ನೌಕರರ ವಿರುದ್ಧ ಮೈಕ್ರೋಸಾಫ್ಟ್ ಹಾರ್ಡ್ ನಿಲುವು

ಲಂಡನ್, ಜ. 3 : ಆರ್ಥಿಕ ಹೊಡೆತದಿಂದಾಗಿ ಸಾಫ್ಟ್ ವೇರ್ ಉದ್ಯಮದಲ್ಲಿನ ಘಟಾನುಘಟಿ ಕಂಪನಿಗಳೆಲ್ಲ ಸಾವಿರಾರು ನೌಕರರನ್ನು ಪಿಂಕ್ ಸ್ಲಿಪ್ ನೀಡಿ ಮನೆಗೆ ಕಳಿಸಿವೆ. ಅನೇಕ ಕಂಪನಿಗಳು ಕಣ್ಣುಮುಚ್ಚಿವೆ. ಸತ್ಯಂ ಅಂತೂ ದಿವಾಳಿಯ ಅಂಚಿಗೆ ಬಂದು ನಿಂತಿದೆ. ಇಷ್ಟು ದಿನ ಬಾಯಿಮುಚ್ಚಿ ಕುಳಿತಿದ್ದ ಸಾಫ್ಟ್‌ವೇರ್ ದೈತ್ಯ ಮೈಕ್ರೋಸಾಫ್ ಈಗ ತನ್ನ ನೌಕರರ ವಿರುದ್ಧ ಹಾರ್ಡ್ ನಿಲುವನ್ನು ತಾಳಿದೆ.

ಸಂಕ್ರಾಂತಿ ಹಬ್ಬದ ಮರುದಿನವೇ ಅಂದರೆ ಜನವರಿ 15ರಂದು 15 ಸಾವಿರ ನೌಕರರನ್ನು ಮನೆಗೆ ಕಳಿಸುವ ಪ್ರಕ್ರಿಯೆಗೆ ಮೈಕ್ರೋಸಾಫ್ಟ್ ಚಾಲನೆ ನೀಡಲಿದೆ ಎಂದು ತಂತ್ರಜ್ಞಾನ ಬ್ಲಾಗ್ ಸೈಟ್ ಪಡ್ಜಿಲ್ಲಾದಲ್ಲಿ ವರದಿ ಬಂದಿದೆ ಎಂದು 'ದಿ ಟೈಮ್ಸ್' ವರದಿ ಮಾಡಿದೆ. ಮೈಕ್ರೋಸಾಫ್ಟ್ ನಲ್ಲಿ 91 ಸಾವಿರ ಸೌಕರರು ಕೆಲಸಕ್ಕಿದ್ದಾರೆ.

ಝುನ್ ಡಿಜಿಟಲ್ ಮ್ಯುಸಿಕ್ ಪ್ಲೇಯರ್ ಕಂಪನಿಗಾಗಿ ಮೈಕ್ರೋಸಾಫ್ಟ್ ಕಂಪನಿ ನಿರ್ಮಿಸಿಕೊಟ್ಟಿದ್ದ ಆಂತರಿಕ ಗಡಿಯಾರ ಕೈಕೊಟ್ಟಿದ್ದರಿಂದ ಮೈಕ್ರೋಸಾಫ್ಟ್ ಬಹಿರಂಗ ಕ್ಷಮೆ ಕೇಳಿ ಮುಖಭಂಗ ಅನುಭವಿಸಿರುವ ಹಿಂದೆಯೇ ಲೇಆಫ್ ಸುದ್ದಿ ರೆಕ್ಕೆಪುಕ್ಕ ಪಡೆದುಕೊಂಡಿದೆ.

2008 ಮತ್ತು 2009ನೇ ಹಣಕಾಸು ವರ್ಷದ ಎರಡನೇ ತ್ರೈಮಾಸಿಕ ವರದಿ ಜನವರಿ 22ರಂದು ಮೈಕ್ರೋಸಾಫ್ಟ್ ಪ್ರಕಟಿಸಲಿದೆ. ಆರ್ಥಿಕ ಸಂಕಷ್ಟದಿಂದ ನರಳುತ್ತಿರುವ ಸಾಫ್ಟ್ ದೈತ್ಯನಿಗೂ ಖರ್ಚುವೆಚ್ಚ ಕಡಿಮೆ ಮಾಡುವುದು ಅನಿವಾರ್ಯವಾಗಿದೆ. ಅಮೆರಿಕಾ ಒಂದರಲ್ಲಿಯೇ 1 ಲಕ್ಷಕ್ಕೂ ಹೆಚ್ಚಿನ ಜನ 2008ರಲ್ಲಿ ಕೆಲಸ ಕಳೆದುಕೊಂಡಿದ್ದಾರೆ.

(ದಟ್ಸ್ ಕನ್ನಡ ವಾರ್ತೆ)