ತಾಲಿಬಾನ್ ಹುಟ್ಟಿದ್ದು ಸಿಐಎ ಮತ್ತು ಐಎಸ್‌ಐ ನಿಂದ

ವಾಷಿಂಗ್ ಟನ್, ಮೇ. 11 : ಅಮೇರಿಕಾದ ಸಿಐಎ ಮತ್ತು ತನ್ನದೇ ದೇಶದ ಐಎಸ್‌ಐ ಗುಪ್ತಚರ ಸಂಸ್ಥೆ ಒಟ್ಟಾಗಿ 'ತಾಲಿಬಾನ್ ಉಗ್ರ ಸಂಘಟನೆ'ಯನ್ನು ಹುಟ್ಟುಹಾಕಿದ್ದು ಎಂದು ಪಾಕ್ ಅಧ್ಯಕ್ಷ ಅಸೀಫ್ ಅಲಿ ಜರ್ದಾರಿ ಹೊಸ ವಿವಾದಕಾರಿ ಹೇಳಿಕೆ ನೀಡಿದ್ದಾರೆ. ಸುದ್ದಿ ಚಾನಲ್ ಗೆ ನೀಡಿದ ಸಂದರ್ಶನವೊಂದರಲ್ಲಿ ಈ ವಿಷಯ ಬಹಿರಂಗಪಡಿಸಿದ್ದಾರೆ.

ತಾಲಿಬಾನ್ ಸಂಘಟನೆಗೆ ಕುಮುಕ್ಕು ನೀಡುತ್ತಿದ್ದಾರೆ೦ದು ಆಪಾದಿಸಲಾದ ಪರ್ವೇಜ್ ಮುಷರಫ್ ಅವರ ಮಿಲಿಟರಿ ಆಡಳಿತಕ್ಕೆ ಅಮೆರಿಕದ ಬೆಂಬಲವಿತ್ತು. ಆದರೆ ತಾಲಿಬಾನ್ ಸಂಘಟನೆ ಬಗ್ಗೆ ಈಗಲೂ ಪಾಕ್ ಮಿಲಿಟರಿ ಮೃದುಧೋರಣೆ ತಾಳುತ್ತಿದೆ ಎನ್ನುವ ಮಾತನ್ನು ನಿರಾಕರಿಸಿದರು. ನಮಗೆ ಭಾರತದಿಂದ ಬೆದರಿಕೆ ಇಲ್ಲ. ತಾಲಿಬಾನ್ ಸಂಪೂರ್ಣ ನಿರ್ನಾಮಕ್ಕೆ ಸರಕಾರ ಬದ್ದವಾಗಿದೆ ಎಂದು ಜರ್ದಾರಿ ಹೇಳಿದರು. ತಾವು ರಾಷ್ಟ್ರದಲ್ಲಿ ಮಿಲಿಟರಿ ಮತ್ತು ಆಡಳಿತದ ಮೇಲೆ ನಿಯಂತ್ರಣ ಹೊಂದಿರುವುದಾಗಿ ಹೇಳಿದರು. ತಾಲಿಬಾನ್ ನಿರ್ಮೂಲನೆಗೆ ತಮ್ಮ ಕೆಲವು ಪಡೆಗಳನ್ನು ಭಾರತದ ಗಡಿಯಿಂದ ಪಶ್ಚಿಮದ ಗಡಿಗೆ ಸ್ಥಳಾಂತರಿಸಿರುವುದಾಗಿ ಹೇಳಿದರು

(ಏಜನ್ಸೀಸ್)