ಗುವಾಹಟಿಯಲ್ಲಿ ಸರಣಿ ಬಾಂಬ್ ಸ್ಫೋಟ

ಗುವಾಹಟಿ, ಜ.1: ಮುಂಬೈ ಮೇಲಿನ ಉಗ್ರರ ದಾಳಿ ಇನ್ನೂ ಹಸಿಯಾಗಿರುವಾಗಲೆ ಅಸ್ಸಾಂ ಮತ್ತು ಗುವಾಹಟಿಗಳು ಜನವರಿ 1ರಂದು ಸರಣಿ ಸ್ಫೋಟಕ್ಕೆ ಗುರಿಯಾಗಿವೆ. ಇಲ್ಲಿನ ಜನನಿಬಿಡ ಮಾರುಕಟ್ಟೆ ಪ್ರದೇಶವಾದ ಬಿರುಬರಿ, ಭೂತನಾಥ ಮತ್ತು ಬಂಗಾಘರ್ ಪ್ರದೇಶಗಳಲ್ಲಿ ಸರಣಿ ಬಾಂಬ್ ಸ್ಫೋಟಗಳು ಸಂಭವಿಸಿವೆ. ಈ ಸ್ಫೋಟದಲ್ಲಿ 16 ಮಂದಿ ಗಾಯಗೊಂಡಿದ್ದು ಯಾವುದೇ ಪ್ರಾಣಹಾನಿ ಸಂಭವಿಸಿಲ್ಲ.

ಸೈಕಲ್ ಗಳಲ್ಲಿ ಸ್ಫೋಟಗಳನ್ನು ಇಡಲಾಗಿದ್ದು ಗುರುವಾರ ಸಂಜೆ 3.30 ರ ಸಮಯಕ್ಕೆ ಬಾಂಬ್ ಗಳು ಸಿಡಿದಿವೆ ಎಂದು ಪೊಲೀಸ್ ಮೂಲಗಳು ತಿಳಿಸಿವೆ. ಗುವಾಹಟಿಯ ನಗರ ಪಾಲಿಕೆಗೆ ಸೇರಿದ ಕಸದ ಬುಟ್ಟಿಯಲ್ಲೂ ಬಾಂಬ್ ಇಡಲಾಗಿತ್ತು. ಕೇಂದ್ರ ಗೃಹ ಸಚಿವ ಪಿ.ಚಿದಂಬರಂ ಸ್ಫೋಟಗೊಂಡ ಸ್ಥಳಕ್ಕೆ ಇಂದು ಭೇಟಿ ನೀಡಿದರು.

ಪೊಲೀಸರು ತನಿಖೆ ನಡೆಸುತ್ತಿದ್ದು ಗಾಯಾಳುಗಳನ್ನು ಚಿಕಿತ್ಸೆಗಾಗಿ ಆಸ್ಪತ್ರೆಗೆ ದಾಖಲಿಸಲಾಗಿದೆ. ಅಸ್ಸಾಂನಲ್ಲಿ ಅಕ್ಟೋಬರ್ ನಲ್ಲಿ ಸರಣಿ ಬಾಂಬ್ ಸ್ಫೋಟ ಸಂಭವಿಸಿ 88 ಮಂದಿ ಬಲಿ ತೆಗೆದುಕೊಂಡಿತ್ತು. ಈ ಘಟನೆ ಮಾಸುವ ಮುನ್ನವೇ ಮತ್ತೆ ಸರಣಿ ಸ್ಫೋಟಕ್ಕೆ ಅಸ್ಸಾಂ ಗುರಿಯಾಗಿರುವುದು ದೇಶವನ್ನು ತಲ್ಲಣಗೊಳಿಸಿದೆ.

(ಏಜೆನ್ಸೀಸ್)