ಹಂದಿಜ್ವರ : 1000 ಪ್ರಕರಣ ಬೆಳಕಿಗೆ, 20 ಸಾವು

ಜಿನೇವಾ, ಮೇ. 4 : ವಿಶ್ವದ ನಾನಾ ದೇಶಗಳಲ್ಲಿ ಹಂದಿಜ್ವರದ 1000 ಪ್ರಕರಣಗಳು ದೃಢಪಟ್ಟಿವೆ ಎಂದು ವಿಶ್ವ ಆರೋಗ್ಯ ಸಂಸ್ಥೆ ತಿಳಿಸಿದೆ. ವಿಶ್ವದ 17 ದೇಶಗಳಲ್ಲಿ ಹಂದಿಜ್ವರ ಪ್ರಕರಣಗಳು ವೈದ್ಯಕೀಯ ಪರೀಕ್ಷೆಯಿಂದ ದೃಢಪಟ್ಟಿವೆ. ಅಲ್ಲದೇ ಈ ಮಾರಕ ರೋಗಕ್ಕೆ ಇದುವರೆಗೆ ಒಟ್ಟು 20 ಮಂದಿ ಬಲಿಯಾಗಿದ್ದಾರೆ.

ಮೆಕ್ಸಿಕೋದಲ್ಲಿ 506 ಪ್ರಕರಣಗಳು ದಾಖಲಾಗಿದ್ದು, 19 ಮಂದಿ ಬಲಿಯಾಗಿದ್ದಾರೆ. ಸ್ಪೇನ್ ನಲ್ಲಿ 20, ಬ್ರಿಟನ್ ನಲ್ಲಿ 16, ಜರ್ಮನಿಯಲ್ಲಿ 8 ಹಂದಿ ಜ್ವರದ ಪ್ರಕರಣಗಳು ಬೆಳಕಿಗೆ ಬಂದಿದೆ. ಅಮೆರಿಕದಲ್ಲಿ 160 ಪ್ರಕರಣಗಳು ಈವರೆಗೆ ವರದಿಯಾಗಿದ್ದು. ಒಬ್ಬ ಮೃತಪಟ್ಟಿದ್ದಾನೆ. ಅಲ್ಲದೇ ಕೆನಡಾದಲ್ಲಿ ಹಂದಿ ಜ್ವರದ 70 ಪ್ರಕರಣಗಳು ಪತ್ತೆಯಾಗಿವೆ.

ಈ ಮಧ್ಯೆ ಕೊಲಂಬಿಯಾದಲ್ಲಿ ಹಂದಿ ಜ್ವರಕ್ಕೆ 42 ವರ್ಷದ ವ್ಯಕ್ತಿಯೊಬ್ಬ ಸಾವನ್ನಪ್ಪಿದ್ದಾನೆ. ಮೃತ ವ್ಯಕ್ತಿ ಇತ್ತೀಚೆಗೆ ಮೆಕ್ಸಿಕೋದಿಂದ ಹಿಂತಿರುಗಿದ್ದ ಎಂದು ಆರೋಗ್ಯಇಲಾಖೆ ತಿಳಿಸಿದೆ. ಇದರಿಂದ ಹಂದಿಜ್ವರದಿಂದ ಬಳಲುತ್ತಿರುವ 18ನೇ ರಾಷ್ಟ್ರ ಎಂದು ಗುರುತಿಸಿಕೊಂಡಿದೆ. ಮಾರಕ ಹಂದಿಜ್ವರ 50 ವರ್ಷಕ್ಕಿಂತ ಹೆಚ್ಚಿನ ವಯೋಮಾನದವರಲ್ಲಿ ಅಪರೂಪ. ಸಾಮಾನ್ಯವಾಗಿ ಯುವಜನರಲ್ಲಿ ಹೆಚ್ಚಿಗೆ ಕಂಡು ಬಂದಿದೆ ಎಂದು ಅಮೆರಿಕದ ಅಧಿಕಾರಿಗಳು ತಿಳಿಸಿದ್ದಾರೆ. ಅಮೆರಿಕದ 32 ರಾಜ್ಯಗಳಲ್ಲಿ ಈ ರೋಗ ವ್ಯಾಪಿಸಿದ್ದು, 226 ಮಂದಿ ರೋಗದಿಂದ ಬಳಲುತ್ತಿದ್ದಾರೆ.

(ಏಜನ್ಸೀಸ್)