ಇದು ಇತಿಹಾಸದಲ್ಲೇ ಅತಿ ಭೀಕರ ಕಾಡ್ಗಿಚ್ಚು

ಮೆಲ್ಬೋರ್ನ, ಫೆ. 9 : ಇತಿಹಾಸದಲ್ಲೇ ಅತೀ ಭೀಕರ ಎನ್ನಲಾದ ಕಾಡ್ಗಿಚ್ಚು ಆಸ್ಟ್ರೇಲಿಯಾದ ಆಗ್ನೇಯ ರಾಜ್ಯ ವಿಕ್ಟೋರಿಯದಲ್ಲಿ ಆವರಿಸಿಕೊಂಡಿದ್ದು ಈಗಾಗಲೆ ಸುಮಾರು 131 ಕ್ಕೂ ಹೆಚ್ಚು ಜನ ಇದಕ್ಕೆ ಬಲಿಯಾಗಿದ್ದಾರೆ ಎಂದು ವರದಿಯಾಗಿದೆ. 2 ಲಕ್ಷ ಹೆಕ್ಟೇರ್ ಪ್ರದೇಶಗಳು ಅಗ್ನಿಗಾಹುತಿಯಾಗಿದ್ದು ಬೆಂಕಿ ನಂದಿಸಲು 3000 ಅಗ್ನಿಶಾಮಕದಳದ ಸಿಬ್ಬಂದಿ ಹರಸಾಹಸಪಡುತ್ತಿದ್ದಾರೆ.

ಬೆಂಕಿ ಉರಿಯುತ್ತಿರುವ ಪ್ರದೇಶದ ಸುತ್ತಮುತ್ತಲಿಂದ ಜನರನ್ನು ಬೇರೆ ಕಡೆ ಸ್ಥಳಾಂತರಿಸಲಾಗುತ್ತಿದ್ದು , ಕಾಡ್ಗಿಚ್ಚು ಇನ್ನಷ್ಟು ವ್ಯಾಪಕವಾಗಬಹುದು ಎಂದು ಆಸ್ಟ್ರೇಲಿಯಾ ಸರಕಾರ ಎಚ್ಚರಿಕೆ ನೀಡಿದೆ. ಕಿಂಗ್ ಲೇಕ್ ಪ್ರದೇಶದ 640 ಮನೆಗಳು ಭಸ್ಮ ಗೊಂಡಿವೆ. ಪರಿಸ್ಥಿತಿಯ ಭೀಕರತೆ ಅರಿತ ಪ್ರಧಾನಿ ಕೆವಿನ್ ರೊಡ್ ಸ್ಥಳಕ್ಕೆ ಧಾವಿಸಿದ್ದು ಪರಿಹಾರ ಕಾರ್ಯದ ಮುತುವರ್ಜಿ ವಹಿಸಿಕೊಂಡಿದ್ದಾರೆ. 1983 ರಲ್ಲಿ ಸಂಭವಿಸಿದ ಕಾಡ್ಗಿಚ್ಚಿಗೆ 75 ಮಂದಿ ಸಜೀವ ದಹನಗೊಂಡಿದ್ದರು.

(ದಟ್ಸ್ ಕನ್ನಡ ವಾರ್ತೆ)