ಏ.23 ರಂದು17 ಲೋಕಸಭೆ ಕ್ಷೇತ್ರದಲ್ಲಿ ಮತದಾನ

ಬೆಂಗಳೂರು, ಏ. 22 : ರಾಜ್ಯದ 17 ಲೋಕಸಭೆ ಕ್ಷೇತ್ರಗಳಲ್ಲಿ ರಾಜಕೀಯ ಮುಖಂಡರ ದೊಂಬರಾಟ ಕೊನೆಗೂ ಅಂತ್ಯ ಕಂಡಿತು. ಮೊದಲ ಹಂತದ 17 ಲೋಕಸಭೆ ಚುನಾವಣೆಯಲ್ಲಿ ಅಖಾಡದಲ್ಲಿರುವ ಘಟಾನುಘಟಿ ಮುಖಂಡರು ಸೇರಿ ಒಟ್ಟು 271 ಮಂದಿಯನ್ನು ಹಣೆಬರಹವನ್ನು ಗುರುವಾರ ಮತದಾರ ಗೀಚಲಿದ್ದಾರೆ.

ಎಂ ವೀರಪ್ಪ ಮೊಯ್ಲಿ, ಎಚ್ ಡಿ ಕುಮಾರಸ್ವಾಮಿ, ಎನ್ ಧರ್ಮಸಿಂಗ್, ಕೇಂದ್ರದ ಸಚಿವ ಕೆ ಎಚ್ ಮುನಿಯಪ್ಪ, ಸಿ ಕೆ ಜಾಪರ್ ಷರೀಫ್, ಮಲ್ಲಿಕಾರ್ಜುನ ಖರ್ಗೆ, ಅನಂತಕುಮಾರ್, ಸಚಿವ ರೇವು ನಾಯಕ ಬೆಳಮಗಿ, ಗುರುಪಾದಪ್ಪ ನಾಗಮಾರಪಲ್ಲಿ, ಎಬಿ ಪಾಟೀಲ್, ಇಕ್ಬಾಲ್ ಅನ್ಸಾರಿ, ರಮೇಶ್ ಜಿಗಜಿಣಗಿ, ಡಿಬಿ ಚಂದ್ರೇಗೌಡ, ಜಿ ಎಸ್ ಬಸವರಾಜು, ಕೃಷ್ಣ ಭೈರೇಗೌಡ, ಸುರೇಶ್ ಅಂಗಡಿ, ಅನಂತಕುಮಾರ್ ಹೆಗ್ಡೆ, ಎನ್ ವೈ ಹನುಮಂತಪ್ಪ, ಜನಾರ್ದನಸ್ವಾಮಿ, ತೇಜಸ್ವಿನಿಗೌಡ, ಎಚ್ ಟಿ ಸಾಂಗ್ಲಿಯಾನ, ಪ್ರಕಾಶ್ ಹುಕ್ಕೇರಿ, ಜಮೀರ್ ಅಹ್ಮದ್ ಖಾನ್, ಡಿ ಎಸ್ ವೀರಯ್ಯ ಅವರ ಭವಿಷ್ಯವನ್ನು ಶ್ರೀಸಾಮಾನ್ಯ ಬರೆಯಲಿದ್ದಾರೆ.

ಮೊದಲ ಹಂತದ 17 ಲೋಕಸಭೆ ಚುನಾವಣೆಯಲ್ಲಿ 2,57,85,835 ಮಂದಿ ಮತದಾರರು ಚಲಾಯಿಸುವ ಹಕ್ಕು ಪಡೆದಿದ್ದಾರೆ. 1.62 ಲಕ್ಷ ಸಿಬ್ಬಂದಿಯನ್ನು ಬಳಸಿಕೊಳ್ಳಲಾಗುತ್ತಿದೆ. ಮೊದಲ ಹಂತದ ಚುನಾವಣೆಯಲ್ಲಿ 29,126 ಮತಗಟ್ಟೆಗಳಿವೆ. 45 ಸಾವಿರ ವಿದ್ಯುನ್ಮಾನ ಮತಯಂತ್ರಗಳನ್ನು ಬಳಸಲಾಗುತ್ತಿದೆ. ಅತೀ ಹೆಚ್ಚು ಅಂದರೆ 37 ಅಭ್ಯರ್ಥಿಗಳಿರುವ ಬೆಂಗಳೂರು ಸೆಂಟ್ರಲ್ ಕ್ಷೇತ್ರದಲ್ಲಿ ಮೂರು ಮತಯಂತ್ರಗಳನ್ನು ಬಳಸಲಾಗುತ್ತಿದೆ. ಅಲ್ಲದೇ 16ಕ್ಕೂ ಹೆಚ್ಚು ಅಭ್ಯರ್ಥಿಗಳಿರುವ ಆರು ಕ್ಷೇತ್ರಗಳಲ್ಲಿ ಎರಡು ಮತಯಂತ್ರಗಳನ್ನು ಬಳಕೆ ಮಾಡಲಾಗುತ್ತಿದೆ.

ಮೊದಲ ಹಂತದಲ್ಲಿ ಸೂಕ್ಷ್ಮ 6,557 ಹಾಗೂ ಅತಿ ಸೂಕ್ಷ್ಮ 3,522 ಮತಗಟ್ಟೆಗಳಿದ್ದು, ಉಳಿದವು ಸಾಮಾನ್ಯ ಮತಗಟ್ಟೆಗಳಾಗಿವೆ. ಸೂಕ್ಷ್ಮ, ಅತಿ ಸೂಕ್ಷ್ಮ ಮತಗಟ್ಟೆಗಳಲ್ಲಿ ಕ್ಯಾಮೆರಾ ಬಳಕೆ ಮಾಡಲಾಗುತ್ತಿದೆ. 1165 ಮಂದಿ ಮೈಕ್ರೋ ವೀಕ್ಷಕರು ಹಾಗೂ 43 ಮಂದಿ ವೀಕ್ಷಕರು ಕಾರ್ಯನಿರ್ವಹಿಸುತ್ತಿದ್ದಾರೆ. ಚುನಾವಣ ಸಿಬ್ಬಂದಿ ಮತಯಂತ್ರ ಹಾಗೂ ಪೊಲೀಸ್ ಸಿಬ್ಬಂದಿಗಳ ಸಂಚಾರಕ್ಕೆ 2,200 ಕ್ಕೂ ಹೆಚ್ಚು ಸಾರಿಗೆ ಸಂಸ್ಥೆಗಳ ಬಸ್ ಗಳನ್ನು ಬಳಸಲಾಗಿದೆ. ಕೆಎಸ್ ಆರ್ ಟಿಸಿ 1,380 ಹಾಗೂ 800 ಕ್ಕೂ ಹೆಚ್ಚು ಬಳಸಲಾಗಿದ್ದು, ದೈನಂದಿನ ಮಾರ್ಗಗಳಲ್ಲಿ ಪ್ರಯಾಣಿಕರಿಗೆ ತೊಂದರೆ ಆಗದಂತೆ ಕ್ರಮಕೈಗೊಳ್ಳಲಾಗಿದೆ.

ಚಿಕ್ಕೋಡಿ, ಬೆಳಗಾವಿ, ವಿಜಾಪುರ, ಗುಲ್ಬರ್ಗಾ, ರಾಯಚೂರು, ಬೀದರ್, ಕೊಪ್ಪಳ, ಬಳ್ಳಾರಿ, ಉತ್ತರ ಕನ್ನಡ, ಚಿತ್ರದುರ್ಗ, ತುಮಕೂರು, ಬೆಂಗಳೂರು, ಗ್ರಾಮಾಂತರ, ಬೆಂಗಳೂರು ಸೆಂಟ್ರಲ್, ಬೆಂಗಳೂರು ದಕ್ಷಿಣ, ಬೆಂಗಳೂರು ಉತ್ತರ, ಚಿಕ್ಕಬಳ್ಳಾಪುರ ಹಾಗೂ ಕೋಲಾರದಲ್ಲಿ ಮೊದಲ ಹಂತದ ಚುನಾವಣೆ ನಡೆಯಲಿದೆ.

ಎರಡನೇ ಹಂತದ ಮತದಾನ : 140 ಲೋಕಸಭೆ ಕ್ಷೇತ್ರಗಳಲ್ಲಿ ಮತದಾನ

15ನೇ ಲೋಕಸಭೆ ಚುನಾವಣೆಯ ಎರಡನೇ ಹಂತದ ಚುನಾವಣೆ ಒಟ್ಟು 140 ಕ್ಷೇತ್ರಗಳಲ್ಲಿ ನಡೆಯಲಿದೆ. ಆಂಧ್ರಪ್ರದೇಶ, ಉತ್ತರ ಪ್ರದೇಶ, ಗೋವಾ, ಅಸ್ಸಾಂ, ಜಾರ್ಖಂಡ್, ಮಧ್ಯಪ್ರದೇಶ, ಮಣಿಪುರ, ಮಹಾರಾಷ್ಟ್ರ, ಓರಿಸ್ಸಾ, ಪಶ್ಚಿಮ ಬಂಗಾಲ,ತ್ರಿಪುರಾ, ಜಮ್ಮು ಮತ್ತು ಕಾಶ್ಮೀರ ರಾಜ್ಯಗಳಲ್ಲಿ ಮತದಾನ ನಡೆಯಲಿದೆ. ಮತದಾನದ ಹಿನ್ನೆಲೆಯಲ್ಲಿ ವ್ಯಾಪಕ ಬಿಗಿ ಪೊಲೀಸ್ ಬಂದೋಬಸ್ತ್ ಕೈಗೊಳ್ಳಲಾಗಿದೆ.

(ದಟ್ಸ್ ಕನ್ನಡ ವಾರ್ತೆ)

ಲೋಕಸಭೆ ಚುನಾವಣೆ2009 ತಾಜಾ ಸುದ್ದಿಗಳು