ಆ.17ರ ಭಾನುವಾರ ಭಾಗಶಃ ಚಂದ್ರ ಗ್ರಹಣ

ನವದೆಹಲಿ, ಆ.13:ಆಕಾಶ ವೀಕ್ಷಕರಿಗೆ ಮತ್ತೊಂದು ಸಂತಸ ಸುದ್ದಿ. ಭಾನುವಾರ(ಆ.17) ಭಾಗಶಃ ಚಂದ್ರ ಗ್ರಹಣ ಸಂಭವಿಸಲಿದೆ. ಬೆಳಗಿನ ಜಾವ 1:06:07 ಆರಂಭವಾಗುವ ಚಂದ್ರಗ್ರಹಣ 4:14:16 ಗಂಟೆಗೆ ಮುಕ್ತಾಯವಾಗಲಿದೆ ಎಂದು ನೆಹರು ತಾರಾಲಯದ ನಿರ್ದೇಶಕಿ ರತ್ನಶ್ರೀ ತಿಳಿಸಿದ್ದಾರೆ.

ಶೇ.80ರಷ್ಟು ಚಂದ್ರನ ಭಾಗ ಗ್ರಹಣಕ್ಕೆ ಒಳಗಾಗಲಿದೆ. ಭಾರತ ಸೇರಿದಂತೆ ಏಷ್ಯಾ, ದಕ್ಷಿಣ ಅಮೆರಿಕ,ಯೂರೋಪ್,ಆಫ್ರಿಕಾ ಮತ್ತು ಆಸ್ಟ್ರೇಲಿಯಾದಲ್ಲಿ ಖಗೋಳ ವಿಜ್ಞಾನದ ಈ ವೈಚಿತ್ರ್ಯವನ್ನು ನೋಡಿ ಸವಿಯಬಹುದು ಎಂದು ರತ್ನಶ್ರೀ ತಿಳಿಸಿದರು.

ಸೂರ್ಯಗ್ರಹಣವನ್ನು ಬರಿಗಣ್ಣಿನಿಂದ ವೀಕ್ಷಿಸಿದರೆ ಕಣ್ಣಿಗೆ ಅಪಾಯ ಆದರೆ ಚಂದ್ರ ಗ್ರಹಣವನ್ನು ಬರಿಗಣ್ಣಿನಿಂದ ವೀಕ್ಷಿಸಬಹುದು. ಈ ಚಂದ್ರಗ್ರಹಣದ ಮತ್ತೊಂದು ವಿಶೇಷವೆಂದರೆ, ಗ್ರಹಣದ ವಿವಿಧ ಭಾಗಗಳು ವಿಶ್ವದಾದ್ಯಂತ ಒಂದೇ ತೆರನಾಗಿ ಕಾಣಿಸಲಿವೆ. ಆಗಸ್ಟ್16ರ ಸಂಜೆ ಚಂದ್ರೋದಯದೊಂದಿಗೆ ದಕ್ಷಿಣ ಅಮೆರಿಕದಲ್ಲಿ ಹಾಗೂ ಆ.17ರಂದು ಬೆಳಗ್ಗೆ ಚಂದ್ರ ಮುಳುಗುವುದರೊಂದಿಗೆ ಆಸ್ಟ್ರೇಲಿಯಾದ ಚಂದ್ರಗ್ರಹಣ ಗೋಚರಿಸಲಿದೆ ಎಂದು ಅವರು ತಿಳಿಸಿದರು.

(ದಟ್ಸ್‌ಕನ್ನಡ ವಾರ್ತೆ)