ಉದ್ಯೋಗಿಗಳ ಸಂಬಳ ಏರಿಕೆ ಇಲ್ಲ, ಯಾಹೂ

ವಾಷಿಂಗ್ ಟನ್, ಜ. 27 : ಆರ್ಥಿಕ ಬಿಕ್ಕಟ್ಟಿನ ಹಿನ್ನೆಲೆಯಲ್ಲಿ ಈ ವರ್ಷ ಕಂಪನಿಯ ಉದ್ಯೋಗಿಗಳ ಸಂಬಳ ಏರಿಸದಿರಲು ಅಂತರ್ಜಾಲ ಕ್ಷೇತ್ರದ ಪ್ರಮುಖ ಕಂಪನಿ ಯಾಹೂ ನಿರ್ಧರಿಸಿದೆ.

ಆರ್ಥಿಕ ಬಿಕ್ಕಟ್ಟನಿಂದ ಕಂಪನಿಯ ಆದಾಯದ ಮೂಲಕ್ಕೆ ಭಾರಿ ಹೊಡೆತ ಬಿದ್ದಿದೆ. ಇದನ್ನು ಸುಧಾರಿಸಿಕೊಂಡು ಕಂಪನಿಯನ್ನು ಮುನ್ನೆಡೆಸುವುದು ದೊಡ್ಡ ಸಾಹಸದ ಕೆಲಸವಾಗಿದೆ. ಇಂತಹ ಕ್ಲಿಷ್ಟಕರ ಸನ್ನಿವೇಶದಲ್ಲಿ ಕಂಪನಿಯ ಉದ್ಯೋಗಿಗಳಿಗೆ ಸಂಬಳ ಹೆಚ್ಚಳ ಮಾಡುವ ಕುರಿತು ಅಂತಿಮ ತೀರ್ಮಾನ ಕೈಗೊಂಡಿಲ್ಲ. ಇದು ಈ ವರ್ಷ ಅಸಾಧ್ಯದ ಕೆಲಸವಾಗಿದೆ. ಈ ಕುರಿತು ಕಂಪನಿ ಉದ್ಯೋಗಿಗಳಿಗೆ ಮನವರಿಕೆ ಮಾಡಿಕೊಡಲಾಗುವುದು ಎಂದು ಯಾಹೂ ಕಂಪನಿ ವಕ್ತಾರ ಕಿಮ್ ರೂಬೆ ತಿಳಿಸಿದ್ದಾರೆ.

2009ರಲ್ಲಿ ಕಂಪನಿ ಉದ್ಯೋಗಿಗಳ ಸಂಬಳ ಹೆಚ್ಚಳ ಮಾಡದಿರಲು ಯಾಹೂ ಕಂಪನಿಯ ನೂತನ ಸಿಇಒ ಕರೋಲ್ ಬಾರ್ಟ್ಸ್ ಸೂಚಿಸಿದ್ದಾರೆ. ಕಳೆದ ಎರಡು ವಾರಗಳ ಹಿಂದೆ ಯಾಹೂ ಕಂಪನಿಯ ನೂತನ ಸಿಇಒ ಆಗಿ ಕರೋಲ್ ಬಾರ್ಟ್ಸ್ ಅಧಿಕಾರ ವಹಿಸಿಕೊಂಡಿದ್ದಾರೆ. ಯಾಹೂ ಕಂಪನಿ ಸ್ಥಾಪಕ ಜೆರ್ರಿ ಯಾಂಗ್ ಮೂರು ತಿಂಗಳ ಹಿಂದೆ ಸಿಇಒ ಸ್ಥಾನಕ್ಕೆ ರಾಜೀನಾಮೆ ನೀಡಿದ್ದರು.

(ಏಜೆನ್ಸೀಸ್)