ಬಿದ್ದಪನಿಗಾಗಿ ಬೆಕ್ಕಿನ ನಡಿಗೆ ಇಟ್ಟ ರಮ್ಯ

ಬೆಂಗಳೂರು, ಜ. 21: ಫ್ಯಾಷನ್ ಸಿಟಿ , ಪ್ಯಾರೀಸ್ ಆಫ್ ಈಸ್ಟ್ ಎಂಬ ಹೆಗ್ಗಳಿಕೆ ಗಳಿಸಿರುವ ನಮ್ಮ ಬೆಂಗಳೂರು , ಸೋಮವಾರ ರಾತ್ರಿ ರಂಗು ರಂಗಾದ ಫ್ಯಾಷನ್ ಷೋವನ್ನು ಕಂಡಿತು. ಪ್ರದೀಪ್ ಹಿರಾನಿ ಒಡೆತನದ 'ಕಿಮಯಾ ಫ್ಯಾಷನ್ ಔಟ್ ಲೆಟ್ 'ಗಳನ್ನು ಬೆಂಗಳೂರು ಸೇರಿದಂತೆ ದೆಹಲಿ, ಚೆನ್ನೈನಲ್ಲಿ ವೈಭವಯುತವಾಗಿ ಆರಂಭಿಸಲಾಯಿತು. ನಗರದಲ್ಲಿ ಪ್ರಸಾದ್ ಬಿದ್ದಪ್ಪ ಸಾರಥ್ಯದ ಫ್ಯಾಷನ್ ಷೋ ಮೂಲಕ ಮಳಿಗೆಯ ಉದ್ಘಾಟನೆಯನ್ನು ಮಾಡಲಾಯಿತು. ಷೋ ಟಾಪರ್ ಆಗಿ ನಟಿ ರಮ್ಯಾ ಕಾಣಿಸಿಕೊಂಡಿದ್ದು ಎಲ್ಲರ ಗಮನ ಸೆಳೆಯಿತು.

ಫ್ಯಾಷನ್ ಪಾರ್ಟಿಗಳಲ್ಲಿ ಖಾಯಂ ಆಗಿರುವ ನಂದಿನಿ ಆಳ್ವ, ಪಂಕಜ್ ಅಡ್ವಾಣಿ, ಕ್ಯಾಪ್ಟನ್ ಗೋಪಿನಾಥ್, ನಟ ದಿಗಂತ್ ಸೇರಿದಂತೆ ಹಲವರು ಕಾಣಿಸಿಕೊಂಡರು. ಆದರೆ ಪ್ರಮುಖ ಆಕರ್ಷಣೆಯಾಗಿದ್ದು, ರಮ್ಯಾ ಅವರ ನಡಿಗೆ ಹಾಗೂ ವಸ್ತ್ರ ವಿನ್ಯಾಸ. ಮೇಕಪ್ ಮಾತ್ರ ಅಷ್ಟು ಸರಿ ಕಾಣಲಿಲ್ಲ. ದಿಟ್ಟಿಸಿ ನೋಡಿದರೆ ಮಾತ್ರ ಇದು ರಮ್ಯ ಎಂದು ಕಾಣುವಂತಿತ್ತು. ಉಳಿದಂತೆ ಮದ್ಯದ ದೊರೆ ಮಲ್ಯ ಕಪ್ಪು ಬಣ್ಣದ ಸೂಟ್ ಧರಿಸಿ ಮಿಂಚಿದರು. ಇದೇ ರೀತಿಯ ಮಳಿಗೆಯನ್ನು ಚೆನ್ನೈ ನ ನುಂಗಂಬಾಕ್ಕಂನಲ್ಲಿ ನಟಿ ಶ್ರೀದೇವಿ ಉದ್ಘಾಟಿಸಿದರು.