ಏಪ್ರೀಲ್-ಮೇ ನಲ್ಲಿ ಲೋಕಸಭೆ ಚುನಾವಣೆ, ಆಯೋಗ

ಲಂಡನ್, ಜ. 28 : ಏಪ್ರಿಲ್ 8 ರಿಂದ ಮೇ 15 ರೊಳಗೆ ಲೋಕಸಭೆ ಚುನಾವಣೆಗಳು ನಡೆಸುವ ಚಿಂತನೆ ನಡೆಸಲಾಗಿದೆ ಎಂದು ಕೇಂದ್ರ ಚುನಾವಣೆ ಆಯೋಗ ಮುಖ್ಯ ಆಯುಕ್ತ ಎಸ್ ವೈ ಖುರೇಶಿ ಹೇಳಿದರು. ಆದರೆ, ದಿನಾಂಕ ಇನ್ನೂ ನಿಗದಿ ಮಾಡಿಲ್ಲ. ಶೀಘ್ರದಲ್ಲಿ ಅಧಿಕೃತ ದಿನಾಂಕಗಳನ್ನು ಪ್ರಕಟಿಸಲಾಗುವುದು ಎಂದು ಅವರು ಸ್ಪಷ್ಟಪಡಿಸಿದರು.

ಲಂಡನ್ನಿನ ಭಾರತೀಯ ಭವನದಲ್ಲಿ ಏರ್ಪಡಿಸಲಾಗಿದ್ದ ಕಾರ್ಯಕ್ರಮದಲ್ಲಿ ಪಾಲ್ಗೊಂಡು ಜಮ್ಮು ಕಾಶ್ಮೀರ ಚುನಾವಣೆ 2008 ಎಂಬ ವಿಷಯದ ಮೇಲೆ ಭಾಷಣ ಮಾಡುತ್ತಿದ್ದ ಸಂದರ್ಭದಲ್ಲಿ ಈ ವಿಷಯವನ್ನು ಅವರು ಸ್ಪಷ್ಟಪಡಿಸಿದರು. ಲೋಕಸಭೆ ಚುನಾವಣೆಗೆ ಸಂಬಂಧಿಸಿದಂತೆ ಎಲ್ಲ ಸಿದ್ದತೆಗಳನ್ನು ಈಗಾಗಲೇ ಮಾಡಿಕೊಳ್ಳಲಾಗಿದೆ. ದಿನಾಂಕಗಳ ನಿಗದಿಗೆ ಇನ್ನೊಂದು ಬಾರಿ ಸಭೆ ಸೇರಿ ಅಂತಿಮ ದಿನಾಂಕಗಳನ್ನು ಪ್ರಕಟಿಸಲಾಗುವುದು ಎಂದರು.

2008ರಲ್ಲಿ ನಡೆದ ಜಮ್ಮು ಕಾಶ್ಮೀರ ಚುನಾವಣೆಗಳು ಕೇಂದ್ರ ಚುನಾವಣೆ ಆಯೋಗ ದೊಡ್ಡ ಸಾಧನೆ. ಏಳು ಹಂತದಲ್ಲಿ ನಡೆಸಲಾದ ಚುನಾವಣೆಯಲ್ಲಿ ಸಣ್ಣ ಪುಟ್ಟ ಗಲಾಟೆಗಳನ್ನು ಹೊರತುಪಡಿಸಿ ಚುನಾವಣಾ ಪ್ರಕ್ರಿಯೆಗಳನ್ನು ಮುಕ್ತ ಹಾಗೂ ನ್ಯಾಯಾ ಸಮ್ಮತವಾಗಿ ಮುಗಿಸಲಾಯಿತು ಎಂದು ಹೇಳಿದರು. ಕಣಿವೆ ರಾಜ್ಯದಲ್ಲಿ ಹವಾಮಾನದ ವೈಪರೀತ್ಯದ ನಡುವೆಯೂ ಶೇ. 61.5 ರಷ್ಟು ಮತದಾನ ಆಗಿದೆ. ಈ ಸಾಧನೆ ಇಂದಿನ ಚುನಾವಣಾ ಆಯೋಗಕ್ಕೆ ಸಲ್ಲಬೇಕು ಎಂದು ಖುರೇಶಿ ಹೇಳಿದರು. ಇಂಗ್ಲೆಂಡ್ ನಲ್ಲಿರುವ ಭಾರತೀಯ ರಾಯಭಾರಿ ಶಿವಶಂಕರ ಮುಖರ್ಜಿ ಈ ಸಂದರ್ಭದಲ್ಲಿ ಉಪಸ್ಥಿತರಿದ್ದರು.

(ದಟ್ಸ್ ಕನ್ನಡ ವಾರ್ತೆ)