ಫೆ. 20 ರಿಂದ ಸಿಇಟಿ ಪ್ರವೇಶ ಅರ್ಜಿ ವಿತರಣೆ

ಬೆಂಗಳೂರು, ಫೆ. 16 : ವೃತ್ತಿಪರ ಕೋರ್ಸ್ ಗಳ ಪ್ರವೇಶಕ್ಕಾಗಿ ನಡೆಸಲಾಗುವ ಈ ಬಾರಿಯ ಸಾಮಾನ್ಯ ಪ್ರವೇಶ ಪರೀಕ್ಷೆ(ಸಿಇಟಿ)ಯ ಪ್ರವೇಶ ಅರ್ಜಿಗಳನ್ನು ಫೆ. 20 ರಿಂದ ವಿತರಿಸಲಾಗುವುದು ಎಂದು ಉನ್ನತ ಶಿಕ್ಷಣ ಸಚಿವ ಅರವಿಂದ ಲಿಂಬಾವಳಿ ಹೇಳಿದ್ದಾರೆ.

ಈ ಮುಂಚೆ ಡಿಡಿ ಮುಖಾಂತರ ಹಣ ಪಾವತಿಸಿದ ಅಭ್ಯರ್ಥಿಗಳಿಗೆ ಅರ್ಜಿಗಳನ್ನು ಆಯಾ ಕಾಲೇಜಿನಲ್ಲಿ ನೀಡಲಾಗುತ್ತದೆ. ಹಂತ ಹಂತವಾಗಿ ವಿವಿಧ ಕಾಲೇಜುಗಳಿಗೆ ಅರ್ಜಿಗಳನ್ನು ರವಾನಿಸಲಾಗಿದೆ ಎಂದು ಕರ್ನಾಟಕ ಪರೀಕ್ಷಾ ಪ್ರಾಧಿಕಾರ(KEA) ತಿಳಿಸಿದೆ.

ಭರ್ತಿ ಮಾಡಿದ ಅರ್ಜಿಗಳನ್ನು ಸಂಬಂಧಪಟ್ಟ ಕಾಲೇಜಿನ ಪ್ರಾಂಶುಪಾಲರಿಗೆ ತಲುಪಿಸಲು ಫೆ. 26 ಕೊನೆ ದಿನಾಂಕವಾಗಿರುತ್ತದೆ. ಸ್ವೀಕೃತ ಅರ್ಜಿಯನ್ನು ಪ್ರಾಂಶುಪಾಲರು ಕೆಇಎಗೆ ಫೆ. 28ರೊಳಗೆ ಕಳುಹಿಸಬೇಕಾಗಿದೆ. ಹೊರ ರಾಜ್ಯದ ಅಭ್ಯರ್ಥಿಗಳಿಗೂ ಈ ದಿನಾಂಕಗಳು ಅನ್ವಯವಾಗುತ್ತದೆ. ಪ್ರವೇಶ ಪತ್ರ(ಹಾಲ್ ಟಿಕೆಟ್ )ಗಳನ್ನು ಏ.18 ರಂದು ನೀಡಲಾಗುವುದು. ಏ. 29 ಹಾಗೂ ಏ.30 ರಂದು ಸಿಇಟಿ ನಡೆಯಲಿದೆ . ಗಡಿನಾಡು ಹಾಗೂ ಇತರೆ ರಾಜ್ಯದ ಅಭ್ಯರ್ಥಿಗಳಿಗೆ ಕನ್ನಡ ಸಿಇಟಿ ಮೇ.1 ರಂದು ನಡೆಯಲಿದೆ.

ಸಿಇಟಿಯ ಕೀ ಉತ್ತರಗಳನ್ನು ಮೇ.6 ರಂದು ಪ್ರಕಟಿಸಲಾಗುವುದು. ಅರ್ಜಿ ಸಲ್ಲಿಕೆಯ ದಿನಾಂಕದಲ್ಲಿ ವ್ಯತ್ಯಯವಾದರೆ ಪರೀಕ್ಷಾ ಪ್ರಾಧಿಕಾರ ಸದ್ಯದಲ್ಲೇ ಪ್ರಕಟಣೆ ನೀಡಲಿದೆ ಎಂದು ಸಚಿವ ಲಿಂಬಾವಳಿ ಹೇಳಿದರು.

(ದಟ್ಸ್ ಕನ್ನಡ ವಾರ್ತೆ)