ಟೆನ್ನಿಸ್‌: ಸೆರೇನಾ ವಿಲಿಯಂಸ್‌ ಅನುಭವ-ಅಬ್ಬರಕ್ಕೆ ಸನಿಯಾ ಶರಣು

ಟೆನ್ನಿಸ್‌: ಸೆರೇನಾ ವಿಲಿಯಂಸ್‌ ಅನುಭವ-ಅಬ್ಬರಕ್ಕೆ ಸನಿಯಾ ಶರಣು
ಸೋಲಿನ ನಡುವೆಯೂ ದಿಟ್ಟ ಆಟ ಪ್ರದರ್ಶಿಸಿದ ಭಾರತೀಯ ತಾರೆ

ಭಾರತೀಯ ಟೆನ್ನಿಸ್‌ನ ಅಗ್ರಮಾನ್ಯ ಆಟಗಾರ್ತಿ ಸನಿಯಾ ಮಿರ್ಜಾ ಆಸ್ಟ್ರೇಲಿಯನ್‌ ಓಪನ್‌ ಗ್ರಾಂಡ್‌ಸ್ಲಾಂ ಕೂಟದಿಂದ ಹೊರಬಿದ್ದಿದ್ದಾರೆ.

ಅಮೆರಿಕಾದ ಅಗ್ರಶ್ರೇಯಾಂಕದ ಆಟಗಾರ್ತಿ ಸೆರೇನಾ ವಿಲಿಯಂಸ್‌ ವಿರುದ್ಧ ಶುಕ್ರವಾರ ಬೆಳಗ್ಗೆ ನಡೆದ ಹಣಾಹಣಿಯಲ್ಲಿ ಸನಿಯಾ 6-1, 6-4 ಸ್ಕೋರ್‌ನಿಂದ ಸೋಲುಂಡರು. ಇದರೊಂದಿಗೆ ಸೋನಿಯಾ ಅವರ ಆಸ್ಟ್ರೇಲಿಯನ್‌ ಓಪನ್‌ ಅಭಿಯಾನ ಕೊನೆಗೊಂಡಿತು.

ಬಲಿಷ್ಠ ಹೊಡೆತಗಳ ಆಟಗಾರ್ತಿ ಸೆರೇನಾ ವಿರುದ್ಧದ ಸನಿಯಾ ಅವರ ಆಟ ಗೂಳಿಯ ವಿರುದ್ಧದ ಚಿಗರೆಯ ಹಣಾಹಣಿಯಂತಿತ್ತು . ಆದರೆ ಸುಲಭವಾಗಿ ಸೋಲೊಪ್ಪದ ಸನಿಯಾ ಎರಡನೇ ಸೆಟ್‌ನಲ್ಲಿ ವಿಶ್ವದ ಏಳನೇ ಕ್ರಮಾಂಕದ ಆಟಗಾರ್ತಿಗೆ ಕೊಂಚ ಪ್ರತಿರೋಧ ತೋರುವ ಮೂಲಕ ತಮ್ಮ ಈವರೆಗಿನ ಸಾಧನೆ ಅನಿರೀಕ್ಷಿತವಲ್ಲ ಎನ್ನುವುದನ್ನು ಸಾಬೀತು ಪಡಿಸಿದರು.

ಈ ಮುನ್ನ ಹಂಗೇರಿಯ ಪೆಟ್ರಾ ಮೆಡುಲ್ಲಾ ಅವರನ್ನು ಮಣಿಸುವ ಮೂಲಕ ಮೂರನೇ ಸುತ್ತು ಪ್ರವೇಶಿಸಿದ್ದ ಸನಿಯಾ, ಈ ಸಾಧನೆಗೈದ ಮೊದಲ ಭಾರತೀಯ ಮಹಿಳೆ ಎನ್ನುವ ಅಗ್ಗಳಿಕೆಗೆ ಪಾತ್ರರಾಗಿದ್ದರು.

(ಪಿಟಿಐ)

ಮುಖಪುಟ / ವಾರ್ತೆಗಳು