ಹೆಚ್ ಎ ಎಲ್ ನ ಚುಕ್ಕಾಣಿ ಹಿಡಿದ ಕನ್ನಡಿಗ ನಾಯಕ್

ಬೆಂಗಳೂರು, ಮಾ. 31: ಭಾರತದ ಹೆಮ್ಮೆಯ ಸಂಸ್ಥೆ ಹಿಂದೂಸ್ತಾನ್ ಏರೋನಾಟಿಕಲ್ ಲಿಮಿಟೆಡ್ (ಹೆಚ್ ಎ ಎಲ್)ನ ಮುಖ್ಯಸ್ಥರಾಗಿ ಕನ್ನಡಿಗ ಅಶೋಕ್ ನಾಯಕ್ ಅಧಿಕಾರ ವಹಿಸಿಕೊಂಡಿದ್ದಾರೆ. ಬೆಂಗಳೂರಿನಲ್ಲಿ ಸಂಸ್ಥೆಯ ಕೇಂದ್ರ ಕಚೇರಿಯಲ್ಲಿ ಅಶೋಕ್ ಅವರು 15 ನೇ ಮುಖ್ಯ ಅಧಿಕಾರಿಯಾಗಿ ಪದಗ್ರಹಣ ಮಾಡಿದರು.ಪದಚ್ಯುತ ಮುಖ್ಯಸ್ಥ ಅಶೋಕ್ ಬವೇಜಾ ಅವರು ನಾಯಕ್ ಗೆ ಶುಭಕೋರಿದರು.

ಕರ್ನಾಟಕದ ಹೊನ್ನಾವರಮೂಲದ ಅಶೋಕ್ ನಾಯಕ್ , ಬೆಂಗಳೂರು ವಿಶ್ವವಿದ್ಯಾಲಯದಿಂದ ಮೆಕ್ಯಾನಿಕಲ್ ಇಂಜಿನಿಯರ್ ಆಗಿ ಹೊರಬಂದರು. 1973 ರಲ್ಲಿ ಮ್ಯಾನೇಜ್ ಮೆಂಟ್ ಟ್ರೈನಿ ಆಗಿ ಹೆಚ್ ಎ ಎಲ್ ಸೇರಿದರು. ಮೂರು ದಶಕಗಳ ತಮ್ಮ ವೃತ್ತಿ ಜೀವನದಲ್ಲಿ ಅನೇಕ ಸ್ಥಾನ ಮಾನಗಳನ್ನು ಕಂಡವರು. ಉತ್ಪಾದನೆ , ಗುಣಮಟ್ಟ , ಯೋಜನೆ , ಗ್ರಾಹಕ ನಿರ್ವಹಣೆ, ಸೇವಾ ವಿಭಾಗ ಹೀಗೆ ಎಲ್ಲಾ ವಿಭಾಗಗಳಲ್ಲಿ ಪರಿಣತಿ ಹೊಂದಿದ್ದಾರೆ ಅಶೋಕ್ ನಾಯಕ್.

ಏರ್ ಕ್ರಾಫ್ಟ್ ವಿಭಾಗದ ಪ್ರಧಾನ ವ್ಯವಸ್ಥಾಪಕ, ಸಂಸ್ಥೆಯ ವ್ಯವಸ್ಥಾಪಕ ನಿರ್ದೇಶಕರಾಗಿ ಕೂಡ ಸೇವೆ ಸಲ್ಲಿಸಿದ್ದಾರೆ. ಹೆಚ್ ಎ ಎಲ್ ನ ಉತ್ಪನ್ನಗಳ ರಫ್ತು ಹೆಚ್ಚಳ ಸಾಧನೆ ಕಾರಣರಾದ ಅಶೋಕ್ ಹಾಗೂ ಅವರ ತಂಡ ಜಗ್ವಾರ್, ಲಕ್ಷ್ಯ , ಹಾಕ್ ಮುಂತಾದ ಯುದ್ಧ ವಿಮಾನ, ಲಘು ವಿಮಾನ ವಿನ್ಯಾಸ, ತಯಾರಿಸಿ ದೇಶಕ್ಕೆ ಉತ್ತಮ ಕೊಡಗೆ ನೀಡಿದೆ.
(ದಟ್ಸ್ ಕನ್ನಡವಾರ್ತೆ)