'ರಾಹುಲ್ ಒಂದು ದಿನ ಪ್ರಧಾನಿಯಾಗೇ ಆಗ್ತಾನೆ'

ಅಮೇಥಿ, ಏ. 12 : ಭಾರತದ ಮುಂದಿನ ಪ್ರಧಾನಿ ಯಾರು? ಈ ಪ್ರಶ್ನೆ ಜನವಲಯದಲ್ಲಷ್ಟೇ ಏಕೆ ರಾಜಕೀಯ ವಲಯದಲ್ಲಿಯೂ ಸಾಕಷ್ಟು ಚರ್ಚೆಗೆ ಗ್ರಾಸವಾಗಿದೆ. ಬಿಜೆಪಿ ಅಡ್ವಾಣಿಯವರೇ ಏಕೈಕ ಅಭ್ಯರ್ಥಿ ಎಂದು ಹೇಳಿ ಎದ್ದಿದ್ದ ವಿವಾದಕ್ಕೆ ತೆರೆಎಳೆದಿದ್ದರೆ, ತೃತೀಯ ರಂಗದ ಅಭ್ಯರ್ಥಿ ತಾನೇ ಎಂದು ಮಾಯಾವತಿ ಘೋಷಿಸಿಕೊಂಡು ವಿವಾದ ಸೃಷ್ಟಿಸಿದ್ದಾರೆ. ಆದರೆ, ಕಾಂಗ್ರೆಸ್ ಮಾತ್ರ ಇಂಥವರೇ ಪ್ರಧಾನಿ ಅಭ್ಯರ್ಥಿ ಎಂದು ಎಲ್ಲೆಡೆ ಡಾಣಾಡಂಗುರ ಸಾರದೆ ಅನಿಶ್ಚಿತತೆಯ ಮುಸುಕು ಹೊದ್ದುಕೊಂಡಿದೆ.

ಒಂದೆಡೆ ಚರ್ಚೆಗೆ ಬನ್ನಿ ಎಂದು ಮನಮೋಹನ ಸಿಂಗ್ ಅವರಿಗೆ ಅಡ್ವಾಣಿ ಸವಾಲು ಎಸೆಯುತ್ತಿದ್ದಾರೆ. ನಿಮ್ಮನ್ನು ನಾನೇಕೆ ಪರ್ಯಾಯ ಪ್ರಧಾನಿಯೆಂದು ಬಿಂಬಿಸಲಿ ಎಂದು ಸಿಂಗ್ ಚರ್ಚೆಯ ರಿಂಗಿಗಿಳಿಯಲು ಹಿಂದೇಟು ಹಾಕಿದ್ದಾರೆ. ಇನ್ನೊಂದೆಡೆ ನಾನು ಪ್ರಧಾನಿ ಅಭ್ಯರ್ಥಿಯಲ್ಲವೇ ಅಲ್ಲ ಎಂದು ಅನ್ನುತ್ತಲೇ ಸೋನಿಯಾ ಗಾಂಧಿ ರಾಯ್ ಬರೇಲಿಯಿಂದ ಚುನಾವಣಾ ಕಣಕ್ಕಿಳಿದಿದ್ದಾರೆ. ಸದ್ಯಕ್ಕೆ ಪ್ರಧಾನಿ ಪಟ್ಟವೆಂಬುದು ಎಲ್ಲ ವಾದ ವಿವಾದಗಳ, ಚರ್ಚೆಯ ಕೇಂದ್ರ ಬಿಂದುವಾಗಿದೆ.

ಇಂಥದೇ ಸಮಯದಲ್ಲಿ, ಅಮೇಥಿಯಿಂದ ಸ್ಪರ್ಧಿಸುತ್ತಿರುವ ಭಯ್ಯಾ "ರಾಹುಲ್ ಗಾಂಧಿ ಒಂದಿಲ್ಲೊಂದು ದಿನ ಪ್ರಧಾನಿ ಆಗೇ ಆಗ್ತಾನೆ" ಎಂದು ಹೇಳಿ ಪ್ರಿಯಾಂಕಾ ಗಾಂಧಿ ವಧ್ರಾ ಬಾಂಬೆಸೆದಿದ್ದಾರೆ ಮತ್ತು ಕಾಂಗ್ರೆಸ್ ಪಾಳಯದಲ್ಲಿಯೇ ಕಳವಳದ ತರಂಗಗಳನ್ನು ಬಡಿದೆಬ್ಬಿಸಿದ್ದಾರೆ. ರಾಹುಲ್ ಗಾಂಧಿ ಈ ಚುನಾವಣೆಯಲ್ಲಿ ಪ್ರಧಾನಿ ಅಭ್ಯರ್ಥಿ ಎಂದು ಅವರು ನೇರವಾಗಿ ಹೇಳಿರದಿದ್ದರೂ 'ಪ್ರಧಾನಿಯಾಗಲು ರಾಹುಲ್ ಅರ್ಹ ವ್ಯಕ್ತಿ. ಪ್ರಧಾನಿಯಾದ್ರೆ ಅದ್ಭುತವಾಗಿ ಕೆಲಸ ಮಾಡ್ತಾನೆ' ಎಂದು ಹೇಳಿದ್ದಾರೆ. 15ನೇ ಲೋಕಸಭೆಯಲ್ಲಿ ಕಾಂಗ್ರೆಸ್ ಜಯಭೇರಿ ಹೊಡೆದರೆ ಡಾ. ಮನಮೋಹನ ಸಿಂಗ್ ಅವರೇ ಪ್ರಧಾನಿಯಾಗಲಿದ್ದಾರೆ ಎಂದು ಪ್ರಿಯಾಂಕಾ ಹೇಳಿ ವಿವಾದ ಗರಿಬಿಚ್ಚದಂತೆ ನೋಡಿಕೊಂಡಿದ್ದಾರೆ.

80ರ 'ಚಿರಯುವಕ' ಅಡ್ವಾಣಿ ಪ್ರಧಾನ ಮಂತ್ರಿ ಅಭ್ಯರ್ಥಿಯಾಗಿ ಅಧಿಕಾರಕ್ಕೆ ಬರಲು ಹವಣಿಸುತ್ತಿದ್ದರೆ, ರಾಹುಲ್ ಗಾಂಧಿ ಯುವಪಡೆಯ ನೇತಾರರಂತೆ ಬಿಂಬಿತವಾಗುತ್ತಿದ್ದಾರೆ. ಅಡ್ವಾಣಿ ಬದಲು ಅವರಿಗಿಂತ ವಯಸ್ಸಿನಲ್ಲಿ ಚಿಕ್ಕವರಿರುವ ಗುಜರಾತ್ ಮುಖ್ಯಮಂತ್ರಿ ನರೇಂದ್ರ ಮೋದಿಯವರು ಪ್ರಧಾನಿ ಪಟ್ಟಕ್ಕೆ ಸೂಕ್ತ ವ್ಯಕ್ತಿ ಅಂತ ಹೇಳಿ ನಾಡಿನ ಖ್ಯಾತ ಉದ್ಯಮಿಗಳು ಕೋಲಾಹಲವನ್ನೆಬ್ಬಿಸಿದ್ದರು. ಈ ವಿವಾದಕ್ಕೆ ಸ್ವತಃ ಮೋದಿಯವರೇ ತೆರೆ ಎಳೆದಿದ್ದರು.

(ಎಎನ್ಐ)