ಜೆಪಿ ಮಾರ್ಗನ್ ನ 14 ಸಾವಿರ ಮಂದಿಗೆ ಪಿಂಕ್ ಸ್ಲಿಪ್

ವಾಷಿಂಗ್ ಟನ್, ಮಾ. 3 : ಆರ್ಥಿಕ ಬಿಕ್ಕಟ್ಟು ನೀಡಿರುವ ಭಾರಿ ಹೊಡೆತದಿಂದ ಅಮೆರಿಕ ಸುಧಾರಿಸಿಕೊಳ್ಳಲು ಸಾಕಷ್ಟು ಸಮಯವೇ ಬೇಕಾಗಬಹುದು ಎನ್ನಲಾಗಿದೆ. ದೇಶದ ಪ್ರತಿಷ್ಠಿತ ಬ್ಯಾಂಕ್ ಎಂಬ ಖ್ಯಾತಿ ಗಳಿಸಿದ್ದ ಜೆ ಪಿ ಮಾರ್ಗನ್ ಆರ್ಥಿಕ ಮುಗ್ಗಟ್ಟಿನಿಂದ ಕಂಗಾಲಾಗಿ ಉದ್ಯೋಗಿಗಳಿಗೆ ಪಿಂಕ್ ಸ್ಲಿಪ್ ನೀಡಲು ಮುಂದಾಗಿದೆ.

ಕಳೆದ ನವೆಂಬರ್ ತಿಂಗಳಲ್ಲಿ 9,200 ಸಾವಿರ ಉದ್ಯೋಗಿಗಳಿಗೆ ಪಿಂಕ್ ಸ್ಲಿಪ್ ನೀಡಿದ್ದ ಜೆಪಿ ಮಾರ್ಗನ್ ಬ್ಯಾಂಕ್, ಇದೀಗ ಮತ್ತೆ ಸುಮಾರು 14 ಸಾವಿರ ಉದ್ಯೋಗಿಗಳನ್ನು ಮನೆಗೆ ಕಳುಹಿಸಲು ತಯಾರಿ ನಡೆಸಿದೆ. ವಾಷಿಂಗ್ ಟನ್ ಮ್ಯೂಚುವೆಲ್ ನ 12 ಸಾವಿರ ಜನ ಹಾಗೂ ಇನ್ ವೆಸ್ಟ್ ಮೆಂಟ್ ಘಟಕದಲ್ಲಿ ಕೆಲಸ ನಿರ್ವಹಿಸುತ್ತಿರುವ 2 ಸಾವಿರ ಉದ್ಯೋಗಿಗಳನ್ನು ಮನೆಗೆ ಕಳುಹಿಸಲು ನಿರ್ಧರಿಸಲಾಗಿದೆ ಎಂದು ಬ್ಯಾಂಕ್ ಮೂಲಗಳು ತಿಳಿಸಿವೆ.

ಈ ವರ್ಷದ ತ್ರೈಮಾಸಿಕ ಅವಧಿಯ ಹೋಮ್ ಇಕ್ವಿಟಿಯಲ್ಲಿ ಸುಮಾರು 1 ಬಿಲಿಯನ್ ಡಾಲರ್ ನಷ್ಟ ಉಂಟಾಗಿದೆ. ಸಾಲ ಪಡೆದಿರುವ ಗ್ರಾಹಕರು ಹಣ ತಿರುಗಿಸದಿರುವುದು ಬ್ಯಾಂಕ್ ಸಂಕಷ್ಟಕ್ಕೆ ಪ್ರಮುಖ ಕಾರಣವಾಗಿದೆ. ಈ ಹಿನ್ನೆಲೆಯಲ್ಲಿ ಕಾಸ್ಟ್ ಕಟಿಂಗ್ ಗೆ ಮುಂದಾಗಿದ್ದು, ಬ್ಯಾಂಕ್ ಅಸ್ತಿತ್ವಕ್ಕಾಗಿ ಈ ಕ್ರಮ ಅನಿವಾರ್ಯ ಎಂದು ಬ್ಯಾಂಕ್ ಮೂಲಗಳು ಹೇಳಿವೆ.

(ಏಜನ್ಸೀಸ್)