೆಗೆ ಉತ್ತರ ಪ್ರದೇಶದ ಪಿಲಿಭಿತ್ ನ ಕಾಂಗ್ರೆಸ್ ಅಭ್ಯರ್ಥಿ ವಿ ಎಂ ಸಿಂಗ್ ಅವರೇ ಅತ್ಯಂತ ಶ್ರೀಮಂತ ಅಭ್ಯರ್ಥಿ (632 ಕೋಟಿ ರುಪಾಯಿ) ಎಂದು ಭಾವಿಸಲಾಗಿತ್ತು. ಆದರೆ, ಅದನ್ನು ಮೋಹನ್ ರಾಜ್ ಎಂಬ ಕುಬೇರ ಸುಳ್ಳು ಮಾಡಿದ್ದಾರೆ. ಈ ಬಗ್ಗೆ ಕೇಳಿದರೆ, ಉನ್ನತ ರಾಜಕೀಯ ನಾಯಕರು ಘೋಷಿಸಿಕೊಂಡಿರುವ ಆಸ್ತಿ ಮೌಲ್ಯ ನಿಜವೇ ಆಗಿದ್ದರೆ ನನ್ನದು ಕೂಡಾ ಸತ್ಯ. ನನ್ನ ಹಣವೆಲ್ಲಾ ಸ್ವಿಸ್ ಬ್ಯಾಂಕ್ ನಲ್ಲಿದೆ. ಹಣ ಇಟ್ಟಿರುವವರ ಪಟ್ಟಿಯಲ್ಲಿ ನನ್ನ ಹೆಸರೂ ಇದೆ ಎಂದು ಹೇಳಿದ್ದಾರೆ. ಹಾಂ ಬೆಚ್ಚಿಬೀಳಬೇಡಿ ಮೋಹನ ರಾಜ್ ಹೇಳಿಕೊಂಡಿರುವಂತೆ ಅವರ ಬಳಿ 1977 ಕೋಟಿ ರುಪಾಯಿ ಆಸ್ತಿ ಇಲ್ಲ. ಅವರ ಒಟ್ಟು ಆಸ್ತಿ ಮೌಲ್ಯ ಕೇವಲ 52.16 ಲಕ್ಷ ರುಪಾಯಿ.
ಈ ಕುರಿತು ಪ್ರಶ್ನಿಸಿದರೆ, ನಾನು ಉದ್ದೇಶ ಪೂರ್ವಕವಾಗಿಯೇ ಸುಳ್ಳು ಪ್ರಮಾಣಪತ್ರ ಸಲ್ಲಿಸಿರುವೆ. ಭಾರತೀಯ ದಂಡ ಸಂಹಿತೆ ಪ್ರಕಾರ ಸುಳ್ಳು ಪ್ರಮಾಣ ಪತ್ರ ಸಲ್ಲಿಸಿದರೆ ಮೂರು ವರ್ಷ ಶಿಕ್ಷೆಯಾಗುತ್ತದೆ. ಅದಕ್ಕೂ ನಾನು ಸಿದ್ಧ ಎನ್ನುತ್ತಾರೆ ಮೊಹನ್ ರಾಜ್. ರಾಜಕೀಯ ನಾಯಕರ ವಿರುದ್ಧ ಕೋಪಗೊಂಡು ಈ ರೀತಿ ಸುಳ್ಳು ಪ್ರಮಾಣ ಪತ್ರ ಸಲ್ಲಿಸಿರುವುದಾಗಿ ಹೇಳಿದ್ದಾರೆ.
(ಏಜನ್ಸೀಸ್)
ಲೋಕಸಭೆ ಚುನಾವಣೆ2009 ತಾಜಾ ಸುದ್ದಿಗಳು