ಸಾಂಗ್ಲಿಯಾನ ಸುಪರ್ದಿಗೆ ಬೆಂಗಳೂರಿನ ಕಾನೂನುಮತ್ತು ಸುವ್ಯವಸ್ಥೆ

ಬೆಂಗಳೂರು : ನಗರದ ಪೊಲೀಸ್‌ ಕಮೀಷನರ್‌ ಸ್ಥಾನಕ್ಕೆ ನಡೆಯುತ್ತಿದ್ದ ತುರುಸಿನ ಸ್ಪರ್ಧೆ ಕೊನೆಗೊಂಡಿದ್ದು , ಹಿರಿಯ ಪೊಲೀಸ್‌ ಅಧಿಕಾರಿ ಎಚ್‌.ಟಿ. ಸಾಂಗ್ಲಿಯಾನ ಬೆಂಗಳೂರು ಮಹಾನಗರ ಪೊಲೀಸ್‌ ಕಮೀಷನರ್‌ ಆಗಿ ಆಯ್ಕೆಯಾಗಿದ್ದಾರೆ.

ಪ್ರಸ್ತುತ ನಗರ ಪೊಲೀಸ್‌ ಕಮೀಷನರ್‌ ಆಗಿ ಕಾರ್ಯ ನಿರ್ವಹಿಸುತ್ತಿರುವ ಟಿ.ಮಡಿಯಾಳ್‌ ಅವರಿಂದ ಸಾಂಗ್ಲಿಯಾನ ಗುರುವಾರ (ನ.1) ಅಧಿಕಾರ ಸ್ವೀಕರಿಸುವ ಸಂಭವವಿದೆ. ಮಡಿಯಾಳ್‌ ಅವರು ರಾಜ್ಯ ಪೊಲೀಸ್‌ ಮಹಾ ನಿರ್ದೇಶಕರಾಗಿ ಅಧಿಕಾರ ಸ್ವೀಕರಿಸುವ ಸಾಧ್ಯತೆಯಿದೆ.

ನಗರ ಪೊಲೀಸ್‌ ಕಮೀಷನರ್‌ ಹುದ್ದೆಗೆ ಕಾನೂನು ಸುವ್ಯವಸ್ಥೆ ವಿಭಾಗದ ಎಡಿಜಿ ಎಂ.ಡಿ.ಸಿಂಗ್‌ ಹಾಗೂ ಎಡಿಜಿ ಎಸ್‌.ಮರಿಸ್ವಾಮಿ ಅವರ ಹೆಸರುಗಳು ಕೇಳಿಬಂದಿದ್ದರೂ, ಅಂತಿಮವಾಗಿ ಕೆಎಸ್‌ಆರ್‌ಪಿ ಎಡಿಜಿ ಎಚ್‌.ಟಿ.ಸಾಂಗ್ಲಿಯಾನ ಪ್ರತಿಷ್ಠಿತ ನಗರ ಪೊಲೀಸ್‌ ಕಮೀಷನರ್‌ ಹುದ್ದೆ ಪಡೆಯುವಲ್ಲಿ ಯಶಸ್ವಿಯಾಗಿದ್ದಾರೆ. ಹಿರಿಯ ಸಚಿವರೊಂದಿಗಿನ ಚರ್ಚೆಯ ನಂತರ ಮುಖ್ಯಮಂತ್ರಿ ಎಸ್‌.ಎಂ.ಕೃಷ್ಣ ಈ ಕ್ರಮ ಕೈಗೊಂಡಿದ್ದಾರೆ ಎನ್ನಲಾಗಿದೆ.

ಜುಲೈ 1, 1943 ರಂದು ಜನಿಸಿದ ಸಾಂಗ್ಲಿಯಾನ ತ್ರಿಪುರಾ ಮೂಲದವರು. 1967 ರ ಜುಲೈ 18 ರಂದು ಪೊಲೀಸ್‌ ಇಲಾಖೆಗೆ ನಿಯುಕ್ತಿಗೊಂಡ ಅವರು, ರಾಜ್ಯದ ಚಿಕ್ಕಮಗಳೂರು, ಶಿವಮೊಗ್ಗ ಹಾಗೂ ಬೆಂಗಳೂರುಗಳಲ್ಲಿ ಕಾರ್ಯ ನಿರ್ವಹಿಸಿದ ಅನುಭವ ಹೊಂದಿದ್ದಾರೆ. ಬೆಂಗಳೂರು ನಗರ ಸಂಚಾರಿ ಡಿಸಿಪಿ, ಆಹಾರ ವಿಭಾಗದ ಡಿಐಜಿ, ರೈಲ್ವೆ ಎಡಿಜಿ, ಕೆಎಸ್‌ಆರ್‌ಪಿ, ಕೇಂದ್ರ ಕಾರಾಗೃಹದ ಎಡಿಜಿಯಾಗಿ ಕಾರ್ಯ ನಿರ್ವಹಿಸಿರುವ ಸಾಂಗ್ಲಿಯಾನ, ವೀರಪ್ಪನ್‌ ಶಿಕಾರಿಯಲ್ಲಿ ರಾಜ್ಯದ ಪಡೆಗಳನ್ನು ಮುನ್ನಡೆಸಿದ ಅನುಭವ ಹೊಂದಿದ್ದಾರೆ.

(ಇನ್ಫೋ ವಾರ್ತೆ)