ಚರ್ಮೋದ್ಯಮ: ಐದು ಲಕ್ಷ ಮಂದಿಗೆ ಪಿಂಕ್ ಸ್ಲಿಪ್!
ನವದೆಹಲಿ, ಜ.1: ಭಾರತದ ಚರ್ಮೋದ್ಯಮಕ್ಕೂ ಆರ್ಥಿಕ ಬಿಸಿ ಮುಟ್ಟಿದೆ. ಮಾರುಕಟ್ಟೆಯ ಅಸ್ಥಿರತೆಯಿಂದ ಮುಂದಿನ ಮೂರು ತಿಂಗಳಲ್ಲಿ 5 ಲಕ್ಷ ಮಂದಿ ಉದ್ಯೋಗ ಕಳೆದುಕೊಳ್ಳಲಿದ್ದಾರೆ. ಅಮೆರಿಕ ಮತ್ತು ಯೂರೋಪ್ ನಲ್ಲಿ ಉಂಟಾಗಿರುವ ಆರ್ಥಿಕ ಬಿಕ್ಕಟ್ಟು ಚರ್ಮೋತ್ಪನ್ನಗಳ ರಫ್ತಿನ ಮೇಲೆ ದುಷ್ಪರಿಣಾಮ ಬೀರಿದೆ.
ಚರ್ಮೋದ್ಯಮದ ರಫ್ತು ಏಪ್ರಿಲ್- ಆಗಸ್ಟ್ ತಿಂಗಳಲ್ಲಿ ಶೇ.17ರಷ್ಟು ಹೆಚ್ಚಾಗಿತ್ತು. ಸೆಪ್ಟೆಂಬರ್ ನಂತರ ಅಮೆರಿಕ ಮತ್ತು ಯೂರೋಪಿನಲ್ಲಿ ಉಂಟಾದ ಆರ್ಥಿಕ ಕುಸಿತದಿಂದ ರಫ್ತಿನ ಪ್ರಮಾಣದಲ್ಲೂ ಕುಸಿತ ಕಂಡಿತು. ಕಳೆದ ವರ್ಷ ಸೆಪ್ಟಂಬರ್ ತಿಂಗಳಲ್ಲಿ 1.44 ಶತಕೋಟಿ ಡಾಲರ್ ನಷ್ಟಿದ್ದ ರಫ್ತಿನ ಪ್ರಮಾಣ, ಈ ವರ್ಷ ಸೆಪ್ಟಂಬರ್ ವೇಳೆಗೆ 1.6 ಶತಕೋಟಿ ಡಾಲರ್ ಗಳಿಗೆ ಇಳಿಮುಖವಾಗಿದೆ.
ಚರ್ಮೋತ್ಪನ್ನಗಳ ರಫ್ತಿನ ಪ್ರಮಾಣ ನವೆಂಬರ್ ತಿಂಗಳಲ್ಲಿ ಶೇ.15 ಮತ್ತು ಡಿಸೆಂಬರ್ ತಿಂಗಳಲ್ಲಿ ಶೇ.20ರಷ್ಟು ಕುಸಿತ ಕಂಡಿದೆ ಎನ್ನುತ್ತಾರೆ ಚರ್ಮೋತ್ಪನ್ನಗಳ ರಫ್ತು ಸಮಿತಿಯ ಅಧ್ಯಕ್ಷ ಮುಕ್ತರುಲ್ ಅಮಿನ್. ಸೆಪ್ಟೆಂಬರ್ ನಿಂದ 3.5 ರಿಂದ 5 ಲಕ್ಷದಷ್ಟು ಮಂದಿ ಉದ್ಯೋಗ ಕಳೆದುಕೊಂಡಿದ್ದಾರೆ. ಮುಂದಿನ ನಾಲ್ಕು ಐದು ತಿಂಗಳಲ್ಲಿ 5ಲಕ್ಷ ಮಂದಿ ಉದ್ಯೋಗ ಕಳೆದುಕೊಳ್ಳುವ ಸಂಭವವಿದೆ ಎಂದಿದ್ದಾರೆ ಅಮಿನ್.
(ಏಜೆನ್ಸೀಸ್)