ನ್ಯೂಯಾರ್ಕಿನಲ್ಲಿ ಗಾಂಧೀಜಿ ವಸ್ತುಗಳು ಹರಾಜಿಗೆ

ಲಾಸ್ ಏಂಜಲೀಸ್, ಮಾ. 5 : ಮಹಾತ್ಮಾ ಗಾಂಧಿಗೆ ಸೇರಿದ ವಸ್ತುಗಳನ್ನು ಹರಾಜು ಹಾಕುವುದನ್ನು ನಿಲ್ಲಿಸಲು ಹರಾಜುಗಾರ ಜೇಮ್ಸ್ ಓಟಿಸ್ ಭಾರತೀಯ ರಾಯಭಾರಿ ಕಚೇರಿ ಎದಿರು ಎರಡು ಕರಾರುಗಳನ್ನು ಇಟ್ಟಿದ್ದಾರೆ. ಈ ಅಮೂಲ್ಯ ವಸ್ತುಗಳ ಹರಾಜು ನ್ಯೂಯಾರ್ಕ್ ನಲ್ಲಿ ಮಾರ್ಚ್ 5ರಂದು ನಡೆಯಲಿದೆ.

ಮೊದಲ ಷರತ್ತು, ಬಡವರ ಆರೋಗ್ಯಕ್ಕಾಗಿ ಭಾರತೀಯ ಸರ್ಕಾರ ಮೀಸಲಾಗಿಟ್ಟಿರುವ ಬಜೆಟ್ಟನ್ನು ಹೆಚ್ಚಿಸಬೇಕು. ಎರಡನೆಯ ಷರತ್ತು, ವಿಶ್ವದಾದ್ಯಂತ 78 ರಾಷ್ಟ್ರಗಳಲ್ಲಿ ಗಾಂಧೀಜಿಯ ಅಹಿಂಸಾ ತತ್ವವನ್ನು ಪ್ರಚಾರ ಮಾಡುತ್ತಿರುವ ಭಾರತೀಯ ರಾಜತಾಂತ್ರಿಕ ಕಚೇರಿಗೆ ಹಣದ ಸಹಾಯ ಮತ್ತು ಉತ್ತಮ ಸವಲತ್ತುಗಳನ್ನು ನೀಡಬೇಕು. ಗಾಂಧೀಜಿ ಬದುಕಿದ 78 ವರ್ಷಗಳಿಗೆ ಅನುಗುಣವಾಗಿ ಇರುವ 78 ರಾಷ್ಟ್ರಗಳ ಹೆಸರನ್ನು ಓಟಿಸ್ ಪ್ರಸ್ತಾಪಿಸಿದ್ದಾರೆ.

ಮಹಾತ್ಮಾ ಗಾಂಧೀಜಿಗೆ ಸೇರಿದ ಲೋಹದ ಕನ್ನಡಕ, ಕಂಕುಳಲ್ಲಿ ಸಿಕ್ಕಿಸಿಕೊಳ್ಳುತ್ತಿದ್ದ ಗಡಿಯಾರ, ಎರಡು ಜೋಡಿ ಚಪ್ಪಲಿಗಳು, ತಟ್ಟೆ ಮತ್ತು ಒಂದು ಬುಟ್ಟಿ ನ್ಯೂಯಾರ್ಕಿನ ಆಂಟಿಕೋರಮ್ ಆಕ್ಷನೀರ್ಸ್ ನಲ್ಲಿ ಹರಾಜಿಗಿವೆ. ಈ ವಸ್ತುಗಳಿಗೆ ಇಡಲಾಗಿರುವ ಆರಂಭದ ರಿಸರ್ವ್ ಬೆಲೆ 30 ಸಾವಿರ ಡಾಲರ್ ಗೆ ಕೊಳ್ಳುವುದಾಗಿ ಭಾರತೀಯ ಸರ್ಕಾರ ಹೇಳಿರುವುದನ್ನು ಓಟಿಸ್ ತಳ್ಳಿಹಾಕಿದ್ದಾರೆ.

(ದಟ್ಸ್ ಕನ್ನಡ ವಾರ್ತೆ)