ಪೆಟ್ರೋಲ್-ಡೀಸೆಲ್-ಎಲ್ ಪಿ ಜಿ ದರ ಇಳಿಕೆ ಸಂಭವ
ನವದೆಹಲಿ, ಜ. 10 : ಆರ್ಥಿಕ ಸಂಕಷ್ಟ, ಬೆಲೆ ಏರಿಕೆ, ತೈಲ ಕಂಪನಿಗಳ ಮುಷ್ಕರದಿಂದ ಕಂಗೆಟ್ಟಿದ್ದ ದೇಶದ ಜನತೆಗೆ ಸಂತಸದ ಸುದ್ದಿಯೊಂದು ಕೇಂದ್ರದಿಂದ ಹೊರಬಿದ್ದಿದೆ. ಜಾಗತಿಕವಾಗಿ ಕಚ್ಚಾ ತೈಲದ ಬೆಲೆ ಇಳಿದಿರುವ ಹಿನ್ನೆಲೆಯಲ್ಲಿ ಪೆಟ್ರೋಲ್, ಡೀಸೆಲ್ ಮತ್ತು ಎಲ್ ಪಿ ಜಿ ಬೆಲೆಯನ್ನು ಇಳಿಸಲು ಕೇಂದ್ರ ಸರ್ಕಾರ ನಿರ್ಧರಿಸಿದೆ.
ಪೆಟ್ರೋಲ್ ದರದಲ್ಲಿ 5 ರು., ಡೀಸೆಲ್ ದರದಲ್ಲಿ 3 ರು. ಮತ್ತು ಎಲ್ ಪಿ ಜಿ ದರದಲ್ಲಿ 25 ಇಳಿಸುವ ಸೂಚನೆಯನ್ನು ಪೆಟ್ರೋಲಿಯಂ ಖಾತೆ ಸಚಿವ ಮುರಳಿ ದೇವೊರಾ ನೀಡಿದ್ದಾರೆ. ಈ ಕುರಿತು ಶೀಘ್ರದಲ್ಲೇ ಅಂತಿಮ ನಿರ್ಧಾರ ಕೇಂದ್ರ ಕೈಗೊಳ್ಳಲಿದೆ.
ಆದರೆ, ಬೆಲೆ ಇಳಿಕೆಯ ಪ್ರಮಾಣದ ಬಗ್ಗೆ ಎಲ್ಲ ವಲಯಗಳಿಂದ ಅಸಮಾಧಾನ ವ್ಯಕ್ತವಾಗಿದೆ. ಕಚ್ಚಾ ತೈಲದ ಬೆಲೆ ಬ್ಯಾರೆಲ್ ಗೆ 40 ಡಾಲರ್ ಗಿಂತ ಕಡಿಮೆಯಿದ್ದರೂ ತೈಲೋತ್ಪನ್ನಗಳ ಬೆಲೆ ಇಳಿತದ ಪ್ರಮಾಣ ತುಂಬಾ ಕಡಿಮೆ ಎಂಬ ಮಾತುಗಳು ಕೇಳಿಬರುತ್ತಿವೆ. ಅಲ್ಪ ಪ್ರಮಾಣದಲ್ಲಿ ಬೆಲೆ ಇಳಿಸಿ ಜನಸಾಮಾನ್ಯರ ಮೂಗಿಗೆ ಕೇಂದ್ರ ತುಪ್ಪ ಸವರುತ್ತಿದೆ ಎಂಬ ಅಭಿಪ್ರಾಯ ವ್ಯಕ್ತವಾಗಿದೆ.
ಒಂದೇ ಸಮಾಧಾನದ ಸಂಗತಿಯೆಂದರೆ, ಎಲ್ ಪಿ ಜಿ ಬೆಲೆಯಲ್ಲಿ 25 ರು.ಯಷ್ಟು ಇಳಿಸಲು ನಿರ್ಧಸಿರಿಸುವುದು. ಕಳೆದ ಬಾರಿ ಪೆಟ್ರೋಲ್ ಮತ್ತು ಡೀಸೆಲ್ ಬೆಲೆ ಇಳಿಸಿದಾಗ ಎಲ್ ಪಿ ಜಿ ಬೆಲೆಯನ್ನು ಕಡಿಮೆ ಮಾಡಿರಲಿಲ್ಲ. ಆದರೂ, ಲಾರಿ ಮುಷ್ಕರದಿಂದಾಗಿ ಸಿಲಿಂಡರುಗಳು ಗ್ರಾಹಕರಿಗೆ ತಲುಪುತ್ತಿಲ್ಲ.
(ದಟ್ಸ್ ಕನ್ನಡ ವಾರ್ತೆ)