ಆಕಾಶ ತಾರೆಗಳನ್ನು ತಾಕಿದ ಚಿನ್ನದ ಬೆಲೆ

ನವದೆಹಲಿ ಫೆ 18: ಹಳದಿ ಲೋಹ ಚಿನ್ನ ಮತ್ತೆ ಫಳಫಳ ಎಂದು ಪ್ರಕಾಶಿಸುತ್ತಿದೆ. ಷೇರುಪೇಟೆಯ ಸತತ ಕುಸಿತದ ಕಾರಣ ಚಿನ್ನದ ಬೆಲೆ ಅಂಬರಕ್ಕೇರಿದೆ. ಹೂಡಿಕೆದಾರರು ಬಂಡವಾಳ ಪೇಟೆಯಿಂದ ಚಿನಿವಾರ ಪೇಟೆಯತ್ತ ಮುಖಮಾಡಿದ ಪರಿಣಾಮ ಚಿನ್ನದ ಬೆಲೆ ಇದುವರೆಗಿನ ಎಲ್ಲಾ ದಾಖಲೆಗಳನ್ನು ಮೀರಿ ಐತಿಹಾಸಿಕ ಗರಿಷ್ಠ 15,000(10 ಗ್ರಾಂ) ರುಪಾಯಿ ದಾಟಿದೆ.

ಮಂಗಳವಾರ ರಾಜಧಾನಿ ದೆಹಲಿಯಲ್ಲಿ 10 ಗ್ರಾಂ ಶುದ್ದ ಚಿನ್ನದ ಬೆಲೆ ಅತಿ ಗರಿಷ್ಠ ಏರಿಕೆ ಕಂಡು 15,420 ರೂಪಾಯಿನಲ್ಲಿ ಅಂತ್ಯಗೊಂಡರೆ, ಜಾಗತಿಕ ಮಾರುಕಟ್ಟೆಯಲ್ಲಿ ಒಂದು ಔನ್ಸ್ ಚಿನ್ನದ ಬೆಲೆ 960 ಡಾಲರ್ ತಲುಪಿದೆ. ಬೆಳ್ಳಿಯ ಬೆಲೆಯೂ ದುಬಾರಿಯಾಗಿದ್ದು ದೆಹಲಿ ಮಾರುಕಟ್ಟೆಯಲ್ಲಿ 1 ಕೆ.ಜಿಗೆ 820 ರುಪಾಯಿಯಷ್ಟು ಏರಿಕೆಯಾಗಿ 21,920 ರುಪಾಯಿ ತಲುಪಿದೆ. ಅತೀ ಶೀಘ್ರದಲ್ಲೇ 10 ಗ್ರಾಂ ಚಿನ್ನದ ಬೆಲೆ 16,000 ರೂಪಾಯಿಗಿಂತಲೂ ಹೆಚ್ಚು ದಾಟಲಿದೆ ಎಂದು ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ.

ಕಳೆದ ಮೂರು ತಿಂಗಳಲ್ಲಿ ಚಿನ್ನದ ಬೆಲೆ ಶೇ.30 ರಷ್ಟು ಏರಿಕೆಯಾಗಿದೆ. ಫೆಬ್ರವರಿ ತಿಂಗಳಲ್ಲಿ ಭಾರತದ ಚಿನ್ನದ ಆಮದು ಸೊನ್ನೆ ಎಂದು ಬಾಂಬೆ ಚಿನಿವಾರ ಪೇಟೆ ಕೂಟ ತಿಳಿಸಿದೆ. ಚಿನ್ನದ ಬೆಲೆ ಏರಿಕೆಯಾಗಿರುವುದು ಮತ್ತು ರೂಪಾಯಿ ಮೌಲ್ಯ ಕುಸಿತದ ಕಾರಣ ಭಾರತದ ಚಿನ್ನದ ಆಮದು ಸೊನ್ನೆ ಪ್ರಮಾಣಕ್ಕೆ ತಲುಪಿದೆ ಎನ್ನಲಾಗಿದೆ.

(ಏಜೆನ್ಸೀಸ್)