ಇನ್ಫೋಸಿಸ್ ನಲ್ಲಿ ಸಿಬ್ಬಂದಿ ಕಡಿತ ಸಾಧ್ಯತೆ

ನವದೆಹಲಿ, ಫೆ. 6 : ಜಾಗತಿಕ ಮಾರುಕಟ್ಟೆಯಲ್ಲಿ ಆಗಿರುವ ಆರ್ಥಿಕ ಕುಸಿತದ ಬಿಸಿ ಬೆಂಗಳೂರು ಮೂಲದ ಭಾರತದ ಪ್ರತಿಷ್ಠಿತ ಸಾಫ್ಟವೇರ್ ಕಂಪನಿ ಇನ್ಫೋಸಿಸ್ ಗೂ ತಟ್ಟಿದೆ. ಕಡಿಮೆ ಸಾಮರ್ಥ್ಯ ಹೊಂದಿದ ಉದ್ಯೋಗಿಗಳ ಮೇಲೆ ಹದ್ದಿನ ಕಣ್ಣು, ಹೊಸ ನೇಮಕಾತಿ ಅಸಾಧ್ಯ, ಆದಾಯಕ್ಕೆ ತಕ್ಕಂತೆ ಸಂಬಳ ಏರಿಕೆ ಮಾಡುವುದಾಗಿ ಹೇಳಿದೆ. ಈ ಮೂಲಕ ಯುಗಾದಿ ಮುನ್ನ ಇನ್ಫೋಸಿಸ್ ಉದ್ಯೋಗಿಗಳಿಗೆ ಕಹಿ ಸುದ್ದಿಯೊಂದು ಬಂದಂತಾಗಿದೆ.

ಆರ್ಥಿಕ ಬಿಕ್ಕಟ್ಟಿನ ಹಿನ್ನೆಲೆಯಲ್ಲಿ ಕಂಪನಿಯ ಉದ್ಯೋಗಿಗಳಿಗೆ ಈ ವರ್ಷ ಸಂಬಳ ಹೆಚ್ಚಳವಿಲ್ಲ. ಮುಂದಿನ ದಿನಗಳಲ್ಲಿ ಮಾರುಕಟ್ಟೆ ಕುಸಿತ ಮುಂದುವರೆದಲ್ಲಿ ಉದ್ಯೋಗಿಗಳ ಸಂಬಳಕ್ಕೆ ಕತ್ತರಿ ಹಾಕುವ ನಿಟ್ಟಿನಲ್ಲಿ ಕಂಪನಿ ಚಿಂತನೆ ನಡೆಸಿದೆ. ಹೊಸ ನೇಮಕಾತಿ ಸಂಪೂರ್ಣ ಸ್ಥಗಿತಗೊಳಿಸಲಾಗಿದೆ. ಕಂಪನಿಯ ಆದಾಯಕ್ಕೆ ತಕ್ಕಂತೆ ಉದ್ಯೋಗಿಗಳ ಸಂಬಳವಿರುತ್ತದೆ. ಆದರೆ ಕಂಪನಿಯ ಆದಾಯದಲ್ಲಿ ಇಳಿಮುಖ ಕಂಡರೆ ವೇತನವೂ ಕಡಿಮೆ ಆಗುವುದು ಸಹಜ ಎಂದು ಇನ್ಫೋಸಿಸ್ ಕಂಪನಿ ಮಾನವ ಸಂಪನ್ಮೂಲ ವಿಭಾಗದ ನಿರ್ದೇಶಕ ಮೋಹನ್ ದಾಸ್ ಪೈ ಸ್ಪಷ್ಟಪಡಿಸಿದ್ದಾರೆ.

ನವದೆಹಲಿಯ ಕಾರ್ಯಕ್ರಮವೊಂದರಲ್ಲಿ ಭಾಗವಹಿಸಿದ್ದ ಸಂದರ್ಭದಲ್ಲಿ ಮಾಧ್ಯಮ ಪ್ರತಿನಿಧಿಗಳೊಂದಿಗೆ ಮಾತನಾಡಿದ ಅವರು, ಜಾಗತಿಕ ಹಿಂಜರಿತ ಕಾರಣ ಸಾಫ್ಟವೇರ್ ರಫ್ತು ಮತ್ತು ಹೊರಗುತ್ತಿಗೆ ವ್ಯವಹಾರಗಳಿಗೆ ಹೊಡೆತ ಬೀಳಲಿದೆ. ಇದರಿಂದ ಸಂಬಳ ಏರಿಕೆ ಅಸಾಧ್ಯ ಎಂದರು. ಕಳೆದ ವರ್ಷ ಕ್ಯಾಂಪಸ್ ಸಂದರ್ಶನದಲ್ಲಿ ಆಯ್ಕೆಯಾದ 20 ಸಾವಿರ ಜನರ ನೇಮಕ ಮಾಡಿಕೊಳ್ಳಲಾಗುವುದು ಎಂದು ಮೋಹನ್ ದಾಸ್ ಪೈ ತಿಳಿಸಿದರು.

(ಏಜೆನ್ಸೀಸ್)