ಗುಲ್ಬರ್ಗಾ ಪಾಲಿಕೆ, ಕೈಗೆ ಒಲಿದ ಅದೃಷ್ಟ

ಗುಲ್ಬರ್ಗಾ, ಫೆ. 22 : ಗುಲ್ಬರ್ಗಾ ಮಹಾನಗರ ಪಾಲಿಕೆಯ ಎರಡನೇ ಅವಧಿಗಾಗಿ ಮೇಯರ್ ಹಾಗೂ ಉಪಮೇಯರ್ ಆಗಿ 11ನೇ ವಾರ್ಡಿನ ಸದಸ್ಯೆ ಸೈಯಿದಾ ಬೇಗಂ ಹಾಗೂ ಉಪಮೇಯರ್ ಆಗಿ ಪ್ರಮೋದ್ ತಿವಾರಿ ಅವರು ಶನಿವಾರ ಆಯ್ಕೆಯಾಗಿದ್ದಾರೆ.

ಮೇಯರ್ ಸ್ಥಾನಕ್ಕಾಗಿ ಕಾಂಗ್ರೆಸ್‌ನ ಸೈಯಿದಾ ಬೇಗಂ, ಆರತಿ ಎಸ್ ತಿವಾರಿ ಹಾಗೂ ಬಿಜೆಪಿಯ ಚಂದ್ರಕಲಾ ಸಿ ಆಳಂದಕರ್ ಅವರು ನಾಮಪತ್ರ ಸಲ್ಲಿಸಿದ್ದರು. ನಂತರ ಆರತಿ ಎಸ್ ತಿವಾರಿ ಅವರು ನಾಮಪತ್ರ ಹಿಂಪಡೆದ ನಂತರ ಸೈಯಿದಾ ಬೇಗಂ ಮತ್ತು ಚಂದ್ರಕಲಾ ನಡುವೆ ಸ್ಪರ್ಧೆ ಏರ್ಪಟಿತ್ತು. ಒಟ್ಟು 60 ಸದಸ್ಯ ಬಲ ಇರುವ ಸಭೆಯಲ್ಲಿ 57 ಮಂದಿ ಪಾಲ್ಗೊಂಡಿದ್ದರು.

ನಿರ್ಗಮಿತ ಮಹಾಪೌರ ರವೀಂದ್ರನಾಥ್ ಸಿ ಹೊನ್ನಾಳಿ ಅವರ ಅಧ್ಯಕ್ಷತೆಯಲ್ಲಿ ನಡೆದ ಚುನಾವಣೆಯಲ್ಲಿ ಸೈಯಿದಾ ಪರವಾಗಿ 37 ಮತಗಳು ಹಾಗೂ ವಿರುದ್ಧ 19 ಮತಗಳು ಹಾಗೂ ಚಂದ್ರಕಲಾ ಪರ 19 ಮತಗಳು ಹಾಗೂ ವಿರುದ್ಧ 32 ಮತಗಳು ಚಲಾವಣೆಯಾದ್ದರಿಂದ ಪಾಲಿಕೆ ಕೌನ್ಸಿಲ್ ಸೆಕ್ರೆಟರಿ ವಿಷ್ಣುಪಂತ್ ಅವರು ಕಾಂಗ್ರೆಸ್‌ನ ಸೈಯಿದಾ ಬೇಗಂ ಅವರ ಗೆಲುವನ್ನು ಘೋಷಿಸಿದರು.

ಉಪಮೇಯರ್ ಸ್ಥಾನವು ಸಹ ಕಾಂಗ್ರೆಸ್‌ನ ಪಾಲಾಯಿತು. ಈ ಸ್ಥಾನಕ್ಕೆ ಕಾಂಗ್ರೆಸ್‌ನ ಪ್ರಮೋದ್ ತಿವಾರಿ ಹಾಗೂ ಬಿಜೆಪಿಯ ರಾಜಗೋಪಾಲ್ ರೆಡ್ಡಿ ಅವರು ಸ್ಪರ್ಧಿಸಿದ್ದರು. 32 ಮತಗಳನ್ನು ಪಡೆದ ಪ್ರಮೋದ್ ತಿವಾರಿ ಅವರು 20 ಮತಗಳನ್ನು ಪಡೆದ ರಾಜಗೋಪಾಲ್‌ರೆಡ್ಡಿ ಹಿಂದಿಕ್ಕಿ ಉಪಮೇಯರ್ ಆಗಿ ಆಯ್ಕೆಯಾದರು.

(ದಟ್ಸ್ ಕನ್ನಡ ವಾರ್ತೆ)
249 ಗ್ರಾಮ ಪಂಚಾಯತಿ‌ಗಳು ಮೇಲ್ದರ್ಜೆಗೆ