ಬಹಿರಂಗ ಪ್ರಚಾರ ಏಪ್ರಿಲ್ 28ರ ಸಂಜೆ 5 ಗಂಟೆಗೆ ಅಂತ್ಯ
ಮೈಸೂರು, ಏ. 26: ಕಾನೂನು ರೀತ್ಯ ಮತದಾನ ಅಂತ್ಯವಾಗುವ 48 ಗಂಟೆಗಳಿಗೆ ಮೊದಲು ಅಂದರೆ ದಿನಾಂಕ 28.04.2009ರ ಸಂಜೆ 5 ಗಂಟೆಯ ನಂತರ ಚುನಾವಣೆ ಸಭೆ ಮತ್ತು ಬಹಿರಂಗ ಪ್ರಚಾರವನ್ನು ನಡೆಸುವುದನ್ನು ನಿರ್ಬಂಧಿಸಲಾಗಿದೆ. ರಾಜಕೀಯ ಪಕ್ಷಗಳು ಮತ್ತು ಅಭ್ಯರ್ಥಿಗಳ ಗಮನಕ್ಕೆ ಈ ಕೆಳಕಂಡ ಅಂಶಗಳನ್ನು ಸಹಾಯಕ ಚುನಾವಣಾಧಿಕಾರಿಗಳು ತಂದಿದ್ದಾರೆ.
ಅಭ್ಯರ್ಥಿಗಳು ಹಾಗೂ ಅವರ ಏಜೆಂಟರು ಮನೆ ಮನೆಗೆ ತೆರಳಬಹುದು. ಆದರೆ ಯಾವುದೇ ಕರಪತ್ರವನ್ನು ಹಂಚುವಂತಿಲ್ಲ. ಮುದ್ರಣ ಮಾಧ್ಯಮ ಹೊರತುಪಡಿಸಿ ಸಿನಿಮಾಟೋಗ್ರಾಫ್, ದೂರದರ್ಶನ ಹಾಗೂ ತತ್ಸಮಾನದ ಮೂಲಕ ಯಾವುದೇ ಪ್ರಚಾರಕ್ಕೆ ಅವಕಾಶವಿರುವುದಿಲ್ಲ. ಯಾವುದೇ ಸಭೆ, ಸಮಾರಂಭ, ಮೆರವಣಿಗೆ ಇವುಗಳಿಗೆ ಅವಕಾಶವಿರುವುದಿಲ್ಲ. ಮತದಾರರು ಮತ್ತು ಸಾರ್ವಜನಿಕರಿಗೆ ಯಾವುದೇ ನಾಟಕ ಏರ್ಪಡಿಸುವುದರ ಅಥವಾ ಹಾಡುಗಾರಿಕೆಗಳ ಮೂಲಕ ಚುನಾವಣಾ ಪ್ರಚಾರ ಮಾಡುವಂತಿಲ್ಲ.
ಕಾನೂನನ್ನು ಉಲ್ಲಂಘಿಸುವ ಯಾವುದೇ ವ್ಯಕ್ತಿಯನ್ನು ೨ ವರ್ಷಗಳವರೆಗೆ ವಿಸ್ತರಿಸಬಹುದಾದ ಸಜೆ ಅಥವಾ ದಂಡ ಅಥವಾ ಸಜೆ ಮತ್ತು ದಂಡ ಎರಡೂ ಸೇರಿದಂತೆ ಶಿಕ್ಷೆಗೆ ಗುರಿಪಡಿಸಬಹುದಾಗಿರುತ್ತದೆ ಎಂದು ತಿಳಿಸಿದ್ದಾರೆ.
(ದಟ್ಸ್ ಕನ್ನಡ ವಾರ್ತೆ)