ಡಿಜೆ ಹಳ್ಳಿ ಬಾಲಕಿ ಮೇಲೆ ಬೀದಿ ನಾಯಿಗಳ ದಾಳಿ

ಬೆಂಗಳೂರು, ಏ. 7 : ನಗರದಲ್ಲಿ ಬೀದಿ ನಾಯಿಗಳ ಹಾವಳಿ ಮತ್ತೆ ಆರಂಭವಾಗಿದ್ದು, ಸೋಮವಾರ ಮಧ್ಯಾಹ್ನ ರಸ್ತೆಯಲ್ಲಿ ನಡೆದು ಹೋಗುತ್ತಿದ್ದ ನಾಲ್ಕು ವರ್ಷದ ಬಾಲಕಿಗೆ ಕಚ್ಚಿ ಗಾಯಗೊಳಿಸಿದ ಘಟನೆ ದೇವರ ಜೀವನಹಳ್ಳಿ ಈದ್ಗಾ ಮೊಹಲ್ಲಾ ಬಳಿ ನಡೆದಿದೆ. ಬಿಹಾರ ಮೂಲದ ನಿವಾಸಿ ಸಿಕಂದರ್ ಹಾಗೂ ಉರ್ಮಿಳಾ ಎಂಬುವವರ ಪುತ್ರಿ ನಿಶಾ (4) ನಾಯಿಯ ಹಲ್ಲೆಗೆ ಒಳಗಾಗಿದ್ದು, ಬೌರಿಂಗ್ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾಳೆ.

ಸೋಮವಾರ ಮಧ್ಯಾಹ್ನ 1 ಗಂಟೆ ಹೊತ್ತಿಗೆ ಬಾಲಕಿ ನಿಶಾ ಸಮೀಪದ ಬಂಡೆಯ ಬಳಿ ನೀರು ತರಲು ಚೆಂಬು ಹಿಡಿದು ಹೋಗುತ್ತಿದ್ದಾಗ ಒಮ್ಮಲೆ ಸುಮಾರು 6-7 ನಾಯಿಗಳು ದಾಳಿ ಇಟ್ಟಿವೆ. ಅಲ್ಲದೆ ನಾಯಿಗಳು ಪುಟಾಣಿ ತೆ ಕೂದಲು ಹಿಡಿದು ಎಳೆದಾಡಿ ಕಚ್ಚತೊಡಗಿವೆ. ನಾಯಿ ಕಚ್ಚಿದ ರಭಸಕ್ಕೆ ನಿಶಾ ಕಿವಿ ತುಂಡಾಗಿದೆ. ತೊಡೆ, ಕೈ, ಕಾಲು, ಕೆನ್ನೆಗೆ ಕಚ್ಚಿ ಗಾಯಗೊಳಿಸಿವೆ. ಬೌರಿಂಗ್ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿರುವ ನಿಶಾ, ಅಪಾರದಿಂದ ಪಾರಾಗಿದ್ದಾಳೆ ಎಂದು ಆಸ್ಪತ್ರೆ ಮೂಲಗಳು ತಿಳಿಸಿವೆ.

ಘಟನೆ ನಂತರ ಸಾರ್ವಜನಿಕರು ಬೀದಿ ನಾಯಿಗಳ ಮಾರಣಹೋಮ ಮಾಡಿದ್ದಾರೆ. ಕಂಡಕಂಡ ಎಲ್ಲ ನಾಯಿಗಳನ್ನು ಕೊಂದಿರುವ ಘಟನೆ ನಡೆದಿದೆ. ಕಳೆದ ಮೂರು ತಿಂಗಳಲ್ಲಿ ನಾಯಿಗಳ ದಾಲಿ ತುತ್ತಾದ 7 ನೇ ಮಗು ನಿಶಾ ಆಗಿದ್ದಾಳೆ.

(ದಟ್ಸ್ ಕನ್ನಡ ವಾರ್ತೆ)